Veljikobožičnjak, gruden, ili pak prosinec mesec, je mesec teruga h denešnje cajte zoveme mesec daruvanja. Istine za volju od vajkada se decu pri nas daruvalje za Mikuljinje, negde h nektere druge kraje za Luciju. Deca su se takaj raduvalji tomu kaj njim bu Isusek del h slamu tera je bila na svetke pod stoljem. Več jeden dug čas ne veseljiju se ni ne radujeju same deca daruvanju nek i stariejši. Si čakaju kaj njim se bu pod cimer na Badnjak delje. Štacuni su puni kaj česa. Žvrgljaju, zvoniju, ropaju, popivaju, svetljiju se i dišiju sakojački čački. Cinfrasti, se moguči farbi i primislji čakaju nekuga gdoj jih bu kupil, kaj bi jih nekomu daruval.

Kak je te nove pečena šega postala za praf šega, ljudi jeden drugomu očeju šenkati nekaj za svetke. Kak su pak grdi cajti, slabe je ropanja po žepe, a pobelari tenki, tak je se teže od gupčeka htrgnuti i nekaj drugomu kupiti. Da bi navada ipak ostala navada več put se mora kupiti nekaj kaj čoveki nie trieba i more biti bez toga. Nu če se pak nič nekomu ne šenjka čoveku se grde vidi gda dojde h nekteru hižu. Največ penezof senek se potroši za decu. Starci, familjija nakupujeju dece čačke sake felje. Oni sami se malje ž njimi poigraju i za čas zavšiju h nekavem zapečku.

Kak deca rasteju tak su čački se drugačeši, a borme i se skuplješi. A starci se nemreju ofnjati od želje svojuga „kučnuga ljubimca“. Nekteri dan sem čula na obloku z terem lučeme h sviet kak je jedna prodavačica štacuna rekla da starci kupiju dece se kaj h šatcunu poočeju. I tak te ide se dok detece nie tak veljike, a želje još veče, da starci ne htegneju pratiti njihove želje. Unda dojdu srde, špotanje, a negda i do mržnje prema onomu gdoj je daruval nekaj največega, nekaj kaj nema ciene, a te je življenje.

I baš tak lučem ja starce kak idu z štacune sakojačemi veljikami i malami paketeki, za svoje ljubimce. I gda te ljubimci dobiju jeden čas su dobre volje. Starci su pak veselji kaj i oni unda jeden čas imaju mira od te svoje drage nasljednjike. Oni se igraju z moderni mašinkami, a starci su bez brige. A na mašinka se da kaj česa videti, kaj velja i ne velja. Se te ostane zapisane negde h pometi deteca i kesniejše more grde završiti.

Zdej si gruntam kak je bilje gda sem ja bila mala ilji bi reklji žabe do vuh, kaj sme mi za svetek kak deca dobilji. Lučeči čez denešnje oči, nič. H škornju na obloku za Nikuljinje bil je kakef svietlječi bombonek i šiba bez tere je malje tere Mikuljinje prešlje. A za Božič je bila veljika sreča če se mogel pocuknuti cinfrasti cukar teri je bil kupljen za cimer. Spretne se i „fkrala“ jabuku božičnica z košare, zvezana z preju za štekelj, tera je čakala da bu obiešena na cimer. Nie su se h mesecu šenkanje dobivalji nikakvi dari z štacune za veljike i decu.

Denes, te morti i zgledi malje žalosne, alji senek gruntam da sme mi deca hu onem cajte dobilji pune več nek denešnja. Imelji sme kaj denešnji pajnjkrati retke gde imaju. Raduvalji sme se žukanju h babičenem ilji maminem krilu. Poslušale su se pesmice tere su meste radiona gundralji ljudi familjije gda je bila na kupu. H mala hižica, potelušica, živelje se jednem drugem življenjem. Šenjkalji su ljudi jeden drugomu zericu svoje dobre volje. Nie da nie bilje i unda kaj česa, svaji, preziranja, spretikavanja i špotanja. Alji h mesecu h terem se spravljalje za najveseljieši svetek, Božič, ljudi su jeden drugomu daruvalji, sebe. Starci su imelji več cajta i z decu pririhtavalji kinče za cimere, pripoviedalji sakojačke priče z teremi bi decu i malje plašilji. Baš takve priče morti i denes faljiju, kak onem gdoj bi jih trebal pripoviedati tak i onem teri bi jih triebalji posluhnuti. Hu ovem cajtu, h prosincu mesecu, mesecu gda nekaj nekomu očeme šenkati naljepši dar bi bil gda bi ljudi jedni drugem šenjkalji trunek sebe.

Bilji bi ljiepi cajti gda bi starci svoje dece meste skupe čačke daruvalji spominek i sakojačke pripoviedanje, če niesu pozabilji. Takaj bi bilje ljiepe da deca svojem starcem darujeju barem malje svojuga cajta. Barem malu zericu cajte tere trošiju na šuplje spominke po sakojačke bertiji. Bilji bi ljiepi dari pajdaše jeden prema drugamu da se zestaneju, skup z svojemi familjijami tere imaju, i med sobu požlabraju. Smiehi, šala, pajdašuvanje, radost i sreča h srcu ipak su najljepši dari tere moreme daruvati jedni drugima. Unda ne smeme biti, barem hu ovem cajtu, za takve šenjkanje.