Biti nekomu ilji nečemu kum odvajkada je veljika čast. Kumstve se preštimavalje, do kuma i kumstva fejt se držalje. On je bil pomagač h sake zloče i dobru jedne familjije. Kum je kakti nekakef svedok da njegef zetec ilji po novem kumče, ne zglajza i ne skrene z puta. A puteci su, te pak ovisi o zecu i kumu, sakojački. Imame kume gda se krstime. Oni su svedoki i potpora starcem da ostaneme verniki, pošteni ljudi i da paziju na nas i naše življenje. Kumi pri ženidbe su svedoki da sme priseglji na ljubaf i vernost, se dok nas Božek ne rastavi. Sake druge rastavljanje, gda prisežeme nie z blagoslovem cirkve. Nu, nu, ima tuj i one teri z gljibokem punem žepem misljiju i h nebe dojti, pak tak unda i moreju po drugi put dobiti priljiku i blagoslof i priseči za venost i svetost h braku. Unda kaj se kumstva tiče, ima i one tere je baš ove mesec jahke važne. Te je kumstve pri fierme ilji Sv. potvrde. Pri fierme čovek sam odabire kume, on je več pametniejši. Z tem crkvenem sakramentem čovek sam potvrdi da je katoljik i viernik. Te bi unda značilje da je več pripameti i da bu poštival se crkvene propise. Pri te njegve fierme ilji potvrde, svedok mu je fiermanjski kum. On po naše domače šege nie sam svedok na fierme nek i kesnejše pri ženidbe.

Pri odabiranju kuma, ljudi največ lučeju najprie na te kave je kum mogučnosti. Kaj me nej lovilji za rieč, niesem napisala da si, nek na žalost večina. Da je tomu tak, poklje firme, malje tere diete ilji fiermanik povieda pajdašu i drugem kak mu je bilje na firme. Ne povieda kak je bil vesel kaj je imel priljiku z bljizuga videti biškupa i čujti njegve rieči. Malje teri pripovieda o tomu kak si je zapamtiti poruke tere je dobil na fierme, a kamolji da bi po nji živel. Saki od njih same se falji z tem kaj je na fierme dobil. Žalosne je te kaj se do jednuga tak svetuga sakramenta, denes, drži po kupičku sakojačke moderne čačke. Bljesikalji buju deca z novemi modernemi mobitelji h ruka, a od cifri kuljike koštaju pametnamu se zavrti h glave. Najde se tuj teljevizore, becikljine, motoreke, a još malje morti i alteke. Niesu krivi onie teri ideju na firmu nek onie teri pririhtavaju decu i kume k tomu. Si naklapaju kak je h države žmehke, kaj morame priznati da i je, alji se te nemre videti gda se diela o fešte ilji kupičku. Mene nikak nie jasne kak nešče mora cielji mesec hoditi na posel za te kaj bi se h jednem danu porinulje h želudec. Ne dosta nek i preveč. Nie mi navieke jasne kak nešče more od nekuga čakati da dobi dar teruga mu ni starci nemreju privuščiti. Večina ljudi je denes tenjka h žepu i nikak nemrem razmeti da ima penez za rashitavanje. Nigdar me nišče i nikakva šega nie mogla prisiljiti da radi nečove bedaste, zmišljenje šege cielji mesec moram biti „lačena kruha“. Kaj je još grde hu te nove i zmišljenje šege, kaj ljudi radi takvuga troška prekljinjaju i preziraju sakramente, radi svojuga troška.

Si se vadiju, i kumi i zeci, da nie trieba delati stroška, alji tak ne misljiju. Niesem zapamtila h noveše vrieme da si je nešče zel baš siromaka za kuma ili da je štel iti siromaku za kuma. Morem tak reči i tvriti radi toga kaj ima dece tera još niesu ni krščena, a kamolji fiermena radi siročinje, a ne radi uverenja. Morete si misljiti kaj je hu dušica i srčeka te dece gda ove dane skup živiju z onemi teri se prčiju z darem od kume i kumici. Saka pajdašija i društve svoje članstve vabi z sakojačkemi obečanjima i čački. Morti bu tak i crkvenem jednuga dana stalje da deca tera idu na veronavuk buju krštena i fiermana kaj bi njim se podiela radost h duše. Oni sigurne neju pitalji, kum kaj buš mi kupil, nek, e mi očeš biti kum?