Ljetni meseci, od vajkada su meseci gda su ljudi hodilji po prščenja. Hu temu cajtu dosta se svetkujeju posvetila po fara. Morti je te radi toga kaj malje cagneju poslji, makar na selu nigdar nie bilje tak da bi se moglje hmenjikuvati. Ipak, veljiki poslji bilji su zgotovljeni za jen cajt, a za hašnjenje po doma navieke je nešče ostal. Triebalje se briguvati o blagu, svinja i živine. Nigdar su nie si hižni krenulji od doma. Napre se več znalje gdoj bu tie teri bu ostal doma i njemu se moralje navike nekaj kupiti na prščenju.

Za druge su bilji cajti pririhtavanja i veselja, kak dece, tak i stariejše. Pune su posla imele i selske šnajderice jer je saka dekla i baba štiela za prščenje imeti nekaj novuga kaj bi se poštimala i bolje zgledala. Puca, če nej imiela novu kiklju mislila je da ju nej zagledal niti jeden dečke. Stariejše babe pak h nove obljeke gizdale se bi jedna pred drugu, kak da je te bila prikaza tera je bolja gazdarice. A da je zgledenja babi, njenje dece i muža bilje kak skaza da je dobra gazderica znalje se po tomu kak zgledi i e ima kaj h nadra ilji h štunfu penez sprave. Jedini penzi tere je negda baba zaslužila bile su od prodane jajec, živinčeta ilji dojnuga. Ak je dobre gospodarila imiela je več za prodaju. Na sakem prščenju babe su imele zagovorek i kupuvale „zagovore“ napravljenje od voska. Tak je h ruke sake babe, gda je išla obavljat zagovora h cirkve, bil „zagovor“ napravljen kak živinica; čujžek, kravica, pajcek, kokoš, alji i tielce napravljene na sljiku čoveka. Retke teri mladi denes znaju da su se si negda, kak babe tak i muži zagovaralji. Te je značilje da su h nekakve nevolje prizavalji svece h pomoć, a za te kaj su njim pomoglji, zagovorilji su se za ciele življenje da buju hodilji na prščenje k toj cirkve gde je bil kip sveca teromu su se zagovorilji. Največ se zagovaralje Majke Božje Bističke za se zloče, sv. Barbare zagovaralji su se rudari, Trem kraljem zagovaralje se za živinici, sv. Vidu za zdravlje oči i tak dalje i dalje. Gdoj se jemput zagovoril zagovor se je ovršaval dok je god čovek mogel hoditi ilji bil žif.

Najmlajši su se sakomu prščenju največ raduvalji. Njih niesu mučile nikakve brige oko zagovora. Za nje je te bil dan veljikoga raduvanja. Niesu preveč jambralji če su se moralji zdiči rane h jutre i iti bose do cierkvice gde je bilje prščenje. Niesu se tužilji na razbite palce tere su rezbilji po pute. Bilje je najvažniejše da su išlji na prščenje i da niesu moralji ostati doma pomagati oko blaga i živine. Dobre su znalji da bu saki dobil kakef kolač od ljicitara, gutnul si gvierca, a bez čačke se nie išelje k domu. Ona deca čievi su starci bilji bolje stajući imelji su priljiku probati i teri vieršljin. Vieršljini su tak znalji dišati po placu kaj je sakomu skruljilje h trbuhu kak da črieve po tielu voziju trke.

Denes, gda čovek ide na prščenje nema hu sebe nekakvu veljiku žerahku tera ga bi pri srčeku griela. Mladi največ idu, ak idu, radi toga kaj idu starci ilji moraju. Radi zagovora mladi denes teške ideju, jer malje teri znaju kaj znači, zagovoriti se.

Po pijace se več rietke rievlje oko štande gda se saki dan moreju kupiti sakojački čački pak decu oni s prščenja ne veseljiju. H spomenka stariejši ostala su same prščenja na terem je se brunčalje od zazavanja, smieha i radosti. Kričalji su slastičari dok su stalji kre svoje becikljine z kiblami sladoljeda. Zazavalji su pečenjari k kotlu na terem su kaj soldati bilji posloženi vieršljini.

„Tombula, tombula! Saka dobiva! Nema prazne!“, kričalji bi prodavači tombule. Smieh i pesma čula se z ringišpielja teruga bi jakši dečke vrtel. Njemu je mam pri puca zrasla „ciena“ jer je z rievanjem ringišpiljevoga kotača pokazal kak je jahki. Puce i deči poskrivečki su namigavalji jedni drugem, a če bi puca išla dima bez licitarskuga srčeka h nadra ilji klaruža za vratem, bila bi žalosna.

Prešlji su takvi ljiepi cajti. Sela ne brunčiju od žvieglji i piščelji najmlajše. Još je ostala same radost h spomenke na takve vesele cajta h srcu stariejše. Alji histe vrieme i malji žal kaj denešnja mladost, ak i ide na prščenje, nema takve radosti i veselja kak negda.