Duha mošta, h brienjke pri kljiti, kak da mi je po možđena počela šarati sljike dišeče jeseni mojuga detinjstva. Poglancana trsja, njive i vuljice h tere sem pri tomu lukala kak da su nekteri novi sviet po terem hodiju ljudi. Nišče skore ne pozna sljike zacajhane h glava moje jargane. Jesen, doba h ljetu gda su se negda si pririhtavalji kak k nekakve mirnoče, počinku i uživanju hu tem kaj su čez ljete prigospodarilje ilji pririhtalji.

Denes, naiven bi misljil da poklje jesenske žurbe bude mir i da se ljudi buju malje otpočinulji. Nu nie tak. Denes, h teru god dobu da ljudi živiju strka i zbrka ne prestaje. Cajti, dišeče, mirne i drugčieše jeseni skore da su pozabljenje. Pusti su selki puti po tera je negda još h miegle išlje lačne blage h polje. Stiha i mirne išle su kravice h polje na pašu, a pred gupci su bilji veljiki oblaki topluga zraka teri njim je z nosnica išel van kaj z rafunga dim. Obljiečeni h toplješu, pokrpanu i staru obljeku, ž njimi su išlji pastiri teri su se med sobu spominalji na koji kraj polja peju na pašu. Bilji su te cajti raja za pastire jer se blage moglje širem pasti.

H polju med traniki bilje je rietke posijani žitek pak blage nie moglje iti h kvar. Čuvalje se blage same od lakotne gospodare terem nie bilje dosta kaj su pokosilji i posušilji siene i otavu nek su još gajilji otavič. Takvi lakotnjaki, kak sme je mi h selu znalji zvati, delji su mam pokljke druge košnje na tranik „zastave“. Zastave su bile šibe, h sredi oguljene i malje zariezane. Čez tie rezriezani diel prevljekla se mala tienjka obieljena, pedenj veljika šiba, pak je zastava zgledala kaj križ. Na čivem je traniku tak nekaj bilje postavljene nie se smelje pasti. Pastiri su negda zelji zastave i hitilji jih, a po tranike su paslji. Poklje gda bi gazda došel h polje gled e je otavič zrasel, bilje je prekesne jer je več blage se popaslje. Gda je luknulje jesnjske sunčeke kre njivi su bile pristavljene kole h tere su ljudi bralji koruzu. Onie siromašnieši bralji su koruzu na kupčeke na zemlju i čakalji foru da njim dojde pripeljati potrganu koruzu k domu. Koruza se sklala fižu, a unda se h večer išlje lupit. Zvonile su hiže od spomenke i smieha ljudi. Ruke su bile fljejsik h poslu, alji i jeziki niesu hmenjikuvalji. Saki je imel nekaj za povedati. Babe su lupile, a muži bi vezalji koruzu h visage i nosilji na najže ilji slagalji pod strehu. Kraj lupitve si su jedva dočakalji kaj su se malje pohincalji.

Največ hinacanja bilje je med mlademi teri su tobož opadalji h „zdenec“, a unda ga je onie gdoj ga je imel rad spukaval zdenca van. Zdenec je bil veljiki kup perinja na sredine hiže gde se lupilje. Saki gdoj je bil zvljiečen z zdenca, moral je kušnuti onuga teri mu je pomogel ziti van. Poskriveči su se mladi još stiglji požugljati ilji ščeknuti kaj nej tere babske oke te zamietilje, a unda su loši glasi mam krenulji po sela. Poklje šegi i hincanja, perinje se znosilje van h dvorišče ilji nekam bljizu na njivu. Gda je drugi dan luknulje sunce perinje se resteplje i tak se par dane pretepalje, kupčaljie i sušilje. Suhe perinje pospravilje se nekam pod strehu kaj se je još dosušilje, a unda se poklje toga napravil od nejga friški strožek. Senjaki i pelnice dišale su po obranem sadju tere se ostavilje tuj da dozori i odmekne. Prie zime donašalje se fižu ilji se zakapalje h kopu skup z kumpierem ilji riepu. Gda se hlovilje cajta, babe su z decu hodile hustu, z prutnemi košeki na pleča, po ljestinu blagu za štraju. Gnjojnjiki su se pušilji i dišalji po šljivaše tere bi ljudi zljejalji poklje kaj su skuhalji rakijice. Dvorišča su bila pocinfrana z bučami sake felje. Veljike buče z van kupa, kak da su štele dati poruček za onuga gdoj je išel po putu kre hiže kak ide kre dvorišča dobruga gazde.

A tam negde, h dvorišču, za štalu gizdave kak soldati stalji su kopiči slame i frišle koruznice, pod teremi su se skrivale kokoši i delale svoja gnjizda h tera su čuvale jajce dok ih mudra gazderica ne bi našla. Z puščanjem mraka spuščala bi se megla i prijela sela i polja h svoja biela nadra, tera su senek grelji toplji rafungi. Od toga ostala je još same megla tera hladi jer su rafungi več dugi cajt hgašnjeni.