Več put si ovak gruntam o kaj česamu kaj su me vučilji moji vučitelji. Pri gruntanju mudrujem kaj sem se rada školje vučila i kaj mi je išlje ljehke, a kaj mi se pak nie vučilje. Niesem baš rada vučila hrvatskesrpski jezik, jer sem furt fuljala. E se pisalje, e se spominalje na kraju bi šlopila nekteru domaču, zagorsku, i mam mi je te bil veeeeeljiki minus.

Niesm rada imiela ni stranjski jezik. Gda šepaš h svojem kak bi luckuga rada imela. Vučila sem se onuljike kuljike sem morala. A se one druge predmete sem se vučila kaj bedasti. Nie unda bilje sakojačke moderne mašinki kaj bi nekaj doznala od njih. Nie bilje ni moči dojti do sakojačke knjigic. Največ sem mogla nafčiti od svoje vučitelje. Lukala sem hu nje kaj h Boga.

I den dense hnogem faljim kaj su mi bilji obloki z teremi sem lukala h Sviet i ruke tere su mi kazale putec po terem triebam hoditi. Jahke sem rada imiela svoju vučiteljicu Silvu, tera mi je imiela poviest. Kaj je ta znala „odgumiti“ na satu. Same fejst bedasti ju niesu razmelji ilji pak oni teri su h školu hodilji same radi toga kaj nej bilji doma i išlji z blagem na pašu. Zmisljim se, i još den denes vidim nju, gda nam je poviedala kak su odseklji glavu našem Zrinskomu i Frankopanu. Zdigla je na glave svoje lasi i diela glavu na stol. Rekla nam je kak su unda i oni tak delji glave na pienj kaj su njim odsekalji. Poklje kaj nam je te pokazala išle su je i suze na oči. Pak gdoj si te unda nej zapamtil i nafčil. Unda nam je pak poviedala kak su h jednem cajtu življenja ljudi lovilji ljude, imelji za robe i prodavalji na sieme kaj mi unda blage. Gda je te poviedala bila je fejst žalosna.

Iste tak, gda je poviedala da su ljudi delalji ciele dane za šakicu hrane, a kre toga još bilji i bijeni i nam nie baš bilje se jedne. E unda je poviedala i kak su po fabrika, rudnike i po polju delalji od jutra do mraka ne same muži nek babe i deca. Pitala nas je kak bi nam bilje da sme h rudniku nakladalji vugljen na vagune ilji da sme po fabrika vozilji koljica, od jutra do zutra. A za posel teri bi delalji dobilji kakef krejcer z terem nej moglji kupiti štrucu kruha. Trpelji su muži, babe, a i dieca jeden duuuugi cajt takve tlake. Unda njim se h glave vužgala svečica i počelji su se buniti. Počelji su štrajkati i iskati svoja prava. Največ su se pobunilji jednuka prvuga svibnja,1886.ljeta. Pune jih je bilje potučene i baš radi toga se 1. svibenj ilji kak se još velji 1. maj slavi kak praznik rada.

Od toga ljeta malje po malje išlji su bolji cajti za radnike. Babe več niesu delale za menjšu plaču od plače muže. Mala deca več niesu smela delati. Nafčila nas je vučiteljica da su radniki došlji na svoje. I jeden cajt je se nekak išlje ljipe. Fieštalje se za radnički praznik. Znalje se h šalje reči ovak: „Živio 1. maj, par sme dane fraj!“ Raduvalji su se tomu svetku i onie teri su išlji po izlete, fieštalji, alji borme i onie teri su fraj cajte trošilji na njiva kaj su sejalji koruzu. Nie njim bilje žal kaj su od jutra do mraka bilji h oratve, kopanju i sejatve. Delalji su na svojem gruntu za svoju familjiju. Če i trudni poklje praznikuvanja raduvalji su se poslu h fabrike, h rudniku ilji gde su več delalji. Na praznik prvi maj nie dielala ni jedna fabrika, ni jeden štacun.

Držalje se nekaj do seljaka i radnike se felje. Denes ni neznaš da je radnički praznik. Istina i bog se je radnikof  menje, pak tak i praznuvanja. Štacuni dielaju kak i saki dan. Si se pitaju kam ide mladi sviet kaj se tak ponaša, tuče, bedaste vozi, čika i pije kaj česa. Nišče se ne pita da je malje cajte tere starci moreju biti z svoju dečurljiju i dati njim navuk. A gda se potrefi saki nekteri tjeden da dan dva buju skupa unda su starci tak trudni da njim nie volja ni zinuti. Muži i babe dojdu z posla scejeni kaj ljimuna. Nišče jih ne špara. Pak sem se unda zmisljila svoje vučiteljice z poviesti tera nas je vučila kak je negda radnikem bilje žmehke.

Ni denes nič bolje nek je bilje hu onem cajtu o terem nam je ona pripoviedala. I mene pri srcu bolji gda po štacune teri dielaju h svetek i petek muži i babe tere dielaju na kase stojiju. Pitala sem jih pa kaj si malje ne sedneju. H nektere nemaju ni stolce, a one tere imeju kakti moraju reči da njim se ne sedi. Malje gdoj mislji da je te nečof otec ilji mati i da bi mu moralje ostati poklje posla bar malje snage za hincanje. A sigurne nebu ni za ovie svetek hincanja z familjiju jer bu po one nove: „Živo 1. maj, nič nete fraj!“