Bože moj kak se ljete same preobrne. Negda dok je čovek mlad, do dvajsetoga ljeta, cajti se vljiečeju kaj lačne ljite. Zdej se par put obrneš, ljetu je kraj i več je počel snieg poljehku prhutati. Baš to prhutenje snjegeca hu ovem cajtu gda je počelje.

Došašče, nekak nas vrača h cajte prie pune ljiet. Bilji su unda cajti gda se reklje:
“Sveta Kata snieg za vrata„ pak je vrieme gda se išlje na prvu zornicu snegek pokril naše kraje. Išlje se rane h jutre po sniežne tiri, a škornji su pri hodenju cviljilji. Ljudi su reklji da popievaju med sobu:
„Stric, vujec, stric, vujece“!

Došašče je od vajkada bil cajt pripravljanja za najveseljieši svetek med našemi ljudmi. Bil je te cajt gda se se rihtalje za svetkuvanje rođenja maluga Isuseka.

Spravljanje za Božič negda i zdej, tak se fejst razljikuje kaj bi relji kaj noč i dan. Od početka Došašča ilji bi po domači bilje bolje reči čakanja Božiča negda, ljudi su bilji h spomenku o tomu veselemu cajtu, rihtalji svoje stanje, hiže i familjikju kak bi čisti dočakalji svetek.
Bilji su te cajti gda se h duge večeri počel delati kinč za cimere, poljehku pribirale hadre za parenje, ribale prsnice, popravljale maznice, a pri ljudi kak da je bilje posebne veselje. H sirotinjske dome saku bi večerku familjija, susedi i pajdaši bilji na kupu, pak bi se obličeci treslji od radosto i veselja.

Žlabralji su ljudi med sobu o kaj česamu. Puce bi delale kinče ilji našvavale i stiha šeptale med sobu o dečka teri su njim se dopadalji. Pri tomu su dobre pazile da jih stareši nej čulji. Babe bi naprezale vuhe kaj bi mogle nekaj čujti, a i same šeptale o semu kaj se po selje dogajalje i delale špota. Nie bilje nikakve halabuke, kričanja i sakojačke hamulji teri denes več put ljudi mučiju. Stiha i rezložne, sirotinjski, bez pune pobelare, ljudi su od početka Došača ovršavalji svetke teri su njim prihajalji. H prve dane bilji su tuj sv.Andija, Barbara i Nikula ilji Mika. H večerku prie goda hodilje se popievat podoknic za godovnjaka. Onie teri je imel god ilji imendan, pevače podoknic pozval je fižu, ponudil nekaj za pregristi i pogutnuti, a unda su negda h spomenku i hamuljije znalji dočakati sitne vure.

H naše kraje dosta se držalje do sv. Barbare. Morti radi toga kaj je pri nas bilje pune rudnike, a ona je bila zaštitnica rudare. Nu nju su kak sveticu poštuvalji vonjki artiljerci, moljilje je se za čuvanje od groma. Ona je bila i zaštitnica ljehke smrti. Barbara je bila mučenica jer se protif volje svojuga oca priklonula krščanstvu. Otec ju je dal zazidati h kulu z dva obloka gda je prešel h rat kaj nej z kule mogla ziti van. Gda se je vrnul imel je kaj videti. Ona je dala napraviti trejti oblog kak križ. Srditi otec dal ju je mučiti. Kak bi ju osakatilji i ranilji rane bi čudem zacieljele. Na kraju se otec resrdil i sam je odrubil glavu. Radi toga kip ilji sljiku svete Barbare more prepoznati po tomu kaj h ruke ima mač, a kre noge je je kula z obolčeci.Na Brbarenje se pri nas prie,a i zdej, posiela šenička h posudice, kaj bi se do Badnjaka lijepe razelenela. Takaj se h nektere kraje h vodu diela kitica čriešnje. Če je do Božiča precviela moglje se čakati rodne druge ljete.

Najveselješi svetek za pomorce i decu je sv. Nikula ilji Mika. Nikula je jemput zmiril more i radi toga ga poštivaju mornari. Po pripoviedanju, on je i jednomu čoveku teri je imel tri čer dal peneze kaj jih je mogel oženiti. Te je delal poskrivečki gda su se ženile prve dvie. Gda je otec ženil trejtu čer, pazil je gdoj mu te pred vrati ostavlja blage z teru more dati čer zamuža. Čakal ga je pri vrati, a sv. Nikula ga je videl. Popel se na krof i čez rafung, kaj ga nej nišče, spustil peneze. Kak su se pri peči sušilji štunfi, penezi su opalji hu nje. Po pripoviedanju ljudi dobre dece Mikula ostavlja dare h škornju na obločecu. Ž njim ide i Krampus teri ostavlja šibe. Za dobru decu da se ne pokvariju, a za zločestu da se popraviju.

Gda bi se denes hu te veruvalje za nektere veljike triebal bi Krampus ostaviti debelu batinu i naprašiti njim ture.