Hnogi sesigurne h svoje spomenke spomeneju kak nam cajti brze letiju. Još se dobre niesme počinulji od fašnjučke hamuljiji, pepelničinoga posta i nemrsa, a več se pririhtava kraj korizme, tera ž njimi počinje. Korizmeni cajti zdej i prie pune ljiet isti su same po jednomu, a te je hodenje i ovršavanje križnuga puta. Saka cirkvica ima po zida sličice ilji kipece na tera je pokazana Isusova muka od samuga suda pak do kraja. Negda nie bilje hiže z tere nej bar nešče išel na križni put h cirkvu. Pri nas h selu, h korizmene vrieme, babe su hodile na ranu mešu kaj bi popoldan z decu mogle iti na križni put. Po putu su dece davale navuk, kak se trieba ponašati h cirkve, a i h svagdašnjem življenu.

Nemrem reči da mi negda, kak detetu, nie bilje dosadne i da bi več put rada ostala doma nek išla na križni put, alji te se niesem osudila misljiti, a kamolji reči. Red se je moral znati pri hiže, a i dalje. Negda se po putu do cirkve moljila Žlosna krunica. I te bi mi deca radi zbeglji, alji su nam stareši dalji da sme moljitve krunice ilji križnuga puta moralji moljiti na glas. Tak su unda starieši i župnik bilji sigurni da moljime, a da ne prodajeme zjake.

Denes mi je drage kaj sem od malje nog bila nafčena na poslušanje i trpljenje. Unda mi je lježe bilje h mladosti i zrelosti podnašati svoje „križne pute“. Življenje h korizmene vrieme, prie, bilje je skromneše, tiše i nekak drugač svete. Kak da se čez cielji cajt korizme saki dan moglje osietiti da je te vrieme Isusove muke. Saki je na svoj način te ovršaval. Ljudi su unda živelji bolj skrušene i siromašnieše, pak njim se unda nie triebalje h korizmene dane nečega odreči. Stariejši, največ babe, h korizmene petke su postile i niesu mrsile. Nie te bilje teške gda je i čez ljete bilje „posta“ i „nemrsa“ prec. Veseljic nie takaj bilje, kak i denes. Malje gdoj se h korizme ženi. Te su šege odvajkada. Negda se same hodilje po snoboke, če se teri dečke nie stigel oženiti čez zimu. Snuboki su moralji biti fljetni jer če gosti niesu bile na Vuzem ilji mam poklje Vuzma, puca i dečke moralji su čakati drugu zimu.

Kak korizma ide kraju si oni teri su se h denešnjem cajtem nekaj odreklji još se malje triebaju strpeti. Ja med svojemi pajdaši veljim da njim je vrieme „glumatanja“ i „odricanja“ h korizme za zasmejavati. Čudi me kaj tak nekaj još komu opadne na pamet „glumiti“ žrtvu kaj se odreče same onuga kaj ima z viška. Bilje bi te dobre i ljiepe gda bi hu te korizmene vrieme daruvalji one kaj imame zviška nekimu teromu trieba. Gda bi mu od srca dalji one bez čega mi moreme. Teški su cajti i sem poljehku škripi i h žepe, h taška i po hiža. Če več nie moči htrgnuti nekaj od svoje zubie i dati drugomu unda je i pajdašuvanje, smieh i topla rieč za pajdaša dobre delje. Kaj pak nej sedelji pri praznomu stolu nič pune ne košta, same dobre volja, da se pajdašija počasti z koštu tera je negda navieke bila na stolu za obed ilji večeru.

Ruljena kašica
Na malu žljičku masti dene se frigat pol glavice črljenuga i komuškica bieluga lukeca, malje posoljenoga.

Na ljehkem ognju sitne kosani lukec se obrača kaj se nej prigorel. Gda lukec omekne i malje požuteje, na njega se dene zerica črljene paprike, malje premieša i fljetne dene ljiter-dva mrzle vode. Vode se meče tuljike kuljike bu ljudi koštalje i jelje ruljenu kašicu.

Dok se voda grieje dočas se h zdeljicu deneju dvie šake glatke melje, malje se posolji i počne z rukami miešati. Melja se mieša z mrzlu vodu tera se poljehku dodaje. Med prsti se od melje i vode dielaju ruljena tiesteca. Napravljena kašica još se z prsti obadvie ruke rulji h male sitne grudice. H zakipljenu vodu z lukem i papriku, poljehku se cundra i meče kašica. Gda se se zmeče h krop, jeden cajt se mieša kaj se kašice ne bi zljepile med sobu. Kašica se mora kuhati na ljehkem ognju oko deset minut. Pred sam kraj h juhu se još more deti sitne kosanoga perja od pršuna ilji celjera.

Podijeli s prijateljima