...Pušile se brazde
zaorane zemlje masne,
veselje su titrale
na zoranu njivu,oči gazde
Hrzalji su konji
dok zob su zobalji
mahalji z repem
gda su z kante vodu pilji.
Orataj i gonič
na kola su sedelji
sulj z košare slasne jelji.
Spiralji si z vinem suhe gute
nazdravljalji gazderice
na dobre košte.
Počinulji se konji i orataji
i poljehku dalje krenulji,
još Krčine triebalje je zorati
i prie mraka dima dojti...

Stara je te moja pesma teru sem negda napisala za svojuga teca Karljina. Pri njemu sem navieke, gda bi mu vodila konje, zaslužila jahanje na konju. Znal je h šalje reči gda je držal za plug i mene kričal: „k sebe“ ilji „od sebe“, da bum ja kriva če brazde neju ravne složene kaj knjiga. Veljika je ljubaf bila čoveka prema zemlje, prema zaorane, nakosane i povlačene brazde. Ljiepe obrjena njiva, zapravljena i zdignjena na glavica, dala je navestiti dobru i plodnu ljetinu. Najteži i prvi posel sakak je bila oratva, a do orača, konje i volje posebne se držalje i preštimavalje h selu. Za dan gda je pri hiže bila oratva si su se moralji dobre pririhtati. Pri komu se oralje, moral je za konje priredi najbolšu krmu teru je nesel na njivu gde bi konji jelji dok si bi orataj počival. Moralje se za konje prirediti i zobi kaj su si konji zobalji i skupljalji snagu za teške dele tere jih je čakalje. Ni gazdarica nie imiela ruke h žepu. I ona je morala pririhtati finu koštu. Orataj teri teri je oral, a pri hiže ne bi žljicu jel i dobil komad mesa za obrok, delal bi z te gazdarice špot po selu. Drugi put bi se takva hiža načakala orataja. Gde je bila bolja košta tuj su orataji z svojemi konji rejše išlji. Ne same za oratvu nek i furt, za konje bez tere nie bilje dielanja na zemlje moralje se voditi prigu. Hjutre rane, prie nek bi konji išlji na oratvu, još štalje, moralji su dobiti jesti, zobati i piti. Namireni su išlji na njivu i same tak su, skup z gazdu moglji obdelati njive. Konj kak živinče bil je i ostal jahke hakljik pri posude z tere su pilji vodu. Zate je na kola skup z plugem, kolcima, vunjgieri i otku morala biti kanta z tere bi čez dan pilji vodu.

Orataja z konji denes je več teške videti. Zamenile su je veljike mašine, traktori. I z traktori, kak negda z konji, trieba dobre znati vudieriti. Jedni su bolji orači, a drugi lošeši. A teri je bolji pri nas, h Ljiepe naše, več par ljiet se orataji med sobu hganjaju. Čieva bu brazda ljepša, tere su skup bolje prisložene odlučuju ljudi teri se hu te razmeju. Kaj z ljinierem potegnjene brazde moči je bilje videti prošlu subotu pri nas. Skupilji su se pravi muži, orataji i gazdi ze sie kraje i pokazalji gdoj je najbolši. Skupilji su se pri nas radi toga kaj je lani h oratve bil najbolši naš domači muž, Tomek Kuharič. I ljetes mu nie zadrhtala ruka. Pisal je po zemljice kak z perem, a njegve brazde bile su složene kaj ljisti h knjige. Duha domače košte, pesma i mužika miešala se ovu subotu z brbotanje traktore na njive. Šteta je kaj takva jedna ljiepa sljika nie prenešena več na naše obloke z terem lučeme h sviet. Kak i bi, gda se se kamere več vrtiju oko golje riti i krpic do tere se več drži nek do zaorane brazde tere značiju, život, radost i blagostanje.