Sakomu je dobre znane da se kotač življenja nemre rikvercierati. Čovek furt grunta i grunta kak bi mu bilje ljepše i lježe živeti. Negda baš i ljepše i lježe nejdu pod ruku. Gda je življenje ljiepe teške je reče, e unda gda je teške ilji gda se ide glat. I kak su cajti prebrundalji napre hu veljikem galopu čovek jemlje nove šege, nove pajdaše i kajčesa novuga. Negda se one kaj je bilje prie oče pozabiti, nekak kak da se radi toga malje oče i posramiti. Nie sem bila jemput h priljike kaj su kre mene zafrknulji z nosem ilji obrnulji glavu, gda sem po svojem domačem jeziku poviedala o pošljiekanomu ilji pošriekanomu bažulju, o kvočke tera je z piščenci bila pod komljinem če su se čučeki zvaljalji gda su još vanje bile srieži. Bilje jih je sram onuga, kaj je bil diel i njihovuga življenja.

Prešlji su cajti gde se saka droptinica kruha, beljinka sada ilji skosek hitila h cienjak, kaj bi svinjski obrok bil bolši. Prešlji su cajti gda je žatrka puna mljika z pienu bielu kaj snieg bila veselje pri hiže. Gda bi mati prešla štalski prag deca bi z lončeki čakalji mljekece i nadušak spilji kaj bi njim natočila. Retke se gde čuje ropanje redaljka, h ruka bab, teri snubi vrnje da se ščem prie ščučuri h žuti putrek, a stepki napojiju nadrobljeni hruh. Malje teri mlajši muž zna sklepati kosu i srp, a pas mu ne cinfra brus zateknjen h vudier od drieva ilji krafskuga ilji voluofskuga roga.

Kaj znači napraviti prviesle i štrihati žitek, denes, je malje teromu dobre znane. Ipak te je diel naše cajte teri su prešlji. Retke doj denes diela škedenj, a dvorišče ne cinfraju kopiči slame siena, koruznice i kope. Nede Bog da se ponoviju i da se ljudi tak mučiju kak negda. Makar, one življenje imelje je svoju ljepotu i ljudi su stiha, bez žurbe delalji saki svoj posle. Kak nestajeju z našega življenja hnogi poslji i hnoge šege tak se i pred naletavanjem sega novuga, a denes i fejst stranjskuga, počela gubiti domača rieč. Mladi denes, če su furt h nekakve žurbe, ne znaju da njim se žete žuri. Grde je te kaj denes mlad pune hmenjikuju, a pune toga njim se i viežđa. Čudiju se hnogi gda prečitaju one kaj napišem kak teške razmeju. Te je same radi toga gda su poljehku nače domače rieči i šege hitilji h zapeček, a z novi se gizdaju.

Ipak, pravi Zagorci i Zagorke ne daju da se naše šege i rieči pozabiju. Zmisljiju se na nje, a da nej pozabilji i da bi te ostalje za one teri buju došlji, prec toga i zapišeju. Kak denes moderni sviet ima malje sluha za one kaj je bilje prie i ak nie reklji bi denes „in“, skupljene i zapisane bi moglje ostati same h nečevem ormaru. I baš sem se nekteri dan histe vrieme razveseljila, a unda još več rastužila gda sem čula priču jednuga bračnuga para, z naše kraje, obitelji Vranić, Zlate i Stanka.

Njih je putec življenja odnesel po cielje bifše države, alji kak ljubitelji domače šegi i rieči, nigdar niesu pozabilji. Da bi zmišljavalji i druge, tie je gospon več od četrdeset ljiet skupljal domače šege i rieči. Skupil je on hu tem cajtu šesnaest hiljade rieči i zapisal. Kaj bi te moglji rebiti i drugi štel je da se takef jeden veljiki i vrijedni riečnik domačega kajkafskog jezika odštampa. Kucal je ona na hnoge vrate, hodil kre onie za tere je misljil da mu bi moglji pomoči. Pravuga odgovora nigdar nie dobil. Morti same poruček da se strpi i da čaka. A ljiete dielaju svoje. Prec jih je on i njegva životna pratilja del na pleče. Štel bi h svoja ruka imeti plod svojuga četrdesetljietnuga rada. Malje je čudne njemu i mene, kak nemaju sluha za tak nekaj bar onie teri se busaju kak buj kajkafski postal jezik, a ne nariečje.

Morti se čaka da bu riečnik naše domače rieči napisal nešče gdoj bu došel prek brega, iste tak kak me tie isti, prek brega, očeju nafčiti kakef je žmah domačega kuhila. Ipak, nadam se da bu gospon Vranić konačne pokucal na prava vraca i da bu njegef riečnik došel na videlje.