Negda se znalo gdo je pri hiži gazda. Bar su naši stari tak mislili. Mislili su da su oni gazde. A nisu bili. Nisu ni denes. Pravi gazde pri hiži su deca. Niti ne moraju nič reči a ti se napraviš da njim bude ljepo. Tak smo i mi of tjedan rihtali prostor za Graciu. Kak se več na noge zdiže, a puzi več neko vrijeme skužili smo da joj treba prostora. A največ prostora je na podu. Kak smo prije dosta ljet hitili van se tepihe i novi laminat postavili, tak pod nije baš pogodan da se dete igra. Pa smo vrnuli dječji tepih, ali h dnevnu sobu. Jer pri deci h sobi nije mesta da bi se Gracia mogla igrati. A i ove dvije su stareše i ideju h školu. I teško bi se njih dvije vučile dok se ova igra. Zato je to h dnevnoj sobi. Neopisivo tepih s cestama, hižama, potokima, barama,… paše h dnevnu sobu. Ali kak sam na početku napisal zna se gdo je pri hiži gazda.

Znam da sam več nekima dosadan ali moram se male još spomenuti knjig za školu. To kaj su skuplješe neg kaj su bile prije tri ljete se još nekak i zbavi. Ali da h te tri ljete nišči nije mogel greške h knjigama ispraviti nemrem verovati. Takve stvari z kojih se deca vučiju bi trebalo ak treba i sto put spregledati prije neg kaj se ideju štampati. A ne da h slovarici ima slika eskima pod neznam kojim slovom, ali nije bilo pod E. I još kad sam krenul rezati slova onda če sam se ravnal po onoj strani gde su velika slova sam zrezal mala slova na drugoj strani na pol. Ili obrnuto.

Osim toga deca denes imaju pune več knjiga neg kaj ih je bilo dok smo mi h školu išli. Kaj če deci h osnovnoj školi knjiga z likovnog? Negda se na likovnom crtalo. Imeli smo mape s papirima i donesli smo si kaj je trebalo. I crtali smo. Najbolje bi bilo da još uvedeju i knjigu za tjelesni.

Najgorše od sega je ipak to da kad več i moram kupiti se te knjige i radne bilježnice i vježbenice i zbirke zadataka i mape i se kaj uz to ide nekih stvari nema. Tak mi deca još nemaju mape za likovni. Tam gde sam kupil se knjige ih nisu dobili od izdavača. Moraju biti od točno određenog izdavača. Ali ih nema. Čak ni pri izdavaču. Pem još of tjedan pogledati morti su došle. I zanima me gdo je za to kriv?

Grojzdje je skoro sigde pobrano. Mošt kipi, a negde je več i odkipel. I ja sam na par mesti bral grojzdje. I jako dobro sam zapamtil jednu izjavu. Došel je h jenu berbu i jen švaba. Pravi pravcati. Samo kaj se oženil za jenu našu žensku. I ž nju je došel. I čim su došli bilo je: „Dajte si sednite, bute si spili ovo ili ono, bute si pojeli malo,…“ I čoveku nije nič jasno. Kak bi sad išli jest i pit a još se niti nije počelo delati. I čudi se kak bi mi onda išli napre kad nam je posel na zadnjem mestu.