Nekteri sem se dan čutila baš onak kak roda ilji ljesica z jedne stare priče. Kak nekteri hitiju se kaj se one negdašnje cajte dotikava, malje jih bum zmisljila jer su sigurne pozabiljina onu priču tera je bila h naša čitanka. Na kratke ju bum i spripoviedala i radi onie teri su za nju nie imelji priljike čujti.
 
Ljesica i roda bile su veljike pajdašice. Jednuga dana ljesica je pozvala pajdašicu k sebe na obed. Na veljiki tenier dila je kuhanu kašu. Još ju je po tenieru rezljičila kaj bi se prie resladila. Sirotna roda hodila je oko teneira, alji nič nie mogla hloviti. Ljesica ju je nudila i nudila i sama ljizala se dok tenier nie bil prazni. Sita, sela si je na stoljec i same gladila po trbuhu i govorila: „Baš sme se site najele!“
„Je“, gruntala je hu sebe roda. „Ti si se morti i najiela, alji ja sem ostala praznuga želuca.“

Srdita, roda je pozvala ljesicu k sebe na obrok. Ona je pak skuhala krumpier i diela ga h jednu visoku posudu z vuskem vratem. Gda je došla ljesica h goste roda je pukala z kljunem krumpier i furt nudila ljesičku. Ljesička je hodila oko lonca i nie mogla do krumpiera. Mudrila se roda hu sebe kak je nadmudrila ljesičku,kak je ona prie nju. Nie teške zaključiti, da je pajdašije rode i ljesice došel kraj.

Nu moje pajdašice i mene radi košte sigurne nebu konec. Ona je mene pozvala k sebe z najbolju nameru. Rekla je da mi bu spravila nekakef domači i i fini „specijaljitet“. Dok sem išla k njoj  gruntala sem kaj bi te moglje biti. Domače. Fine, i još k tomu „specijaljitet“.
Bila sem sigurna da bu napravila sir z vrnjem, kakvu kobasičku ilji suhu šunkicu, štruklje,…. .

I dok sem tak gruntala, več sem bila pajdašice na pragu. Kratki spominek i na stol je frknula „košta“. Niesem mam mogla znati kaj te je za koštu. Vidla sem same da su te pečene stenfane jajce z nečem zelenem. Nie valjda same te na kaj me je pozvala gruntala sem.
„Kaj ti te je?“
„Te ti je naša zagorska šparoga ilji bljušt. Kak ti je te fine. Te ti je naš specijaljitet…,fine, zdrave… . fine, fine, fine!“
„Znaš kaj. Daj zamuči. Pa kaj mi kažeš mesec h vode“, rekla sem je.
„Od gda te je naš specijaljitet? Od gda sme te mi doma jelji. Daj naj bedastuvati….“

Niesem se štiela ž nju preveč svaditi jer mi je draga pajdašica. Elji kak da je h pehnula h osinjak gda je mene zašla vučit kaj je domača košta. Nemam ja nič ni protif šparuge, niti protif bljušča ilji kuke niti protif sakojačke jiestvic. Ja sem protif toga da mi nešče nekaj „luckuga“ proda pod domače. Domaći gušti i žmahi su domači.

Rekla sem je da ak je več štiela napraviti nekaj domačega z jajci unda je mogla nakosati lucičinuga perja, malje zdinstati i na njega pahnuti par stenfane jajec. Če se još nutre dene kakef čvrček ilji sitne kosani špekec, žmah i duha su da si prste poljižeš. Ne srdim se na svoju pajdašicu jer nie misljila z svoju koštu nič grde. Malje mi je negda krive gda mi Zagorci navike misljime da je nekaj luckuga bolše i vredneše. Morame se boriti za naše domače ljepote i za naše domače žmahe. Nie da niesu fine i zdrave šparuge, bljušti i kaj česa druguga, alji one niesu bile diel naše košte. Mi drugem triebame riveati one kaj je naše.

Zdej sme h cajtu gda cviete gacija, a po cajtu bu precviela i biezga. Negda su naše mame i babice delale koštu od njih. Napravil se kal, od jajca mljieka i glatke melje. Te je tieste sljične kak i za palačinke same gusteše. Hu tie kal smakalji su se cveteki gacije ilji bezge i metalji na vruču mast kak da se pohaju. Z jedne i druge strani se zežariju.Tak pečeni moreju se jesti sami ilji k tomu napraviti šalatu z podljevem ilji same z octem i voljem. Podljef se pak napravil tak da se žljička čvčkece, malje masti, octa i vode delje kipet.

Gda se mast restaljila, čvčki omekšalji poljejalji su se po šalate.Te je prava domača košta, duha i žmah. Znam da hnogem ne paše, jer su želuce i nose nafčilji puniti z lucku duhu i žamahem. Ja sem ipak i dalje za naše stare šnjofe i žmahe z teremi se rada gizdam.