Nikak niesem na čistom kak ljudi, moje jargane tak slabe služi pamčenje. Pitam se unda e tak radi pozabiju navuk teri su jih negda starci vučilji ilji pak niesu dobre posluhnulji. A negda su starci vučilji decu več nek denes. Denes je menje volje i cajta i starci misljiju da se deca vučiju o življenju h školje i čitanju na nekakva nova mašinka.

Kak negda sega toga nie bilje, starci, a i si stariejši teri su se unda nam mladem našlji na putu nekaj bi nas podvučilji. Navieke se moglje čujti gda bi nešče nekaj zabrazdil, pokorne rieči:
„Kaj su te tak starci nafčilji“?
Radi toga su starci, kaj nej bilji pošpotani, decu od malje nog vučilji poštenju. Vučilji su kaj česa, a največ su „jahalji na tomu“ da se nesme nigdar krasti i lagati.
„Gdoj laže tie i krade“, reklji bi ljudi. Iste tak i obrnjene.
Znalje se reči i da se nesme biti lakoten i lakotesati.
„Preveč imeti ni Bogu nie drage, pogotove če nie blagoslovljenje.“
I baš si unda gruntam, kak su te moji jargani, a tuj se mislji na se one bljizu moje ljiet ilji nekaj več, pozabilji na te navuke.

Malje, malje, gda lučem h moderni oblok ilji otprem novine, nekteruga peljaju onie h plave ancuge. Peljaju je tie „plavi“ ljudi med sobu. A oni h sredine med njimi držiju ruke pred sobu i kak god da je vruče imaju prek ruk prehičene svitreke. Kak su se do toga sprehajanja h pajdašije z onemi teri za pasem nosiju pendreke, dopeljalji z jemanjem onuga kaj nie njihove, tak unda i z lažmi. Kak njim je laž dieljec življenja, misliju i dalje lagati i skrivati ruke tere su zavezane z ljesicami. Ciganjski smieh njim cinfra ljice, a če kaj htegneju reči, veljiju kak je te same nakakva zabuna.

O bože, misljim si ja. Kak je njihovem starcem če ih imaju, a unda ih i lučeju. Ja se zmisljim svoje, teri su znalji reči da bi me se odreklji da čujeju da sem nekomu hkrala same sad, a kamolji kaj druge.

A tie, moji jargani, sigurne su te iste čulji od svoje starce, alji su pozabilji. Torvalji su i torvalji, med tem i lagalji i punilji žepe ne same da buju si preveč puni nek da i curi van. Pri tomu su rievalji i drugem oko sebe. Jeden cajt sem je bilje dobre. I ljipe. Smicalji su se se više i više, trpalji drobe fejt i još jače.

Nu i tomu jemput dojde kraj.
„Kaj je preveč ni pes z maljem nemre pojest“, reklji su negda ljudi.
Negde zaškripi, negde konci popucaju i najemput se z visokuga lempi naklu. Ščem je čovek višeše z tem bolje copne nahdol. A unda, milji moji kam koji, reklji bi ljudi.
Gda se željiezne vrace zapreju, lokoti zacviljiju vrieme je za gruntanje. Pajdaši teri su bilji dieljec pentranja h vis razbežiju se kaj miši z pod poceka gda se mačka vrne z tepenja.
I unda bi reklji da bi bilje za smejati gda nie nek za plakati, kak se se brze pozabi. Onuga koga hloviju z „prsti h medu“, najemput nišče ne pozna, nišče neče čujti za njega i reči bar grdu, ak več nemreju ljiepu rieč.

Velji se da je tat gdoj krade i onie gdoj lojtru drži, a unda je same pitanje dana gda se buju negdašnji pajdaši našlji skupa. Pak se pitam kam buju si tie stalji. Ovak več veljiju kak je tam pune več stanare nek je placa. Jadni, nafčeni su si oni na veljike place. Žaljiju se njihovi kak živiju grde, kaj nie dostojne čoveka. Moreš misljiti. Pak jemput je i cajt da i oni malje probaju kakve je te življenje, gde nie dosta obloke, gde nie dosta placa, a pobelari su prazni. Nie takve trieba žaljiti, jer su baš oni z svojemi prsti i varanjem dopeljalji pune več ljudi kaj su na zraku, alji kaj h logoru. Žaljiti jih i oprostiti njim, deti je nazaj tam gde su bilji, nesme se dogoditi. Oni bi znovič pozabilji one kaj su negda nafčilji: „Lagati i krasti se ne splati!“