Bok moj kak sem se ove zadnje dane naposlušala sakojačke bedastoče i savete. Im sem ja senek baba tera maše prema pedesetpetom ljetu, pak mi je pametuvanja preveč. Nekuga vrapca sem preživela, alji i dobre, dobre pamtim prošle cajte. O nje nekaj i pričupiknem na papier kaj se nej pozabilje. Dobre pamtim kaj je bilje, kaj se delalje. Malje teže se zdej pripamti kam pospravim motiku ilji lopatu. Brze pozabim. A morti mi je te i sprič kaj jih unda preveč ne rabim. Kak sem več napisala, kaj česa sem preživela, i radosti i veselja, i tuge i potoke suzi. Pajdašuvala sem z dobremi ljudmi, alji i kumri.

Se je te diel mojuga življenja, alji i sačevoga. Nu kakvi su god vetri puhalji štiela sem da nigdar ne širim krila i ne zdižem nos h zrak kaj me nej preveč potpuhnulje, a unda bi si mogla svoj, ne baš malji nos, zapičiti gljiboke h zemlju. Niesem navieke išla ravne ilji bi negda ljudi reklji da bublje čovek z glavu po zidu bez veze i potrga roge. Rejši sem se malje pripocuknula, pokunjila i nie se štiela bosti z rogatemi. Saka takva bitka, napre je znane, bila bi zgubljena. Alji i čemu? Od toga nišče, a ni ja nej imel koristi. Moji puteci življenja kakvi da su bilji, e ravni ilji su švajdralji bilji su navieke, a nadam se da buju i ostalji, pocinfrani z istinu i poštenjem. I kak ove dane, kak sem rekla stalne čujem od jedne da sem na prave strani, a od druge da sem na krive. Po poštenju ni do jedne ni do druge baš preveč ne držim, a još jih menje misljim posluhnuti i zeti si k srcu. Koja je te pak unda prava stran.

Gdoj je tie teri određuje tera je stran faljižna, a tera dobra. Mene je moja babica nafčila, gda me je vodila h cirkvu, na koje se strane trieba stati h cierkve. Znala je reči da deca stojiju navieke pred oltarem i te pucke z ljieve strane, a dejčeci z desne strane oltara. Puce i babe stojiju od crkvene vrat takaj z ljieve strani, a muži z desne. Jedva sem čakala da sem mogla stati pred kipem Majke Božje, z ljieve strani. Te je bil znak da sem več poljehku puca. Ah, bilje je te več tak davne, alji se još pamti. I unda se tak po rasporedu ljieve i desne strani h cirkeve stalje. Nie bilje straha da bu tera baba stala na muške strani ilji obrnute. Ljudi bi takvu spodobu lukalji, alji bi ju i opomenulji. I pri ženidbe se zna gdoj gde pri presiganju stoji. Z tere je strani mladenec, a z tere mladienjka. Malje su se cajti zmenilji pak denes gda se i dojde k meše malje se doj drži strani tere su bile prie odrejene. Morti baš radi toga moji „dobri svetniki“ očeju da ja probam stati onak kakoni misliju da bi triebalje, gda več ne važiju stare šege. Nu unda nej same ja morala stati na prave strani nek i onie teri mene opominjaju. Makar si ovak gruntam, bilja na tere strani ja stala jednak morem dobre moljiti Oče našek i Krunicu. Važne je same te e ju moljim z volju ilji ju neznam i unda same z čubami prebiram. Bogu dragomu drage je ne same da čovek šlabekuje moljitvu nek da i po onomu kaj z moljitvu oče, da se toga drži.

Za te mi je čudne kaj onie teri neznaju držati čislje h ruka očeju odrediti kak se bu moljila krunica ilji bi reklji odrediti tera je stran prava za moljitvu. Prava je saka ona stran i putec po tere čovek hodi z zdignjenu glavu zrak i oko sebe ne širi smrad. Gda ostavlja trage na svom putecu tere se ne srami nek se ž njimi diči. Na putecu, gda hodi po bilje tere strani najde na rože i smeče. Rožice trieba doteknuti, podragati i podišati, a na smeče se nie trieba zgledavati i po njemu rovati. Po njemu dosta rujeju oni teri se z vana nadišiju, a z nutrič borme smrdiju.