Gda sem bila mala čez cielji tjeden vidlje se da se pririhtava veljiki svetek. Fiže je bil spomenek oVuzmu za teri niesem unda znala kaj znači. Same sem vidla da su si nekak dobri i da saki kak po nekakve komande diela svoj posel. Mama je ribala prsnice po hiže, dedek je bieljil hižu z vun, a babica je parila hadre. Po obloku h kuhnje teklji su potoki švica od kropa teri se pririhtaval za parenje. Parenje je trajalje dva dane i počelje je mam na početku tjedna.

Poklje parenja išla sem z materju na potek spirat hadri. Hadre je mama diela h korite, a korite na glavu. Kaj ju nej korite tiskalje imiela je napravljeni pocvitek. On je bil rasčiesani kaj koruznica gda ju je počesala tuča. Išla sem z materju kaj sem je pomagala slagati stučene i sprane hadre. Gda sme došle na praljišče, ona je resipala hadre na jednu staru flaku, pristavila korite pred sebe, zagvozdila ga na kolcu teri je bil za te zabiti h potoku. Unda je hadru po hadru smakala h vode i tukla ž nju po koritu tak duge dok nie išla čista voda z flake.

Gda je te napravila složila je flaku h kupček, podala mene kaj sem ga diela rahlje na prestretu flaku. Malje malje, mati i ja hukale sme h premrzle prste jer je voda h potoku bila skore ledena. Splakane hadre donesle su se dima, vesile po plote ilji na špagu razapetu med sadjem. Dišalje je selje po friške oprana hadra, a hiže po čistem zraku i zljuhtanemi i narašenemi strožaki. Vanjkušnjice, popluni i rušice morale su biti čiste, kaj se uskrsnuče Isusekove dočakalje čiste. Pranje hadri, čiščenje dvorišča i veči poslje moralji su biti gotovi do Veljikoga četrtka. Od poklje devet vur, na Veljiki četrtek nič se nie smelje delati kaj bi se dielala halabuka. Pririhtane je bilje nakosane suče, naciepane drve. Blagu je bila napukana krma, a svinjam naribana i skuhana repa zametena z šrotem.

Na Veljiku sobotu hiža je dišala po Vuzmene košte tera se pririhtavala. Od same duhe po fiže, a i h dvorišču sljine su curele i skruljenje h želucu moglje se je čujti. Dedek je rane hjutre donesel z najž suhu šunku. Črna od dima nie mogla iti h lonec same tak. Babica je imiela pririhtanu toplu vodu i hu nje z perižem dobre zribala črnjile. Unda je diela šunku kuhat na šapret h veljiki lonec. Dedek je siedel pri šporetu, pomalu si je pušil i furt metal na ogenj. Da nej bil zabadave dobil je h ruke i mužar h terem je tukel mak. Kak niesme imelji drvenuga bata za tuči mak, obrnul je sekiru na hopak i z štiljem tukel mak h mužaru. Mati je presejavala melju za gibenje. Vuzem bez gibenice i kugljiva pri ni jedne hiže nie smel biti bez toga. Moja babica se za se crkvene svetke fejst rihtala, alji za Božič i Vuzem posebne.

Prie Vuzma išla je navike h Zagreb i kupila fige za jednu štrucu gibenice. Ja sem dobre znala gda je došla dima da su skrite h njenja nadra i da je bu nekam skrila kaj je nej mogla najti. Bila je hmetljiva moja babica, a borme i ja. Tak je nie skrila da nej našla škrnecljin z figami. Te mi je bila več kak nekava igra nek sama steča. Skrivala jih je po sakojačka renjica, lončeka, negda čak i h strožak na terem su spalji ona i dedek. Nie pomoglje. Navieke sem jih našla i par pojiela. Gda jih je z škrnecljinem donesla h kuhnju, lukala me pod oke kaj bum rekla. Nie me špotala ni prezirala. Same je znala reči kak je je škrnecljin malje puhlji. Mati je miesila gibenje, kruh i kugljif, a ja sem z babicu išla k potoku po trave ze teremi je ona farbala kuhane jajce. Z puti sme skopale pri plotu hren teri se jel z šunku.

Na Veljiku sobotu popoldan, se je več bilje pečene, jajce pofarbane, a hiža čista kaj suza. Na stolu je bil najljepši stoljnjak, a na njemu kruh i gibenje. Veseljila sem se iti gled grobeka, a negda i k večrnice pri tere se pri kriesu blgoslovila guba i vuzmena svieča. Če sam za tu priljiku još dobila kakvu novu kikljicu ilji svitrek Vuzmeni svetek je bil ljiepi kaj nebe pune zviezdi.

H večer, na Veljiku subotu, mati je složila h ceker zericu sega jela za jutarnji blagoslof. Gda je ona ilji babica došla z blagoslova si sme hmiti i počesani selji k stolu. Prekrižilji se, prie nek je saki koštal malje blagoslovljenoga. Za stoljem i h cielje hiže bil je nakakef mir, a histe vrieme radost i veselje. Mienjalji su se spominki z smiehem, a kak da je saki komaček hiže i sake ljudske srce h tišine govorilje one kaj i ja vam zdej veljim: „SREČEN VUZEM!“

Podijeli s prijateljima