Z duhu zrieloga sadja bljiži se jesen. A baš hu tu dobu, od vajkada pri nas se znovič otpreju školska vraca, zazvoni školske zvone i znovič pozove panjkrate da sedneju h klupi i vupijeju nova znanja. Brže se vrtiju cajti i dece fejst brze prejde ferije, kaj se za njihove starce ne bi moglje baš reči. Oni nekak, po spomenku med njimi, jedva čakaju da deca bar pol dana budu školje. Gda denes lučem decu gda dojdu poklje ferija h školu teške se more reči da njim je pod ferijem bilje ljipe. Ne radi toga kaj niesu negde bilji ilji nekaj delalji več radi toga kaj njim je denes teške hpetiti z nečem kaj bi jih raduvalje. Negda, gda sme moji jargani i ja znovič išlji h školu bilje nam je krive radi toga jer je tek hu tem cajtu cagnul ljietni posel.

Taman gda su bila polja pokošena i blage se moglje širem pasti, gda je sad bil zrel kaj si si mogel sobu zeti h polje, moralje se iti školu. Za pajdašuvanje i delati sakojačke huncutarije dok se bilje z blagem na paše ostalje je same jeden cajt h jutre ilji popoldan, gda niesi bil h školje. Malje teri je od nas došel školu bez drapi na koljiena ilji zguljeni lakti. Pentranje po sadju, biejžanje po suhe i prašne pute, skrivanje oko kopiče, suša i po štala ostavilje je svoj trag na dece. Razbiti palci, skresane koščice na noga spretne su se skrivale pred starci kaj jih nej vidlji. Če su jih pak za hriebalji, mam je bilje špotance o tomu gde si bil, kaj si delal i kaj niesi pazil. Nu, školu se senek išlje z črljenemi i zažarenami ljicami, a z srca se mogla čujti radost i veselje, jer još je jedne ljete bilje pred nami h pajdašije z knjigami i pajdaši. Prec se toga zmenilje kaj se škole dotikavlje kaj je i h redu. Nemreju iti cajti na rikverc. Tak i vučenje.

Pune je toga novuga kaj bi življenje ljudi bilje bolše i lježešieje. I baš onie teri siedaju h školske klupe imaju zadatak da na tomu polju dielaju. Ipak se se nekak med samu decu i med decu i vučitalji spomiešalje i nekak obrnulje na hopak. Več put je teške reči, gdoj je h školje gazda, vučitalji, deca ilji starci. Gledeči denes, škola je od jedne, druge i trejte, alji kak i pri hiže senek se mora znati gdoj je gazda. Če saki tira na svoju stran i ne posluhne se pametniejši se more prejti po grdem. Baš prie nek je počelje nove školske ljete do mene je z modernu mašinku došlje pismece tere kruži med ljudmi. Hu njemu se malje delje na vagu ponašanje školje i oko nje prie dvojst- trideset ljiet i denes. I prie nek sam ga ja, a i hnogi drugi terem je stalje do njihove đake dobilji, gruntalji sme o tomu kaj se se dogaja i e je te h redu. Da nej nešče misljil da sem za vračanje na ponašanje h školje do prie sto ljiet ilji da se školu vrne „teca batina“, ne dam mu za praf. One kaj je denes žalosne kaj sakomu onomu teromu morti očeš pomoči gda „zabrazdi“, moraš dobre paziti kak buš te napravil, da neš negde završil. Negda gda je detece školje napravilje kakvu bedastoču i od vučitelja dobilje packu ilji bil skiečkan za vuhe, moljil je Boga da mu te nišče nie povedal starcem jer unda je doma sljeduvala još jakša i vekša „porcija“. Denes se pak ne vupaš malje hujše h diete poluknuti, a kamolji ga doteknuti. Mam si ga počel zlostavljati. Če mu pak dojdeš bljiže, morti ga podragaš gda mu je teške ilji se ž njim pospominaš na samom mam si ped…ilji pedo…. .

Unda se več put dogodi i da je đak „jakši“ nek vučitelj. Če bi, nedaj bože, vučitelj gda mu je puna kupica sega, fljiknul đaka, sjatiju se mam se novine i teljevizije. Nišče se ne pita kaj je tie malec napravil da je dobil za vuhe. A vučitelj, ne same da ostane bez posla nek mu se resteže familjija od šukundede teri se morti na pijacu potukel z jargani, pak do na dalje jer je on z „nasilničke familjije“. Ak pak diete fljikne vučitelja, nikomu nič. Vučitelj bi se moral sam po sude restezati i još bi sigurne na kraju bil krif.

Žalosne je kaj radi sega toga hnoga deca tera odrastaju bez barem malje straha, a unda i srama kak odrastaju kreneju krivem putem. Jeden cajt još i moreju „rievati“, alji gda grezaju po putu se gljipše i gljipše, gda se sare napuniju z blatem, teške jih je z greza spuknuti. Saki starec bi radi toga moral imeti na pameti da vučitelji imaju decu za svoje đake same jeden kratki cajt, a starci cielje življenje. Dobre bi bilje da starci spregneju z vučitelji, kaj se nej pod stare dane moralji skrivati i črljeneti.