Baš gda sem si ovak gruntala kaj da napišem, kak stvorene mi je bil semen sireka h našem Zaboku. Dok sem se sprešetavala med štandi, sprobavala sireke, zmisljila sem se na cajte gda je h moje špajze bilje prec sakojačkuga mljekeca, pune sireka, vrnjiča i putreka. Malje je onie teri su se skup z menu sprešetavalji med puljiti, a da znaju kak je deljejki i teški put od mljekeca do sega kaj je bilje pred nami. Šari puljti pocinfrani z sem onem kaj nam selje daje bila je ljepota za lukanje.

Negda nie bilje takve sakojačke sireke, pocinfrane z kajčesem kaj se hu njuga meče, kak denes. Cajti idu napre, šnjofi i žmahi su drugački. Ljudi denes iščeju furt nekaj novuga i drugačkoga. I dok sem lukala h zdeljice friške scejeni sirek, onak po starinski kak se negda delal, bilje mi ga je nakek krive. Kak da se srameči držal med zdimljeni, posušeni, pritisnuti, zmiešani, smočeni i dišeči. Nu dok sem lukala, ti domači, bielji kak sniek sirek, kak da sem čula mužiku mljika tera je igrala, negda, gda sem dojila. Dojenje kraf od navieke je za mene bilje nekaj posebnoga. Još dok sem lukala kak babica ilji mama držiju z koljieni žatrku, a hu nje se za čas ziblje mljike, jedva sem dočakal cajt gda bum mogla i ja dojiti. Najljepša mi je bila mužika teru igraju mlazi mljika gda ciljaju h žatrku. Mužika se mienjala od početka dojidbe do kraja. Saki mlaz mljekeca imel je drugi ton, jačinu i ljepotu.

Kak se žatrka z mljikem punila ovisilje je o dojilje i dojnost krave. Nektere su se tak ljehke dojile kaj je za čas žatrka bila pune, a nektere, dok si ju podojil, boljelji su prsti od muke. Gda se dojilje dobre se moralje paziti na krafski rep kaj nej kravica gda ž njim maše, natepla mljieke. Mljieke je bilje, od košti, najgadljiveše, pak se do čistoče mljika i mljiečne posude fejst držalje. Žatrke, rejnice i cedilke morale su biti dobre oprane i zljufrane na zraku. Sake je dvorišče imelje h dvorišču zapičeni suhi drveni kol z več rašlji. Na njemu su se vesile žatrke, rejnice i cedilke kaj su se zračile i sušile. Pri mljekeku i mljičnem osim kaj se pazilje na čistoču pazilje se i na vuroke. Kravica je bila hraniteljica familjije pak se nju i mljieke moralje čuvati od vuročne očie.

„Gdoj ima kravicu ne mora biti strahu gladu“, reklji su ljudi. Saka posuda na kolcu ilji plotu nie smiela dočakati mrak. Prie mraka spravila se fižu kaj posuda, a poklje i mljieke, ne dobilje bleke ilji vuroke. Ni mljieke ni nič od donjuga nie se smelje nositi po noči k pajdašem ilji familjije. Če bi se pak moralje, unda se malje posoljilje kaj bi dojne čuvalje od vuroke. Ak se z mljiečnem išlje prek vode, moralje se h vodu pljunuti par put, kaj bi se otiral kakef coper. Takaj se z mljiečnem h ruka nie se smelje iti „na stran“. Če ti je došla sila, moral si mljiečne ostaviti deljejke od sebe dok si ti svoje „obavljal“ negde za grmem.

Podojene mljiek gda se doneslje fižu najprie se precedilje i napunilje renjicu jednu ilji več. Jeden diel mljike skuhal se za froštukelj, večeru ilji za čez dan. Mljieke h rejnice delje se h pelnicu ilji komoricu i nie se smelje načete. H rejnice se kiseljilje par dane, po ljetu brže, a po zime duže.

Z vrha kiseluga mljieka obralje se vrnjiče, a kiselje mljieke se metalje topit na kraj šporeta. Rahlje se par put obrnulje i gda se počela odvajati sirutka i skupljati sirek se se skupa zljejalje na cediljku i ostavilje scijati par vur. Sirutka se pila, ž nju su se omešavala tiesta za gibenje i štruklje, alji se i podišal i popravil žmah napoju za pajceke. Od scejenuga sireka delal se trepanec ilji prgice. Za prgice se sirek zdrobil, posoljil zmiešal z malje paprike i delal kak špičasti kupčeki. Prgice su se metale h košaru teru se privezalja negde pod strehu na sušilje Friški se sirek zmiešal z vrnjičem, posoljil, hu njuga se narezalje luka i te je bila glavna hrana ljudem hcielje ljete.

Dugi je bil negda putec od mljekeca do sireka. Počel je još na paše. Če je krava imiela dobru pašu i hranu, bilje je več mljieka.

„Krava ne doji na vime nek na gubec“, bila je poveda teru su radi toga govorilji ljudi. Poveda, kak i dugi put od mljieka do sireka ostal je same još h spomenku nekere ljudi.