Denes imam ispit. Ne, ne studiram nič če ste tak mislili. Na poslu imam ispit. Če ga položim bum napredoval na poslu. Mislim nem napredoval, i dalje bum tu gde jesam, ali bum imel veče kak se to zove zvanje, a ono kaj je meni ljepše za znati je da bu i plača veča. Samo kaj se za taj ispit trebalo i nekaj vučiti. To mi baš i nije išlo. Nije mi to išlo niti h školi, a kam sad. Kaj se mora nije teško. Tak je meni šef dal skripte v terima se piše. Se bi to bilo dobro da te skripte nisu stare. Jer je sad prvog sedmog zišlo par novih zakona. Zišel je novi Zakon o državnom odvjetništvu. A ja sam se se nafčil po starom. I novi Zakon o USKOK-u je zišel. I toga sam se staroga bil nafčil. A imamo i novi Zakon o kaznenom postupku. I 200 stranic izmjena i dopuna tog zakona. I kak sam se vučil prvo stare, a sad ovih par dana i nove zakone tak mi se sve zmotalo h glavi. Pa zadnji put prije ovoga sam se vučil prije 5 ljet kad sam državni ispit polagal. Jedino kaj je dobro h semu tome je kaj nemam kaj zgubiti. Če položim dobro, če ne položim nikome nič. Jedino kaj bu me sram.

A hčera je najbolja od svih žena odlučila da idemo na more. Prek interneta je našla po dosta povoljnoj cjeni bungalove h nekom kampu. Pogledal sam to i ja na kompjuteru i čisto ljepo zgleda. To su male hižice od drijeva napravljene, h nekakvoj šumici gde rasteju borovi i masline, saka hižica ima ljepu natkritu terasu napre a na terasi i stol, klup i dva stolca. Nutra je jen bračni krevet, za decu kreveti na kat, mala kuhnja i kupaona sa zahodom. I ima mesto za limenog ljubimca na 4 kotača kraj hižice. Kak to zapraf je bum videl. Samo kaj smo zračunali da nas bu to koštalo več nego kaj nešči iz moje familije ima za cjelo ljeto režija za hižu na moru. I da je taj nešči pameten pa da veli «Dečec daj ti meni plati te režije i poreze i na ti hižu na 10 dana.». Ali ne! Bolje je da ja peneze dam tam nekome, nego svojemu. A kaj bum kad moj (to jest moja) neče. I onda se bu na kraju plakala kak ima malu penziju, kak ona teško zdržava se to, kak mi neznamo kak je njoj teško. I sad si ja mislim gdo je tu lud.

Ali nema veze. Mojoj deci se dopadaju ti bungalovi i moja deca peju na more. Kolko god se nešči trudil da im to uskrati.

P.S. položil sam ispit. I to s četvorkom.