Znam da se hnogi nebuju baš z menu složilji poklje kaj buju prečitalji. I njim i ja dam za praf da ne moraju gruntati kak i ja. Ja morti gruntam tak radi toga kaj se navieke držim one, kak su negda ljudi reklji:
„Vrak nie nigdar tak črni kak zgledi!“

Tu povedu zdej prenašam na kupiček knjig za se školnike. Z knjigami pajdašujem od gda sem počela hoditi h školu, pak se do den denes. Zmotarije vezane ž njimi dobre su mi znane. Niesem za te da se vračame h cajte mojuga detinjstva gda je življenje bilje bolje grdeče i trpeče. Ipak, kak god bilji unda zaostalji, bume reklji mi i starci, tak sme do knjig držalji kaj do „svetuga pisma“. Čez cielje ljete si sme rabilji lucke ilji bi reklji posujene knjige, a unda si na nje trebal paziti kaj na oke h glave. Niesi vufal pošarati po lucke knjige ilji svoje. Če bi ti se teri ljist štel strgati unda su starci napravilji pop i zapopalji ga kaj nej otpal. Knjige su išle od jednuga deteta do druguga. Saki đak je več pod kraj razreda bezicieral pri pajdašu knjige za viši razred. Starci z tem niesu imelji nikakvoga posla, a ni veze. Mi, deca, sami sme o tomu vodilji brigu i med sobu mienjalji knjigice, pomagalji jedni drugem da se knjige posudiju pri bolše đake jer oni su senek znalji i bolj čuvati. Gda je škola bila gotova h šestem mesecu, mam h prvem tjednu vrnule su se knjige onomu od koga si posudil, alji si več pribavil knjige za druge ljete. Nie se čakalje jeseni. Knjige su več pred kraj šestuga meseca bile zamotane h plavi ilji bielji pahpaier i čakale jeseni. Pri takvem posujavanjem i miembam knjig deca su pajdašuvala i med sobu tirala spominke. Naposlušalji sme se unda i mi deca „propovedi“ stariejše kak oni niesu imelji bilježnic kak mi, nek su rabilji pločice i kamenjček z terem su po nje spisavalji.

Moje pajdašije je bilje bolje nek našem starcem jer sme več imelji bilježnice i olofke, a kesniejše pere i tintu. Na olofku i gumicu fejst se moralje paziti kaj jih nej zgubil. Olofka- dvie čez jeden frtalj ljeta bila je, ne dosta nek, preveč. Plač mi beži, alji i histe vrieme smieh, gda se zmisljim cajta gda sem išla h školu i stvari nosila h očeva torba, h tere si je on negda nosil gablec na posel. Torbe su dišale po luku i špeku, a čoški su bilji podrapani. Tut su mi znale zginuti olofke i gumice. Kak mi se te česte dogajalje mati je navieke imiela sprave rezervu. Otec kak da je poznal da pišem z novu olofku ilji novem komačekem olofke, mam je imel prodike od čega ti se h glave moralje vrteti. A njegva prodika je završila ovak:
„Kakef si ti đak kaj zgubiš olofku i gumicu. Tuljike si zgubila olofki kaj bi gda bi jih složil jednu do druge po nji mogel dojti h nebe, a gumic tuljike kaj bi mogel zbrisati cielji sviet!“

Z tem je dal na znanje da se se kaj se škole tiče mora čuvati i o tomu voditi briga.

Baš radi toga, kaj sme mi kak deca vodilji brigu o knjige i o semu onomu kaj nam je triebalje za školu, boljelje me te kaj se h zadnja ljieta do knjig tere su deca dobavljali nič nie držalje. Knjige niesu koštale nič ni decu ni starce pak unda niesu na nje triebalji paziti kak, bi reklji:“Bog zapovieda“.

I zdej najmput, knjige neju zabadave. Trieba jih bu kupiti. I znovič vudriti po žepe od starce. H kakvem cajtu živime, te je grde i pune košta. I one kaj bi hu tem grdem cajtu gda trieba nabaviti knjige triebalje biti ljiepe je te kaj deca i starci buju več med sobu vodilji spominke. Če su te i spomenki prek moderne mašini, ali ipak su spominki. Morti buju deca čez ljete jedni z drugemi več pajdašuvalji, več se spominalji i dogovaralji bar oko knjig. Morti buju jeden druguga bolje šacalji i več čez ljete bezicieralji knjigice za druge ljete. Jer, baš te denešlnje dece falji, pajdašuvanje. Moderen način životarenja stiral je z hiž, z dvorišča i školske hodnike pajdašuvanje dece.

Ipak, ne bi imiela nič protif da deca terem starci vežeju jedva kraj s krajem dobiju i dalje knjige zabadaf, da jih čuvaju i da jih šenkaju jedni drugem. Z mienjanjem i posujavanjem knjigic, radi šparanja, morti se bu bar na kratke vrnulje pajdašuvanje dece kak negda.