Svibenj mesec je od vajkada mesec dišeče rožic med teremi se širi popievanje tičeke. Lastavice i ostalji tičeki vrnule su se z toplje kraje. Si tičeki frčeju ilji poprvljaju svoja gnjezdeca. Frčeju tak kaj bi njihof domek bil ščem ljepši i sigurnieši. Unda bi hu tem gnjezdeku, mati mogla na sviert pridonesti i odgojiti svoje mlade. Morti je baš zate i tie največ dišeči i rascvieteni i plodni mesec posvečen Blažene Marije Device, Majke cirkve. Baš za te hu tem mesecu njoj h čast saku večerku h tjednu ovršavaju se tak zvane Svibanjske pobožnosti.

Te su sakojačke moljitvice povečene Majke Božje, krunice, ljitanije, svete pesmice tere su napisane i popievane h njenju čast. I hu tem mesecu svibnju, točniejše desetuga, slavi se kak Majčin dan. Dan gda se bar unda trieba zmisljiti svoje mater. Ljubav i patnja Majke Božje bila je veljika. Radi toga je tak i sem materam sujene da se skupa z svoju decu radujeju, tugujeju i ž njimi i za njih trpiju. Tak je te i hredu i mora biti. I ima ona jedna priča gda su si okrenulji glavu od jednuga lopova i barabe, si su po njemu pljuvalji i gađalji ga z kamenjem. Same je njegva mati išla za njim na pogubljenje i plakala se. Rekla mu je da mora biti kažnjen za se zlo kaj je napravil, da su ljudi h pravu kaj ga pljujeju i gađaju z kamienjem, alji je on njenji sin i ona ga i takvuga mora imeti rada. Na te se je još več rasplakala. On, sin razbojnik, teri nie imel milosti za nikoga ni za vlastitu mater, hu tem se času obrnul i obrisal je suze. Te obrisane suze bile su njegva putovnica h čistilište, alji je na ovomu svietu moral biti kažnjen za svoje grde posle.

Saka mati gda ima svoju decu dala bi svoje življenje za svojuga pajnkrata. I te je h redu, i tak trieba. Nu ta ljubaf, ak je tak veljika mora imeti bremzu. Če je ona preveljika more vagu življenja obrnuti nahdol i unda se prejde naopak. Materina ljubaf mora biti ščap na tere se detece hpira, alji i batina z teru se vudri po stolu i pokaže gdoj je gazda.Teške je sake prave matere skratiti detecu gda neke oče, alji sa navike mora držati one stare: Če čoveku (a tak i svojomu detetecu) daš malji prst on oče i cielu ruku. I se je dobre dok se ima kaj dati. Gda matere, več na najge, nemaju kaj dati nek same svoje ljubavi, se prejde krive jer te nie dosta. Kolce življenja počneju se korutati nahdol, puna patnike. Si teri su na ta kolca nemreju jih zabremzati. Kaj se nej te dogajalje, materine ljubavi moraju imeti brenzu. Moraju znati zašlajfati kotač kaj nej se prešlje h nadol i se se rezbilje. Žalosne je denes, kaj je sega več ljubavi materi bez kočnic. Kak su matere furt h nekakve poslje, ljubaf dece kupujeju z sakojački obljiznieki, popuščanjem i gda dojde do grduga teške se more kaj pomoči.

Nie sem bila rietke h priljike gda mi mater dojde školu pitat za svojuga đaka kak se vuči. Če je loše zna reči da nesmem te povedati ocu če bi došel h školu popitati za svojuga ljubimca. I takva veljika ljubaf i briga matere nekaj je kaj more detecu fejt odmoči, a ne pomoči. Bila sem nie tak duge na sprevodu jedne mame. Tužna je bila slika gda ju je morala pokopati njenja familjija..

Imiela je i ona jedinca sina. Familjija bogata, a majčina ljubaf veljika. Se mu je dala na volju, skrivala njegve bedastoče. Dotiral je do toga da nie mogel biti ni dober muž, ni otec. Nie bil nafčeni pljunuti šake i skrbeti za svoju familjiju i za svoju mater. Htegnul je restepsti dobru gospodaru i ostal h pajdašije z kupicu. Same zate kaj njegva mati, dobra žene i gazdarica nie svoju majčinsku ljubaf znala zabremzati. Za ljiesem te dobre žene i matere išlel je hnučec teri mora odrastati bez očeve podrške, sam z materju tera se skup ž njim bori h teškem življenju. I te same zate kaj jedna dobra mama nie imela bremzu h ljubavi prema sinu.