Kak sme još furt h tjednu gda hodime oko grobeke svoje drage pokojnike nie se grieh zmisljiti stare šegi tere su se ljudi držalji, gda je čovek pozvani na onie drugi sviet.

Kak negda nie bilje štacune h tere bi se moglje saki čas kupiti se kaj je triebalje da se pri hiže dogodi smrt, tak su ljudi h svoje ormare imelji pririhtanu črnu obljeku. Oni h zriela ljieta imelji su pririhtane takaj se hu ke ga bi obljieklji gda bi bil pozvani na onie sviet. Saka hiža je imiela pririhtane deske od tere je tišljar napravil ljies gda je došlje do toga grduga časa. Če se dogodilje h selu da je gdoj hmrl, cielje selje je priskočilje h pomoč familjije pri tere je bil mrtviec. H selu se nič nie smelje delati h zemlje dok se pokojnik nie pokopal.

Jeden muž je hodil po selu respovedati kaj se pripetilje i dogovaral z drugemi mužmi posle oko nošenja križi i mrtvieca. Babe su pak pririhtavale krminu za službujuče i familjiju tera se zestala poklje sprevoda. H večerku prie sprevoda doma su se plelji venčeki od bršljana i rožic tere su unda cvele ilji su se delale od krep papiera. Hižni niesu smelji oko sprevoda i hrane nič delati. Ljudi su hodilji gled mrtvieca i on se moral prijeti za paljec kaj ljudi nej bilje strah od njega. H ljies se k mrtviecu moreal deti komaček zemlje z dvorišča, maznice z čoška hiže, moljitvenik i svete sličice. Prie sprevoda muži su ljudem, teri su došlji na sprevod, nudilji pijaču tera se pila za spas pokonjikove duše. Familjija pokonjika morala je biti obljiečena h črninu i kak god da je bilje vruče rukavi na opravilu moralji su biti dugi. Babe su na glava morale imeti črne rupce, a muži kape ilji škrljake.

Sprevodi su prie išlji od doma i gda se mrtviec donesel van oko njega se moljilje. Poklje moljitve ljies se zdigel i krenulje se z dvorišča. Stolci na terem je vanje bil ljies moralji su se prehititi, a za ljiesem se hitila kanta z vodu. Te je bilje radi toga kaj se nej pokojnjikova duša mučila i došla dima strašit familjiju. Ak je hmrl dečke ilji puca unda su pokojniki moralji biti zrihtani kak da su mladeniči. Pokojna puca bila je obljiečena h beljinu z venčekem na glave, buketem rožic h ruka i kiticu na prsa. Kre ljiesa je išel njenji dečke, ak ga je imiela ilji bilje teri selski dečke obljiečen kaj mladenec.

Če je pak pokojni bil dečke unda je kre ljiesa išla puca obljiečena h mladienjku. Još su se znalji obljieči dečki i puce h krancerice i tak spratilji mladuga pajdaša na večni počinek. Od doma do grobiča babe su moljile krunicu, a muži spominalji o kaj čemu, a največ o pajdašuvanju z pokonjem. Rođenje i smrt diel su našuga življenja. Jednemu se radujemu, radi jednuga tugujeme, e te je tak. Gdoj se rodi mora i hmriet, od vajkada je poznata istina. Na kraju se je te življenje. A unda i jedna pripovest ilji vic na tu temu.

Bila jedna baba tera je furt govorila mužu kak ga ima rada i kak bi za njega se dala. Govorila je da nej preživela da se kaj njemu dogodi i da hmierje. Mužu je te več išlje na žifce pak se jednuga dana hpustil da je hmrl. Priteklji su susedi h pomoč i ga su vidlji kaj se pripetilje nie preostalje nič nek da muža obljiečeju kak se spada. Sused je rekel babe nek donese novi ancug, šlape i škrljak za tere je znal da ima. Baba se vrnula za jen čas i donesla stare podrapane tenisice, rezdrenu trenirku i staru šiljtericu. Sused se tomu fejst čudil. Baba je rekla da je pre šteta dati novi anjcug, škrljak i šlape kaj bi h zemlje struhlji. Rejše bu kesniejše te nekomu dala teri bu je pomagal pri poslje. Muž je h ljiesu same škripal zubemi od jada. Gda su muža obljieklji i neslji van z hiže baba je zakričala:
„Jaj mene, jaj! Dragi muž! Kam ti mene zdej ideš!“
Srditi muž z ljiesa je pregovoril:
„Zgledi da na olimpijadu, kak si me zrihtala!“