Kak se mienja življenje, mienjaju se šege o tera su negda ljudi fejst vodilji brigu. Življenje brze ide kak na iberlaf. Mladi navieke misljilji da cajti poljehku ideju jeden za drugem. Ljudi h zriela ljieta govoriju kak nejdeju nek letiju. Če je i tak, senek kak da ljudi još potiravaju življenje fejst napre. Od vajkada se zna da je zemjica hraniteljica ljudi i da se mora imeti nekakef prirodni tiek. Voda, sunčeke, vietreki i dežđeki rihtalji su posle ljudem.

Denes očeme zagospodariti ž njimi semi i se još nekak podhitriti. Ne drži se do one stare šegi gda trieba početi delati posle h svoje vrteke, nek se žurime z sakojačkemi modernami šegi porinuti napre one kaj morti i nie trieba. Ljudi su negda reklji:
„H zemlju se more metati semenje gda moreš z golu ritju na nju sesti!“

Morti se baš zate i ta priroda oko nas resrdila i napravila tak kaj si jeden cajt moreš sesti na zemljicu, a drugi put ti je zeboščica. Unda babe po vrte ne pratiju one kaj su nafčile od svoje prababic, babic i materi. Siejaju i sadiju po vrteke, ak jih još imaju, po nova šega. Sieja se i sadi kak da se hganja z cajti i trucira vremene. Štelje bi se h ljipnju mesecu h svoje vrteke imeti se one, kaj je negda po stara šega zrieljelje k kraju ljeta.

Dok su negda babe, prie jezer ljiet hu ovem cajtu, pri hiže nadgledale i poljehku nasunčeke vadile flance tere su zasejale na Pepelnicu, muži su z novič opletalji vrteke. Rezalji su šibovje tere je potiralje z ograje vrta i htikalji novu graju na mesta gde je živina napravila čez prve ljete rupe. Rupe niesu smele biti kaj nej na zasajene i posiejane h vrtu mogela dojti živina i rezbrcati. H vrtu je od se zime, na jednem skrajeku, h zavetu bilje još navike poruga luka, gredica zimske šalata i luka šarutljina. Te se je sadilje h jesen kaj se je na prtuljet imelje kaj zeti h vrtu. Babe su čez cielje ljete spravljale semenje h male krpice i zavezale z šofi. Bile je tuj, h njihove malje pinkljece, obiešene negde na najžu sega semenja, kaj denes h semenara. Na prtuljet su prebirale poskrivečki po semenju kaj ju nej tera druga baba vidla i hrekla. Šenjkale su babe jedna druge semenja če je bilje viška, alji tek unda gda je sebe se posiejala. Misljile se, če bi prie dala semenja da njenje siejanje ne bi došlje k sreče. Kumer je i unda grizel i pojel semenje pak su dan prie sejatve ,semenje tere se moglje, namakale h octu. Pri sejatve su se hmekuvalje kaj se ne bi vidle po vrtu. Gdoj je bil vuročnoga oka nie ni jedne babe bilje drage da ju luče gda po vrte sadi ilji sieja. Po selu se odvajkada znalje i pratilje gdoj je vurečni ilji krivuga oka. Ljudi teri su imelji kakvu faljingu z teru su se rodilji niesu baš bilji dobredošlji gda se je delal bilje kakef posel. Za nje se misljile da su vuročni. Vuročni su bilji i oni za tere se po selu znalje da su duge cecalji mater. Takvi ljudi niesu nigdar smelji gdojti k hiže gda se nekaj delalje, leglje i sadilje.

Če se več pripetilje da bi takef vuročni došel k hiže, unda se moralje malje oko njega popljuvati. Za takve šege su si znalji, pa gda bi išlji kre bab gda su na prtuljet bile po vrtu, h šalje bi zapopievalji:
„Sunce grieje dešč curi, stara baba luk sadi. Baba prdne, luk se htrgne. Luk se zasadi baba se pošči.“

Gda su babe sadile lučice, niesu smele pri sadnje prdnuti. Misljile se, če bu prdnula da bu luk bolje grizel. Z toga se dielala šega gda se je jel luk. Ak je grizel unda su reklji. „Joj, Bara, Mara...kaj si tak fejt prdiela, gda si lučice sadila, kak luk grize. Im ga nie moči jesti!“

Gazdarica je takaj morala paziti kaj je h vrt nej nešče došel od dečurlije i h ruke imel kaj za pojesti. H vrtu se nie smelje jesti. Če se jelje unda bi h vrtu došlji krti i rovalji po gredica. Ljudi su misljilji da krtem diši droptinje hrane tere bi opalje pri jelu. Gda su pak h vrtu zišlji flanci bolša gazderica imiela viška i deljila pajdaašicam poklje kaj jih je dosta sebe zasadila. Napukala je flance i odnesla z vrta van i tek unda dala. Nigdar se niesu flanci ilji kaj z vrta davalje nekomu prek plota. Veruvalje se je da unda nebu h vrtu došle k sreče one kaj je posiejane ilji posajane.