Ste doživeli kad da vas, na primjer nešči vama nadređeni kao znak da ste nekaj dobro napravili potapša po ramenu i veli vam da ste dobar, da ste pravi ili nekaj u tom stilu? Ili da kad se z nekim najdete on(a) ima neopisivo veliku želju da ostvari tjelesni kontakt z vami. I če mu (joj) rukovanje nije dost još vas i potapše po ramenu. Se je to h redu če niste u stanju u kakvom sam ja bil prošli tjedan. Kaj je bilo? Zel sam si prošli tjedan par dana godišnjeg, jer su sad zmislili da kad deca ideju na upis u srednju školu, nešči od mame ili tate mora se skup z detetom potpisati i na prijavnici i na upisnici. Pa sam ostal doma da s Patriciju se to rješim.

To smo rješili i Patricija se upisala za web dizajnera. Kad sam več bil doma, odnosno kad več nisam išel na posel moji su se zmislili da bi mogel nekaj delati. Tak sam išel između ostalog i trsje poštucati. Sunce je bilo praf zagrelo, mam sam zašvical i sljekel majcu sa sebe jer je bila mokra. Tak sam ostal gol do pasa. I mam sam se posunčal malo. I dobil ljepu crvenu boju. I koža mi je nekak postala pretesna. I leđa su me počela peči. Peklo me samo po sebi, a kad me je nešči tak kak sam na početku napisal potapšal peklo me je još i bolje.

Moram napisati da se to niti ne bi mogel napraviti da nije bilo Sandre. Em mi je donesla flašu vode h trsje, em je pograbljala par redi h trsju. Još je dan i šalatu spukala i strijebila grašak. Za svoj trud, ne samo h trsju, nego i po hiži je dobila i nagradu. Novi mobitel. Meni je mobitel male čudan. Ima tipku pali-gasi i ekran prek cjelog mobitela. Opče nema tipki. I si sako malo dobiju nove mobitele. Osim mene. Najstareši mobitel kaj se h familiji koristi je moj. Ženin je male mlajši. Ali ona ima službenoga. I ne koristi ga.

Napokon se otprl i taj dučan gde je žena počela delati. Pa sam mislil morti več nebu po cjele dane tam. Ali sam krivo mislil. H petak kad sam došel s posla hvečer je žena rekla kak h nedelju dela samo hjutro i da bi ona roštilj za obed. Kaj u tom trenutku treba pravi muž napraviti? Reči: 'Da draga'. Da je rekla da hoče fiš jesti sigurno joj ne bi tak odgovoril. Uglavnom kupil ja mesa raznog za roštilj, napacal to i ostavil da čeka nedelju. Još lani sam si mislil kupiti novi roštilj. I nisam. I sad doma nemam pošteni roštilj. Pa improviziram. I bezveze kompliciram. Mesto da sam del dva cigla i između toga zakuril. Samo kaj mi dva cigla ne bi bila dost. Morti i bi, če bi negde blizu imel kakef veči panj. Da, panj, kaj se čudite? Pa če denem rešetku za roštilj na dva cigla onda se moram ili prigibati ili si sesti. A prigibanje mi baš i nejde.

Uspel sam se uživo uvjeriti kak su zabrane prodavanja cigaret i pijače deci samo kak se to veli mrtvo slovo na papiru. Tak je moja kćer došla na kiosk i rekla da hoče kutiju tih i tih cigaret. Pita nju ženska kaj nutra dela da e ima 18 ljet. Veli moja kćer da nema, a ova joj ipak proda cigarete.