Bilo je prvo, ali nije baš bilo kupanje. Dojdem h petak doma s posla sav nikakav, vruče mi je, jedva stojim na nogama. Još uz to sam bil hud kaj pes jer je Jaca najavila da nam buju još srezali plače, a još ni regresa nije bilo. I povrh svega trebam iti na roštilj za 300 ti broj Zagorskog. Male sam si sel kaj sam došel do zraka i veli meni žena da bi mogli na kupanje prejti. Meni se ideja mam dopala. Spakirala žena sve nas po redu, seli mi h auto i pravac toplice (neču reči tere da ne bila reklama). Došli mi tam, sljekli se, ja sam Gracii napuhnul mali gumeni čamac, žena dela nju nutra i vozi ju po bazenu. I maloj se to fest dopalo.

Kak mi se bliži godišnji tak su se manje šanse za prejti na ljetovanje. Jer su i dalje velike sličnosti moje i državne kasice prasice. Kak i državna, tak je i moja se bolj prazna. Samo ne razmem zakaj saka antirecesijska mjera mora baš mene pogoditi. Prvo nam je doktor Ivo kapetan broda koji je prvi napustio brod koji tone zel 6 posto od plače. U redu. Kriza je i treba se nečega odreči. Onda su me pak hdrapili po žepu. Nema več knjiga za školu zabadaf. Nema veze. Kak sam ih i prije kupuval, tak ih bum i ljetes kupil. Sad me pak hočeju hdrapiti po žepu da mi zemeju još 6 posto od plače, K-15 i božičnicu. Pa je Jaca onda odustala od toga i rekla da bu sima zela po 8 posto. Da bi za par vur rekla da ne zela 8 nego 5 posto. Mi se vidi da ni sami ne znaju kaj hočeju. I ne razmem zakaj mi onda sad kad je recesija, kriza i kaj sve več je moramo financirati i drugu državu, nama susjednu. Tu stavku uopče ne spominju kad se govori kolko buju kome smanjili. Ima tu još stavki tere su ko svete krave h Indiji. Nesme ih se dirati. Si spominjeju pelješki most. Bum ga i ja spomenul. Veliju h vladi da se mora delati. Pa nek se i dela. Ali nek se da nekome h koncesiju da ga napravi. Če se autocesta tu čez Zagorje mogla dati strancima da ju napraviju i pobireju cestarinu, zakaj onda država ne bi dala nekome naj napravi taj most za svoje peneze i pobire mostarinu narednih 30 ili 50 ljet? Hočete da vam ja velim zakaj se to ne napravi? Zato jer se na natječaj nišči pameten nebi hjavil. Jer se takef projekt nebu nigdar otplatil. Jer zakaj bi nešči išel prek mosta, ak more iti prek Neuma. I još si more h Neumu kupiti male špeceraja i šteku cigaret puno jeftineše neg pri nas.

Jake, jake pune penez iz proračuna ide u županijske, gradske i opčinske blagajne. Kak i ne bi kad imame 20 županija i grad Zagreb, 127 gradova i 429 opčina. Ili prevedeno to znači 20 župana i saki od njih ima po 2-3 zamjenika, 127 gradonačelnika i još tolko dogradonačelnika i 429 opčinskih načelnika. To je i 576 tajnica, par hiljada pročelnika,... Če to pretvorimo h peneze onda to izgleda ovak: saki od tih župana, gradonačelnika i načelnika ima oko 1000 eura plače. Puta 576 je 576000 eura saki mesec, puta 7,3 (približni tečaj eura) je oko 4 miljona i 200 hiljada kuna saki mesec. Samo za lokalne šerife. A da broj općina vrnemo na stanje iz 1991. zašparalo bi se na tim plačama 3 miljona i 300 hiljada kuna. I to saki mesec. A gde su još ostali kaj h tim jedinicama lokalne samouprave primaju plaču?