Ljudi se od navieke rihtaju i cinfraju. Hu tem cinfranju očeju zgledati mlajše i ljepše. Pomade su imelji i muži, alji pune menje od bab. Negda su znalji svoje lasi namazati z voljičem kaj bi se bolje delale velme ilji kokotice. Ljice su, dok nie bilje moderne pomadi, poklje podbrivanja poškropilji z plavižem ilji octem, kaj njim nej koža bila napeta.

Babe kak babe od vajkada su se cinfrale i kinjđale več nek muži. Nie bilje unda sakojačke pomadi kak denes, alji su senek vodile brigu da se za preščenje, gosti ilji kakvu prigodu malje bolje porihrtaju. Nie unda bilje vitljere kaj bi vitlale lasi, nek su se lasi vitlali na šofeke, perinje, a kesniejše i z novinskem papierem ilji papierem od vrieč. Kaj bi sfrknale lokne malje bolje držale lasi su se namakalji z vodu h terem je bil rastopljeni cukar. Druge su babe svoje lasi frkale tak kaj su vručale šarajzline i namatale vručuga na lasi. Te senek nie mogla delati saka baba nek one tere su bile tomu poslu vičneše, pak su unda bile na glasu. Hodile su po sela rihtat mladienke i delat njim velne. Gda lučeme stare vienčane slike, nema ni jedne mladienjke tere ne bi imila lokne ilji velme. Kaj bi frizura bila čvrsteša, osim kaj su malje namakale lasi z cukarovu vodu, još je baba tera je rihtala mladienjke lasi, diela h zube slatku vodu i z zubmi špricala po lasie. Te je zgledalje kak da lasi lakiera kaj bi ljepše i duže stalji. Bilje je malje teže takve lasi reščesati. Nu te nie bila preveljika briga, jer se inak nie saki dan triebalje česati. Babe tere su imele hpletene kite niesu lasi prale i česale po par tjedne, a i duže. Ženjske su si porihtavale se kaj je ljudske oke moglje videti.

One tere su imele slabeše obrvi malje su jih pofarbale i nacrtale si jih z zgoretu šibicu ilji ščapčekem. Šibica se vužgala i gda je malje obgoriela unda su se ž nju vljiekle crte. Vusnice i ljičeka farbale su se na čeljene, z krep papierem.

Kak su nektere babe negda kak i denes imele po ljica pišče, same su si čistile ljice. Najprie bi pišče stisnule, a unda su ljice kaj bi bile glatke malje „brusile“ i njeguvale.

Kak sem nekteri dan poslušala kak je denes skore h sake moderne pomade zerica nečega kaj je fejt škodljive, bilje bi morti dobre da se sproba negdašnji starinski savet i recept kak ščistiti i nahraniti našu kožu na ljicu. Kak god da se hmivame sakojačkami sopuni, naše ljice na sebe nakupiju masnilje, a koža ostarneje i trieba je se riješiti. Poviem vam kak su te negda delale babe, negda tak napravim i ja još denes, a vi če očete probajte. Tuj nema nikakve stranjske kerifieke, jeftine je, a i koristi. Gda ste pri cajtu, h jednu šaljičičku trieba deti veljiku žljicu koruzne melje i malje vode. Melja i voda se zmiešaju, alji vode mora biti tuljike kaj nie prerietke. Tak namočena melja se nameče po cieljem ljicu. Treba se paziti da ne zajde h nosnice ilji oči, jer bi moglje peči. Na ljica je tak duge dok se na pol posuši. Unda se ta koruzna melja rulji po ljica. Z nju se bu strusila stara koža i ljica buju glatka. Ljica trieba potem dobre se oprati z mlačnu vodu, alji tuj nie kraj našuga rihtanja.

Potere se jedne jajce i odvoji se žutanjek od beljanjka. H žutanjek se dene zerica kvasa i dobre zmieša. Tak zbučkanem jajcem i kvasem namaže se ljice, same ne po očja i čuba. Ostavi se na ljica tak duge dok se ne posuši, a unda se spere. Od beljanjka se stuče snieg i hu njega se dene zerica meda. Unda se i te dene na ljice i počaka da se posuši. Poklje kaj se spere z ljica, ljica buju čista, glatka i postarinski porihtana. Nema straha od sakojačke otrove. Gda imete cajta probajte, alji najte otprieti vrate kaj nej poštar ilji gdoj drugi opal h nesvest gda vas na vrata spazi naljičkanu z žutanjki.