Mislim nisam postal tata. To sam več više od 13 ljet. Ali rodila se trejta curica. Još dosta prije smo pitali dr. Fureša e morem ja biti s ženom kad bu rađala. On je rekel da u principu se to more, ali da se furt nekaj zna zakomplicirati. Za svaki slučaj sam na cesti hlovil i ravnatelja bolnice dr. Bagija i pital ga isto to, a on mi je odgovoril da je za to nadležan odobriti jedino dežurni ginekolog. Jer da nemrem biti h rađaoni ak ima više žena unutra. Da je to malo nezgodno. A nezgodno je zato jer su svi kreveti h istoj prostoriji koja nema nikakve pregrade između kreveta. To je kaj da ste h tvorničkoj hali, a kreveti da su tekuća vrpca. I ginekolog ide od jednog do drugog i smo vadi decu van. No dobro, tak je kaj je. Če bum imal sreče morti baš onda kad bu moja žena trebala roditi nebu nikog drugo u rađaoni.

Sad samo čekamo. Tjedan dana prije termina ostavi nju dr. Fureš u bolnici da bi mogla ona roditi. Namazali oni nju s nekakvim gelom unutra jer da taj gel kad se namaže onda se to unutra kod žena otvara. Međutim kod moje se nije otvorilo nič. Negdje hjutro na staro ljeto dojdem ja kad je još bila vizita i pitam da kaj je. Niti je ženi termin, niti se ne otvara, niti nema trudova, pa kaj bu onda delala h bolnici? Naprave oni njoj još jednu rundu cetegea, pregleda ovakvih i onakvih i puste ju doma. Dan prije termina ide žena opet na cetege. Čekam ja nju, čekam… čekam. Nakon dobre dvije vure, evo nje van sve zaplakane. Pa kaj je? Ostavili me buju tu - veli ona meni. Veli da su joj uz cetege delali i amnioskopiju (valjda sam to dobro napisal) i da je dr. Šimić (ne onaj kojega je USKOK hapsil kak prijemlje peneze) rekel da ostaje u rodilištu. Kak smo na to bili spremni tak je i kofer s njezinim stvarima h autu bil spreman. Donesem joj ga i prejdem doma. Pitaju deca da gdje je mama, a ja im velim da je ostala h rodilištu, a one sve sretne jer to znači da bu taki i seka došla.

Nazove me žena negdje iza pol noći da ju premještaju u rađaonu i da iz nje nebu zišla van dok ne rodi. Oblječem se ja i pravac na Bračak. A kad tam sve zaključano. Nemreš nutra. Kaj sam sad? Već sam mislil da se čez ona staklena vrata z autom nutra zaletim kak se i onaj par dana prije na Markovom trgu z jugičem zaletel h Sabor. Žal mi je auta. Još buju i muriju zvali i rekli da sam terorist. Onda sam se zmislil da probam kroz hitnu nutra dojti. I zbilja pusti mene sestra s hitne unutra. Dojdem ja do rodilišta, pozvonim na vratima i evo sestre. Objasnim gdo sam i kaj hoču i da mi je žena tu unutra. I kak ja furt imam sreče tak žena nije bila sama u rađaoni. Znači nezgodno je i nemrem nutra. I još me na svu silu hočeju doma poslati. A ja se nisam dal.

Hodim ja po hodniku gore- dole, ljevo-desno. Zbrojil sam sve pločice na podu. Tak si bi bil zapušil, ali se nesme. Bi prešel van, ali nemrem kad je sve zaključano. I taj zdravstveni ministar. Mogel je i h čekaonicama rodilišta dati da se puši, a ne samo na psihijatriji. Već sam si mislil na prozoru zapušiti. Nigde nikoga, mrak, pa gdo bu me videl. Kad se najmput ustrčalo par ljudi sim-tam. Išli su iz operacionog djela na ginekologiju napraviti carski. E si bi na zahodu zapušil? Došlo već i jutro.

Negdje oko 6 dojde sestra do mene i veli da je sad žena ostala sama u rađaoni i da kad malo počistiju i pripremiju za mene kaj treba za oblječi da morem nutra. Napokon! I evo sestre opet za par minuta van, ali drži bebu h rukama. Evo gospon Benčić to je vaša beba. Malo sam si ju pogledal, poslikal, a u silnom uzbuđenju sam ju poslikal s mobitelom, a fotič mi je vesil na ramenu.

Znam kakvu imam familiju i prijatelje i mislil sam si da buju došli naštrajiti, pa sam se i na to priredil, iako sam bil tiho i pokušal prikriti kad se bu dete rodilo. Jemput sam uspel u tome. Si su me bili spitavali da kad bu, kad bu, a ja sam odgovaral da ima još vremena, sve dok im jemput nisam rekel da je žena rodila prije tjedan dana. Taj put je uspelo, a kaj sam sad?