Kak sam zmislil naslov za ovaj nastavak, zmislil sam se da mazanje nije samo ono mazanje koje mi je h tom trenutku bilo na pameti. Konkretno sam mislil na metanje kreme po djelovima tjela. To je našoj Graciji več neko vrijeme fest zanimljivo. H prvo vrijeme je pokušavala jesti kreme. Pa je po cajtu skužila čemu zapraf služiju. Si teri imaju malu decu ili su ih imeli znaju da ti ž njima treba puno kremi raznih. Morate imeti kremu za rit, kremu za lice, kremu če bebu nekaj nebi hpičilo, pa kremu če ipak bebu nekaj hpiči, pa za kremu protif osipa…

Mogel bi ja tak nabrajati, ali niti sam ne znam točno koja krema čemu služi. Znam s terom se maže rit kad treba pelenu zmeniti, a za se ostalo pitam ženu. E, i kad se Gracia dokopa neke od krema mam se krene ž nju mazati. Če nemre otprjeti kremu onda dojde do nekoga od nas i daje nam kremu da ju otpremo. Ak ne reagiramo na to onda pokaže na ruku ili nogu i objašnjava nam da ju boli i da ju treba namazati. I onda zemeš malo mlijeka za tijelo ili obične kreme i čim namažeš mam je se h redu. Postoji i varijanta da joj malo kreme deneš na ruku, pa ona to razmaže prvo z rukami i poslije se još po licu namaže. Trebala je Gracia of tjedan krenuti h vrtič. Ali nije. Jer nismo stigli sve zbaviti za lječničku svjedodžbu. Prije dok su ove stareše išle h vrtič nije se tolko toga iskalo. Da budem iskren niti se ne zmislim kaj se iskalo kak je to davno bilo. Drugi tjedan počne i škola, a ja sam na godišnjem. I ko za inat vidite i sami kakvo je vrijeme. S takvim vremenom su valjda samo ovi h ''metalcu'' (lokalni distributer plina) zadovoljni. Jer h utorak sam i grijanje vužgal kak je ženi i deci bilo zima.

Na početku sam spomenul mazanje. Sama riječ mazanje ima nekoliko značenja. Ste čuli negda da nešči veli: ''Jesmo ih namazali''? Sigurno da jeste. I kaj to znači? Znači da je neka ekipa u nekom sportu ''namazala'' odnosno pobjedila neku drugu. Isto tak znaju se muži hvaliti: ''Kak sam snočka onoga h gostioni namazal!'', misleč pritom kak je nalupal nekoga, to jest stukel nekoga. More se i pašteta na kruh namazati. Zapraf več duže vrijeme jako teško jer kruh kaj se more kupiti je tak mehki i šuplji da je prava umjetnost nekaj namazati na njega. Kad smo več pri hrani sigurno ste čuli da se nešči i pohvalil kak je za obed zmazal pet šeflji zelja s bažuljem i da zato prdi. Mažeju se i palačinke bilo s eurokremom ili s pekmezom. Morete i zid ili nekaj drugo namazati s farbom. To se pri nama zove malanje ili farbanje, zavisi kaj mažete s farbu. I političarima jako dobro ide mazanje. Mažeju nam oči prije izbora da bi glasali za njih, a kad dojdeju na vlast pak nam mažeju oči.

Evo, sad su ovi teri nisu na vlasti rekli kak bi oni šparali da su na vlasti i kak bi državu h red dopeljali. Prva stvar im je da bi nama tere država plača deli norme. Kak bi ja bil normiran? Po broju stranaka? I kaj sam če mi teri dan ne dojde dosta stranki na posel? Pem na cestu i za rukav ih vljekel naj dojdeju? Ili kak buju doktorima normirali posel? Buju rekli doktoru h bolnici da of mesec mora operirati 15 sljepih crijeva. A kaj če ih nebu tolko zvadil? Pe na kraju meseca ispred bolnice loviti ljude i na silu im vaditi sljepa crijeva? Lako još za ove kaj operiraju sljepa crijeva. Kaj je z onim doktorima teri presađivaju organe? I kaj če mu je norma 5 jetri presaditi na mesec? A presadil ih je samo 4. Jer nema više jetri za presađivanje. I za to postoji rješenje.

Pogleda se popis donora teri su se prijavili za to. I onda se jedan izabere i doktor s ekipom prejde k njemu. Pozvone donoru koji otvara vrata.

DOKTOR: Dobar dan. Jeste li vi taj i taj teri se upisal među donore organa?
DONOR: Dobar dan. Jesam, ja sam taj.
DOKTOR: Čujte, nama treba vaša jetra i mi smo došli po nju.
DONOR: Znate, pa ja sam mislil da se buju moji organi zeli kad bum hmrl.
DOKTOR: Bez brige. Kad vam zvadimo jetru več nebute živi.