H želuce nam još kipi kaj česa, kaj sme hu sebe narievalji čez ove svetke.Stara je navada če se čez ljete nema, trieba šparati za veljike svetke i unda bar imeti sega dosta, več put i prveč. Ljudi si gruntaju po one stare da kak bu na Nove ljete tak bu i cielje ljete. Bilje bi te ljiepe gda bi tak i biljei. Nu življenje je drugač postavljene i nie navike onak kak si baš zamisljime. Hu semu tomu sme si i malje sami krivi, gda očeme hloviti mesec, a plazime po zemlje.

Več put si misljime hu sebe za kaj nej moglji nekaj delati ilji imeti mi, če nešče drugi ima. Unda gda mi nekaj nej imelji diela nas žalosne. Ljudi denes nektere posle dielaju več radi druge nek radi sebe. Gruntaju si hu sebe če nekaj ne napraviju kaj je „nobl“, ni sami nebuju tak. Si bi štelji da njim je življenje ljipe i za oke ga cinfraju, a z nutrič je po one: „Z van juj, a z nutre fuj!“

Takve me življnje zmislji na cajt gda sem jeput bila na teljevizije, gda sme nekaj snimalji. Lučeči od doma se je zgledalje ljiepe, svetljiče, cinfraste i čoveku za oke tak kaj bi štel živeti tak furt. Nu gda sem bila baš tam gde se se spravljalje, kaj bi drugi lukalji, zgledalje je drugač. Sedelje se na fosljine podprte z ciepanicami, prekrite z krpljinjem. Pod noge je puhalje kaj sam vrabec, a zidi zguljeni kaj da su se kre njega igrala zločesta deca. Bilje mi je dosta toga svetljiejčuga svieta i več mi nie došlje na pomet da o njemu „senjam“.

Od unda si nekak misljim, da semu preveč ljiepomu, svetljiečemu i na zgled svietliečemu nie trieba preveč veruvati.A baš se denes ljudi očeju oko toga narevavati i željeti si baš življenje tere je teške doseči.

Zgubilje se življenje tere je bilje z stiha, z mirem, z veseljem... Kak da je nešče življenje po mere čoveka, gde je največe bogatstve sreča ljudi, otiral. Ljudi su se pozabilji od srca smejati, raduvati i ne biti rob krpljinju i punomu gertašljin. Morti je takve življenje radi toga kaj su ljudi z hiž „stiralji“ ilji ne donašaju k hiža one kaj je negda ljudem pririhtavalje mir, pobožnost, veruvanje i poštivanje.

Svetek, Bogojavljanje i Sv. Tri Kralja, šestuga siečnja je svetek gda se išlje h cirkvu po frišku svetu vodu. Sveta voda je morala biti pri sake hiže. Pospravljena je bila na meste gde je saki hižni h sakem cajtu mogel do nje. H njenje bljizine ljudi si pazilji kak se ponašaju. Gda se je z blagoslova donesla dima, ž nju se poškropila ljesa, dvorišče, saki prielaz h plotu če je bil, kaj nej kakef kumer ili vuročni čovek mogel navuditi gospodare. Z svetu vodu se unda

poškropilje štalske stanje, blage i sa živina. Poškropile su se hižne vrace, hiža i saki hižni. Če je doj bil betežni čak mu se dalje da malje gucne, kaj bi lježe otrpel beteg teri ga je mučil. Sveta voda se rabila čez ljete gda je doj rodil, gda je gdoj bil na hmrielu i gda je hmrl. Gda je čer odhajala od hiže zamuža i gda se sin otpravljal po mladienjku starci su z svetu vodu blagoslavljalji svoju decu na tomu životnomu putu. Takaj, gda se negda po hiža hodil gled mrtviec teri je doma ležal na skolka, saki gdoj je došel poškropil ga je z svetu vodu. Te je bilje zajdnje pozdravljanje i kak faljenje na skupne življenje.

Svetu vodu se poškropil i onie teromu se malje pošemerilje h glave. Reklje se da je nekam na neke „nadošel“. Misljilje se pri tomu da je nešče nekomu postavil coper i da se unda došle na te i coper ilji vuroke pobralje na sebe. Radi toga su dečki, gda su hodilji h večerke oko puc, pogotove ak su hodilji h druge sele ilji prek vode, potoka ilji črnca, posebe poskrivečki hitilji svete vode, kaj jih nej zapozašle coprnice.

Denes se do stare šege slabe drži i porajta. Kak nas poklje svetlječe, bljščeče i cinfraste cajte čakaju sakak gorši, a i črni, dobre bi bilje posegnuti za staremi šegami. Jedna od njih je i rabljenje svete vodice. Morti bi unda bil veči mir pri hiža. Morti bi babe rejše imele svoje muže i obrnjene. Morti bi se h hiže, gde na stalaža stoji flašičička z svetu vodu vrnul, mir, radost i blagostanje.