Rosa jutre hmiva
mesecu se zieva,
poljehku ga sunce
na počinek riva.
Zbudil se mali tiček
h gnjiezdu pod strehu,
kukuriknul je kokot
i zbudil družinu cielu.
Zabrbotal je negde i puran
skočil je podriemni maček
z pod kopiča van.
H štalje kravica muče,
konj h jasle riče.
Z kukurikanjem i mukanjem
zoveju gazde van
kaj nej pozabilji
da počel je novi dan.

Duge se več po naša dvorišča, rane h jutre gda se sunce budi, ne čuje kukurukanje kokota, brbotanje purane i mijahkanje mačke. Štaljice, ak još i jesu h dvorišča, največ su pune kaj česa, a blaga i živene več davne nie. Negda, gda su nam po dvorišča h ljietne cajte bile druge duhe i drugi zvoni, bilje se hude na nje. Denes, gda nie tak unda nam faljiju i rade se zmišljavame na prešle cajte. Još dok je mesec plaval po nebu, a sunce još driemalje, dvorišča su negda ožila. H ljietnu dobu zdigalje se rane kaj bi se si poslji napravilji prie sunčeve pripeke. Muži su se spravljalji na košnju. Z kanti, gde bi njim se gvozdile kose, jemalji bi je, stepalji od vode i dobre nabrusilji. Brusi su zvonilji i meste kosce nazavalji da trieba krenuti h polje. Jeden za drugem kosci bi krenulji, po tranike stepalji rosu, a za njimi bi ostajalji tragi. Za pasi su njim se bambalji drveni ilji od kravskuga roga vudieri h terem bi skakalji brusi. Dok su išlji prema tranike jeden drugomu su dohitavalji sakojačke povede. Šaljilji su se med sobu i pripoviedalji one kaj se njim ilji drugem pripetilje. Gda se došlje na tranik, spralje se je jutre ž njihove grlji tak kaj su si pogutnulji kakvu prežganicu. Postavilji su se na tranike kak soldati, a unda su kose počele „popievati“. Za kratke vrieme na tranike su ostale duge grede pokošene trave, a kosci su krenulji na drugi. Kosilje se se dok sunce nie pripekalje. Pred konec košnje po poljske pute išle su babe z cekerem h ruka ilji košarami na glave.

Pokrita z krpu ispod tere je lukala flaša, dišala je košta tera se nesla na tranik za kosce. H hladu kre vode pod vrbu ilji negde pod grmem prestrla bi se krpa na teru bi gazdarica posložila hranu. I ona sama, malje dalje po strani, dok bi kosci jeli, otpočinula se je na jeden kratki cajt prie nek se prijela restepat redavja pokošene trave. I ona je več kak i kosci bila trudna. Zdigla se za ran, još prie nek su kosci krenulji h polje, zakurile h šparetu i pristavila froštukelj za težak. Nu nie se delal same froštukelj. Trebalje je podojiti kravice, skidati štalu, pohraniti svinje i nahraniti sitnu živinu. Poslu h ljietnomu jutru nigdar nie bilje kraja.

Za kosce nie bilje dosta skuhati same župu, mljike z žganci nek se moralje zaklati živinče, poharati ga i ščistiti. Se se te napravilje h jutre, a unda išla rihtat košta od živinčeta. Na tranik se nesel pečeni ilji na saftek z domači nokrljini.

Denes se jutra budiju z novemi ropanji, z novi poslji, štuljenjem i novi šnjofi. Stari su negde zaprti h cinfrasta škrinja puna spomenke.