Prethodna kolumna
Slijedeća kolumna

Za dušu, za spomenek: Žetva

Piše: Nevenka Gregurić
Dok h veljikem hladu svoje hiže čakam da se sunce malje postihne, čujem klepanje moderne mašini,

Dok h veljikem hladu svoje hiže čakam da se sunce malje postihne, čujem klepanje moderne mašini, kombajne, teri negde h polju pobiraju žitek. Več na pol obraščenem polju najde se tuj i tam posieje ječem, šenica ilji zob, a unda te moderne mašinke pobereju. Prešlji su cajti gda su se po polju, kaj valji, žukale njive pune zlatnuga klasja, pocinfranoga z črlejni maki komu su se raduvala same deca jer su jih svojem šindrljicanju rade bralji.

Polja su nam pusta je nam se nič ne splati delati kak negda. Te je morti h redu jer su došle nove šege. Ipak čovek nemre, a da se ne pita kaj se bi dogodilje da se obistini ona poveda veljikoga fizičara Anjštajna teri je, gda su ga pitalji kak se bu vodil trejti svetski rat, rekel:

„ Za trejti neznam, alji za četriti znam da se bu vodil z lukem i strielu“. Te bi značilje da buju ljudi napravilji takve mašine i oružje kaj buju hništilji se one kaj se bu do unda napravilje i moralji buju krenuti z ponova. Čuvaj nas Bože, tak nečega. Alji gda malje pregruntame kaj bi se dogodilje da same jeden cajt nebu nafte ilji struje. Ljudi bi ponorelji. Moralji bi se vrnuti živet kak se živelje h negdašnje cajte. Kak se pak negda živelje i rihtlje poslem, mladi na terem sviet ostaje, pune toga neznaju. Radi toga hnogi rade pokažeju, poviedaju kak i ja kak su se negda nekteri poslji delalji, za nedaj Bože da zatrieba. Ljehke je h ruke prijeti srp, ak ga se ima, alji je teže ž njim nekaj delati, ak se nezna. Dobre je se znati i nafčiti, naj se najde. I ja sem negda bila huda na kosanje drača, okapanje po njiva i h vrtu, žetve, nu moj je babica je znala reči:

„Saki se posel mora znati delati. Vrabec bu nastal če se bu moralje delati, a ne se znalje. Z seljaka je ljehke biti gospon, alji je teške z gospona biti seljak“!

I dok se čuvam zdej veljikoga sunca pitam se po gdoj zna kuljike put kak su ljudi negda baš po največe pripeke delalji posel. A jeden od posle teri se po vručine moral delati bila je žetva. Želje se po veljikem suncu radi tog kaj se reklje da h zrinče mora zajti sunce kaj bi bilje zdrave, ljehke bi se zmlatilje, a unda i od njega bila dobra melja. Sklepani srpi čakalji bi zabiti na vrata suši ilji na drveciepe i gda se je sunce zdiglje, rosa posušila krenule se na njive. Babe su si napravile raspored, gda se bu na čieve njive želje, jer žetva je bil skupni posel. Gazdarica pri tere se je želje zela je h polje sobu strošek z hranu i pijaču. Jelje se poklje žetve na njive, a negda se išlje na več njif i bilje se cielji dan h polju. Spomenki, šale i tračaraj bil je med babaimi dok su pod pazuhami delale prviesle na tere bi slagale požetu šenicu. Kak god da su brze išlji jeziki, skup ž njimi i srpi teri su želji „zlate“, a babe ga slagale med prsti. Punu šaku požete šeničke dele bi na prviesle i slagale kupček. Od oka su znale kuljiki mora biti kaj bi muži moglji z prvieslem zavezati h snop. Gda su snopi bilji povezani slagalji su se h hrastave tak kaj su klasi bilji obrnjeni h zrak. Štelje se je tak da još sunčeka dojde do zrniča. Muži su sobu nosilji bruse i brusilji srpe žnjaljam kaj bi bilji ščem oštreši. Nabrušeni srp nigdar niesu dalji žnjalje h ruke nek su ga hitilji na zemlju. Ona si ga je sama zdigla i nastavila ž njim žeti.

Te je bila šega do tere se držalje radi toga kaj se nej baba poriezala na srp. Požeta njiva i šenica složena h hrastave bilje je cajt gda se malje počinulje i nekaj pregrizlje. Bil je te cajt dok se je čakala foringa na teru se naklal žitek ilji počinek do druge žetve. Z punemi kolami žitka išlje se na mlatitvu. Kola za kolami složene jedna za drugemi čakale su h redu pune vur. Nu nišče se nie srdil. H spomenku su ljudi čakalji svoj red ilji pomagalji jeden drugem kaj bi ščem prie bilji poslji gotovi. Tukle su mašine tere su trgale klase žitka od slame. Oko vetra teri je pak „slačil“ zrniče od njegve „oprave, prašilje se na se strane. Nišče se nie žaljil jer su vriečke punjene jedna za drugu bile veselje za familjiju. Ščem več vriečki žitka veče je bilje veselje. Unda nie bilje straha da ne bu kruheka. Vozi natovareni z slamu, vriečke pune šenice i marže pune ščinki i pljiev znale su dojti dima, na dvorišče gda je več mesec nazaval zviezde.

Facebook