Dug cajt se o tomu svetku bab, teri dojde h ožujku mesecu pri nas čkomelje. Misljilje se da je te svetek teri su zmislji oni teri su nam privuščilji da živime h „piekelu“. H novenastaljem „raju“, spominjati peklanjske cajte baš i nie bilje bog zna kak dobre. Tak su misljilji oni teri su hodilji oko škole, a ne školu pak unda niesu nafčilji za kaj se baš slavi osmi ožujek, kak Dan žena. Niesu znalji da baš radi jahke hrabre ženjske unda, denes hnoge moreju živeti red z mužmi, delati posle teri do unda za njih niesu bilji dopuščeni. Do unda za babu je bilje da čkomi i posluša, da rodi i pazi na decu, da diela se posle i tak duge kak drugi očeju. Misljile se i tak se živelje, da je za babu kuhača i batina. Gda si ovak gruntam, za nektere bi i denes morti za se nas bilje bolje da je malje tak i ostalje. (Malje se šaljim. Ženjske najte zameriti.)

I tak kaj se dotikava 8. ožujka jeden cajt sme se ponašalji kak cigan gda je išel h gosti. Išel je tak cigan h gosti, naravne, nepozvan. Išel je čez trnac po teremu se je se plavelje od slif tere su opale naklu. Cigan je otpr šljic i scal po sljiva. Negda jih je jel i bile su mu jedini obrok, alji zdej je išel h gosti i niesu mu trebale. Nu gda je došel h gosti, nie dobil nič jesti nek batin. Išel je žalosni dima čez isti trnac. H želucu mu je skruljilje pak je moral pobirati sljive. Teru je god zdigel, rekel je sam sebe: „ta nieje poscana, ta nije poscana!“

Tak sme se i mi ponašalji prema svetku babi. Gda su nekteri vidlji da tie praznik niesu zmisljili ljudi z „piekala“, pomalu se počel znovič ovršavati.
A da je negda, 8. mart bil popračen z veljikami feštami, si starieši se dobre siečaju i na njega rade zmišljavaju. Bil je te bapski svetek teruga su još preglasilji majčinem dane. Deca su za tie svetek mamam kupovalji sakojačke rožice: karanfiljeke, zumbuljeke, tuljipane... . Našlji su se tuj još sakojački dareki tere su potpomoglji kupiti muži. Po fabrika su babe slavile tak kaj su si poskrivečki donesle na posel nekaj bolšuga za pogutnui, a dima su išle z nekavem darekem teruga su na poslu dobile. Maljebolje stoječe i držeče išle su van z svoji šiefi na veselje. Če su od muža gda su došle dima dobile na dar „buh tabljete“, i če su išle drugi dan na poslel z očalji z plavemi okviri, niesu marile. Druge ljete napravile su iste.

Za babinje tere nie delalje po frabrika ilji gde drugde, njihovi su muži dobivalji nekakef darek za nje. Pri nas je bil rudnik gde se je kopal vugljen i gmajna gde se je kopala gljina i babe ilji mame rudare i gmajnjščane, dobile su zdljice, teniere ilji platne. Tak si h sake hiže mogel videti istu posudu, a babe nosile kiklje, klajde ilji oprave zešite od istuga platna. Mam se moglje doznati kaj su gmajščani ilji rudri dobilji za svoje bolje polovice. Same ženjske bile su okupljene h „Društvo naša deca“ i pririhtavale veljiku feštu za slavlje Dana žena. Par tjedne prie svetka, žurele su se hasniti kaj bi h večerku išle h školu gde su jih vučitelji i vučiteljice vučilji popievati i tancati.Skup z decu rihtala se veljika priredba za svoje meste i ljudi z druga mesta teri tak nekaj niesu imelji. Okupljanje babi ovisilje je o volje vučitelje i tam gde su oni živelji z mestem i za meste, kak pri nas, bila je največa veseljica. Da nie bilje pri nas vučiteljice Nevenke Vidović i njenjuga muža, Katice Pavučnik, Lidije Loborec, Anice, Barice, Katice..., hnoge ženjske, a med njimi i moja mater nebi nigdar splaknule rit h moru. Ženjske su za 8. mart napravile takve zabave kaj su zaslužile tuljike penezi, kaj su siromašne dece mogle platiti tjeden dva liečenja na moru, a iste tak su i one same prešle glet mnoge ljiepe kraje pri nas i vun.

Još se zdej siečam gda sme mi deca delalji bedake z babi gda su rekle da idu Hitaljiju i da moraju imeti pašijuše. Na sam svetek cielje selje je dišalje od kolače tere su pekle za feštu. Od ranuga jutra rihtale su sebe kaj bi ljepše zgledale. Čez dan su spod rupca šrtelji navelmani lasi na krpinje, koruznicu ilji novinskem papierem. Gda su jedna drugu porihtavale i tapierale frizure „polakierale“ su se tak da su rezmutile cukar h vode. Slatku vodu dele bi zube i po lasie širem pljučala kak mlaz, kaj bi pošpricani lasi dukše stalji h frizura. Od takve zabavi i fieštanja ostalji su same spomenki h pameti onh teri su hu tem cajtu živelji i njim se raduvalji. Za se te ženjščice i za se one tere te denes očeju biti:
SREČEN 8. MART, MEĐUNARODNI DAN ŽENA!