Pak sam imel bliski susret s našim zdravstvom. Točnije s bolnicom. Patricija več par dana ima temperaturu povišenu i naša doktorica ju je poslala da ide krv zvaditi. Još je na uputnici napisala HITNO i to točno tak z velikim slovima.

Več neko vrijeme se nemre z autom do bolnice nek se moraš sparkirati tam skroz dole na parkingu. I dok smo se sparkirali, došli do laboratorija več je bilo 10 vur. Gore se Patricija popišala i zvadili su joj krv, pa sam nakon toga pital da kad bu nalaz gotof. I vele mi da to mora uzorak krvi iti h nekakve strojeve, centrifuge i da to traje vuru vremena i da im treba jedno 10 minut dok to se ne pririhtaju i da bi to moglo biti gotovo h 11 i 15.

Prešli smo onda do kioska jer je dete bilo žedno, a ja nisam imel cigaret. I vrnemo se natrag tam, čakamo i čakamo i negde oko 11 i 20 pitam na šalteru e je gotov nalaz. Nije. Čakam još 10 minut i pitam opet. Nije, ali bu za največ 10 minut. Pitam ja opet za sljedečih 10 minut. Nije. I da bi oko 10 do 12 bil gotov. Kaj mi nisu onda odma mogli reči da bu nalaz gotov h pol dan, bi prešel doma obed skuhati. Ovak em sam bezveze sedel gore h čekaonici, em nisam obed skuhal. A i ovu kolumnu i još koji tekst sam mogel h to vrijeme napisati. Zapraf ova kolumna ne bi bila takva da se to nije dogodilo. Onda ne bi o tome pisal.

Pisal bi recimo o tome kak su si Patricija i Sandra h zadnje vrijeme jako dobre. H pondeljek nisam mogel k sebi dojti. Kak smo of tjedan i Patricija i ja popoldan, ona h školi ja na poslu, budim ju h rano jutro negde oko 10 vur. Kad, ona već ima mobitel h rukama i prek mobitela je na fejsu ili na tak nečem. Malo bolje sam pogledal i vidim da to kaj ima h rukama nije njezin mobitel. I nije. Sandrinog je imela. A Sandra njezinog. Znam je inače normalo da sestre med sobom mjenjaju stvari. Ali to pri meni doma nije normalno. Bar do sad su to bile iznimke, a ne pravilo. A morti su deca i malo još zrasla pa ih napokon pusti to da se moraju furt svaditi.

Mogel sam pisati o tome kak Gracia h nedelju nije štela hvečer spati. Prvo si je na miru legla, podudala flašicu i gledela crtane. Onda joj je to postalo dosadno i valjda nije štela biti sama h sobi i počela se plakati. Onda sam došel h sobu, pa se malo smirila. Ali kad je videla da ju ne vadim van iz kimbača opet plač. Onda sam ju del k sebi na krevet, pustil Fifi i krenuli smo skupa gledeti crtani. Ali njoj se to nije gledelo nego bi se ona igrala. Čim bi postala nemirna zaprijetil sam joj s metanjem natrag h kimbač. Pa se malo smiri. I tak par put. Onda je zmislila novi način kak bu tatu, to jest mene udobrovoljila. I čim bi ja njoj zaprijetil s kimbačem, došla bi do mene i počela mi puse davati. Onda sam se napravil kaj da spim. A Gracia je zišla naklu s kreveta i krenula prema vratima. Kak joj nisam dal da prejde van iz sobe počel je opet plač. Onda je i žena došla h sobu. Pa smo si si tri skupa legli h krevet. Ali se je bilo po istom. Gracia bi malo bila dobra, malo bi krenula nekam, a kad bi ju zašpotali počela nas je ljubiti. Prvo mamu, a onda i mene. I to je potrajalo do dugo u noć. Kaj trebam opće pisati da h jutro nije bila baš zadovoljna kad smo ju zbudili da ide h vrtič.

Mogel sam pisati i o stanju h državi. Ali to je več sima poznato. Ili o novom zakonu po terome morate imeti broj na hiži. To je kakti zato da se ovi kaj peju popisivat stanovništvo drugo ljeto znaju gde je ko doma. Prošli put kad je bil popis su nas skoro preskočili. Isto kak nas preskočiju kad se snjeg čisti ili kad se krpaju ceste. Več par put sam skoro kupil broj za hižu, ali na kraju ipak nisam. Se si nekak mislim i još furt se nadam, da če me preskačeju dok se čisti snjeg ili krpaju ceste, da bu me i poštar prekočil dok nosi račune.