Zadnjih par dana kak ne prestajeju ove vručine nema čoveka teri mi se nije požalil da mu je vruče. Vruče je i meni. Pa se nikome ne žalim. A gdo se največ žali. Oni terima je po zimi bilo zima. I teri su jedva čakali da ljeto dojde. Da im ne bu zima. Isti ti sad jedva čakaju jesen, da nebu tak vruče. Onda bu im valjda smetalo če bu dežđ curel. A če po zimi nema snjega onda se žaliju da kakva je to zima bez snjega, a če snjeg opadne, onda se žaliju kak im snjeg smeta. Nije bitno zakaj, bitno je da se jamra. Tak i ja jamram za saki drek.

Smeta mi kad mi smanjiju plaču. Smeta mi kad moram čistiti snjeg, bez obzira kaj je nešči za to peneze pobral. Smeta mi kaj cug pelja tri gladne godine do Zagreba. A kaj se temperature tiče ja osobno lakše podnesem kad je zima nego kad je vruče. Po zimi kad je zima se malo bolje oblječem i več mi nije zima. Ali po ljetu kad je ovak kak je kolko god da se slječem i dalje mi je vruče.

Vruče je i mojoj deci, pa čak i ženi kojoj je inače furt zima. Pa sam Gracii neki dan napuhnul mali bazen, a žena ga je napunila z vodom. Bila je oduševljena. Za razliku od Sandre. Ona nije bila zadovoljna. Jer se štela i ona kupati. I počela se duriti kak ja njoj nič neču dati ni napraviti. Novi mobitel kaj je dobila prošli tjedan je fest brzo pozabila. Patricija ima rješenje za ovo vrijeme. Nejde van iz hiže. Ali nesmem ih samo špotati. Moram priznati da dok žene i mene doma u skladu sa svojim mogučnostima napraviju razne stvari po hiži. Opereju i pospraviju posudu, usisaju, veš razvrstaju, svoj veš si več i same peglaju. Jedino če se same zmisliju se to napraviti onda znam da nekaj hočeju.

Kak sam gore više napisal da me razne stvari smetaju, evo sad mi smeta kaj je naša država našla još jen način kak da nam teri za nju delamo zeme još malo penez. H novom zakonu o radu, teroga pak hočeju mjenjati piše da radnik nesme delati prekovremeno več od 32 vure na mesec i ukupno več od 180 vur godišnje. Če nešči dela več od toga treba obavjestiti inspektora rada ili če je več radnika tak da delaju prekovremene onda bi bilo dobro zaposliti još nekoga. Ali opče je poznato da se zakoni pri nama čitaju i tumačiju kak kome paše. Tak su i moji šefovi, a ne samo moji to protumačili da se ne plača več od 32 vure prekovremene na mesec, odnosno 180 vur godišnje. Ali istovremeno nisu se zmislili da napraviju raspored po terome bi mi delali tolko kolko je h mesecu radnih sati. Morti su se i zmislili, ali imaju jen problem. Nema nas dosta za to. A nove ljude se nesme prijeti h službu, jer nas je preveč. Jedino ne razmem kak nas h isto vrijeme more biti premalo i preveč.