Po gdoj zna kuljike put mi je drage kaj niesem odlučila živeti h gradu. H cajtu gda si čovek grunta gde bi rad napravil svoje gnjiezde niesem se baš preveč nečkala da te bu Zagorje. Moja mati mi je znala reči da te nie dobre, da se na selu navike bolje muči.

Gruntala si je ona da je h gradu pune bolje, da se poklje posla hitiju se četiri h zraka i počiva. Ak živiš na selu posel te tira i slabe je počinka. Nu bilje kak bilje ni do dien denes mi nie žal kaj sem korenje postila na dedovine. Gdoj bi mi moglel h gradu dati takve ljiepe domače duhe i mrmranje. Baš sem si tak gruntala gda me sake jutre budi žvrgljanje tičeke. Kaj po moja driva kaj po susedovem starem sadju čuje se tičji spominek. Pripoviedaju tičeki jedni drugem h svoje gnjezdeca. I znam da je sakem od gnjezdeca zdej, hu ovem cajtu jajčekof na tera se sedi kaj bi se zvaljalji mladi.

Ljudem moje dobi dosta je da mu mislel dojde na nekaj, a unda mam imaš za gruntanje par vur i ciele dane. Moje gruntanje rane h jutre na postelje još dok se sunčeke sramežljive zvlačile tam negde za bregem krenulje je prema jajčekem. Malje tere detece denes zna kaj je negda jedne jajce, a pogotove več njih značilje za familjiju. Ne gruntam o onem večitem pitanju e je prie bilje jajce ilji kokoš. Te me nigdar preveč nie mučilje. Gruntam si kak denes mladi znaju same da se jajčeke more pojesti spečene na oke, kajganu kak veljiju, da se od njih dielaju palačinke, kolači i te je te. Za nas negda jajčeke i od tičeke bile su fejst važne. Znalji sme se pentrati po sadju gde su bila gnjizda divlje golube i raduvalji se gda sme našlji dva jajčeka. Znalji sme da se bu nekaj zvaljalje, a mladi golubi bilji su fini na paprikašu z nudljeki. Srake i vrane bile su zločesti tičeki.Njihove jajce su ljudi z gnjizda hitalji kaj bi jih bilje menje jer su po dvorišča h hipu i hletu pocuknule mlade živinče i ž njim odlete h svoje gnjiezde. Nu če bi se stiglji zvaljati mladi srakiči i vranice i nje je bilje fine za pojesti na saftek.

Kokošine pak jace bile su pri hiže se. Ž njimi se trguvalje, jelji su se, a iste tak metale pod kvočku kaj bi se zvaljalji mladi. Baš hu ovem cajtu po dvorišču su kvocale kvočke, a babe pribirale najljepše jajce za nasad. Od vajkada je se do nove cajte, življenje h selu počelje z kukurikanjem kokota. On je budil svoju branžu, a i i svoje gazde. Bil je te pozif za gazdericu da se trieba zdiči. Kak je kokotof pozif bil glasni najprie se išlje prema kočaku z živinu. Babe bi pustile kokota, a saku kokoš priele i ogledale.

Denes bi mladi hitilji z sebe se črieve od riganja gda bi vidlji kak se ogledaju kokoši. Saka ženjska je svoj kažiprst diela kokoši h pišek i tak vidla e bu znesla jajce. Dobre se čez dan pazilje e je tuljike jajec na gnjiezdu kuljike je hjutre pri ogledanju gazderica napetala. Če je tere jajce faljelje unda je triebalje iti h potragu za gnjiezdem. Kokoši su bile vragometne i mienjale gnjiezda. Tak su se znale znesti pod sterhu ilji kopičem gde je bilje malje teže dojti do jajca.

Moja mati me znala pošiljati iskat nove gnjiezdi i jajec. Imele sme dogovor. Če sem našla nove gnjiezde unda mi je dala jajce-dva kaj sem ž njimi išla h štacun. Tam su se jajce prodale i za te se dobilje penezi i  mam se i h štacunu potrošilji. Gda mi je mati dala da si same zeberem jajce za štacun, zebrala sem si najdepše. H štacunu je trgovec imel jeden okvir čez tere je jace puščal. Najdepši niesu prešlji čez okvir i za nje se dobilje več penez, a unda i več cukara ilji kieksi. Babe su tak gospodaru popravljale z prodaju kokošine jajec. One jajce tere su preostale mogle su se pojesti za froštukelj ilji večeru.

Kak je družine bilje dosta, a jace za „potepu“ilji jelje menje, retke gde bi se jelje jajce na oke ilji same stenfane. Zmiešalje se jajce z beručku- dvie koruzne melje, trajbalje se z mljikem i unda speklje na masti z čvrčki kaj bi toga bilje več. K tomu još šalate z podljevem i „košta za bogove“ reklji bi ljudi. Guskine, puranjske i racine jajce retke gde bi se jele. One su se spravljale za nasad i mienjale po selu ak je bilje trieba ilji dale dobre pajdašice, kumice ilji kakvomu rodu.

Ta živina je nesla same na prtuljet, tuj i tam kesniejše i menje jajec od kokoši pak su se nasajele gda jih je bilje. Nasajena živina na prtuljet zvala se prtuljetna, a ona tera se zvaljala kraju ljeta, pozna. Imeti jajec negda, značilje je da bu bolja košta, mlade živine i penez.