Cviljenje gumi, ropanje sakojačke mašini, tiekanje ciele dane z posla na posel za malje da čoveka ne dopelja do toga da ponori. Kak su nove frkefulje čoveka hplele h svoje kolje več put je teške koracati hu tem kolu. Gubi se korak, a i sapa za dihanje. H glave se počne vrteti kak ringešpilj. Malje falji da čovek zgubi sam sebe i da se unda nazaj i sam z sobu jedva zestane. Prie prec ljiet vidla sem kam te vodi. Gda mi žifci počneju bambati na tienjaka panjkljeka mene je najbolši ljiek da oni nazaj postanu debelji i jahki, da si otprhnem na meste gdeje mirne, tihe i nekak blažene.

Takve meste najlježe je najti h cirkve tera z svoju stoljietnu mirnoču kak da gladi moje, sakidašnjem življenju, načete žifčene panjkljeke. Nigdar mi nie teške sesti h klecalje prazne cirkve jer sam same kratki cajt sama. Za čas mi pajdašiju dielaju dragi spomenki mojuga draguga življenja. Pred menu je tak živa sljika mene z pajdaši, teri pred oltarem sklopljenemi rukami jedva čakame da bu župnik prekrižil miešare poklje čega se more iti dima. Kak god da sme rade išlji na mešu, senek nam je stati h cirkve bilje dugocajtne. Pokorne sme ga gledelji i poslušalji makar niesme razmelji kaj govori. Dobre sme znalji da nas on pod oke prati kak i starieši z teremi sme na mešu došlji. Ak si na mešu došel sam, navieke te je nešče sela mogel videti kak se h cirkve ponašaš. E bilje vruče, zima, dešč, snieg, megla ilji mraz k meše se h nedelju moralje iti. Mudrim se, gda se zmisljim kak sme babica i ja znale plahutati po diežđu k meše. Ak je i imiela imbrielu, ona je na sebe imiela več rupi nek kaj je bila ciela, pak je je bolje bilje bež nje. Gda je curel dešč, na glavu je znala deti najsvileši rubec. Rekla je da dešč po rupcu unda same prebeži. Kaj nej ja, kak diete zmokla po glave, glavu mi je diela pod kuljijakljin. Z glavu pod kuljijakljinem niesem vidla kud se ide. Ona je lukaka meste mene po putu. Ja bi tuj i tam poluknula spod kuljijakljina same da vidim kuljiki sme diel puta prešle i e sme još deljejke. Babica je znala reči gda sem triebala malje bolje duknuti kaj bi preskočile mlaku na putu. Gda god je curel dešč bilje je i hladneše, a babičine tielje me grlje kaj razgoretai gašpar.

H cirkve pak, navieke nas je bilje tak pune kaj sme h stiske jedni druge grelji. Nu kak god da sme pred oltarem zgledelji blažene i milje i mi sme imelji svoje šege za tere nišče osim nas nie znal. Skrivečki sme jen druguga znalji ščeknuti, skiečkati, požugljati ilji mu stati na nogu. Hu te naša humalji senek sme pazilji kaj je grieh, a za kaj nam straci niesu napomenulji da je griešne. Znalji sme si zeti nekuga z rende i frnjiti nos kak da je pustil „goluba“. Pustiti goluba ilji prdnuti h cirkve bil je veljiki grieh. Če ti se te pripetilje moral si znati gda tvoja duša dojde na on sviet, h zubie bu morala nanositi tak pune vode kaj se bu napunila ciela cirka i sprala od smrdučine. Pljunuti na nekuga ilji kazati mu jezik, takaj je bil grieh. Če si te delal, na drugem svietu buš moral ljizati vruče lupate.

Pri pričesti sme pazilji kak se drugi držiju gda primeju pričest. Ak se kaj stresel mam sme bilji sigurni da se nie dobre spovedal. Stareši su nas vučilji da na spovedi morame povedati se griehe tere sme napravilji kaj bi nam bilji oproščeni. Če bi zatajilji kaef grieh moglje se dogoditi da nas pričest zapeče na jeziku kak žerahka. Raduvala sem se gda sem na vrata šekaštrije zagledala zvonara Miška kak ide z buštricu. Te je bil znak da bu taki kraj meše. On je imel na ščapu privezanu, črljenu platnenu buštricu, tere se z van na dienu bambal zlatni cof. Znala sem poslušati kak zvoniju dinari teri su copalji h buštricu i probala pogoditi kuljike je doj hu nju hitil. Žalosna sem bila gda sem vidla kak je babica diela ruku kak da meče h buštricu, alji nič nie zazvonilje. Ruku je pristavila k buštrice kak da meče peneze kaj nej njenje pajdašice vidle da je bez penez. Njenja mala prevara bila je same naša tajna.

Babica mi je rekla da saka cirkva ima narisane Božje oke tere nas gledi h cirkve i prati nas gda zidem ž nje. Če ga i h cirkve ne najdem znam da je tuj. Za te gda poklje pajdašuvanja z svojemi spomenki h mirnoče Božjuga doma, zjačani žifčeni panjkljeki idem k domu, znam da me Božje oke prati. Unda me več nič ne srdi, ni ropanje, ni cviljenje, ni posel, a moje srce bez glasa, sega guta kriči:
„Bože, kak sem vesela i srečna, tak kaj bi mogla zagrljiti cielji sviet!“