Kak sem h zadnje kolumne pisala o tomu kak se deca gda porasteju preobrneju h nekakva čudna stvorenja tere ne prepoznaju ni sami starci, dužna sem još povedati jednu staru priču. Več sem ju jemput napisala, alji hnogi ju neznaju. Kak su baš cajti takvi kakvi jesu dobre se znovič na tu staru povedu zmisljiti. Priča je te po onem kaj se velji da se kad tad dojde na naplatu. Radi te plača trieba se na vrieme malje štikavati i dobre gruntati.

Stara poveda je o jedne familjije tera je imiela muža i babu, dejčeka, dedeka i babicu. Dedek i babica išlji su se stariejši i slabe su več moglji hlavljati posle. Več su se oko poslji motalji nek su bilji od koristi. Senek, kak su od vajkada bilji nafčeni delati rade su se o poslje briguvalji. Te je mladem išlje na žifce, a največ snehe. Furt je mužu prigovarala da jih malje hkroti. Znal je sin tuj i tam reči matere i ocu da naj same budu fiže i pri miru i da več dielaju štete nek koristi, alji te baš nie pune značilje.

Pri stolu su takaj starci navieke nekaj šlabekuvalji pri jelu, a unda njim je znalje i zubie opasti. Sneha je te hude lukala, starce špotala, a muž je same skimaval. Malji dejček nie baš pune razmel kaj te njegve strce srdi. Rad se igral z babicu i dedekem. Hu te igre znalji su po hiže i naštrajiti, a unda je sneha frcala kaj zmaj. Ruke starce postajale u se več drhteče i gda su jelji fejst njim je išlje mime. Znalji su kre svojuga teniera imeti malje poljejane i nadrobljene. Gda te sneha več nie mogla podnašati rekla je mužu da mora napraviti male drvene zdeljice i klupicu teru buju delji dalje od stola. Starci buju sedelji na klupice i jelji z drvene zdeličički kaj neju štrajilji pri stolu, prehitavalji i trlji teniere. Sinu baš nie bilje po volje, alji popustil je pred naklapanjem babe poklje kaj je ocu opal tenier z stola i potrl se. Kak se bokček starec zahljiknul, počel je jahke kašljati, lamatariti z rukami i tak je zadel tenier teri je opal na pod i ves se razbil. Unda več nie bilje popuščanja. Starci su završilji na klupice kre peči, a h ruke su imelji drvene zdeljičičke h tere njim je sneha taljala jelje. Grde je tiskalje i peklje starce pri srcu gda su sedelji pri peči i jelji, a sin i sneha za stoljem teruga su oni priskrbelji.

Negda je znala babice kapnuti suza teru je fljetne obrisala z fertunem kaj nej gdoj videl. I dedek je znal šmrcnuti i gladiti brk kaj se nej videlje kak tanca od tuge. Malji dejček je znal skakati od oca i matere do babice i dedeka. Gda je znal pitati za kaj oni jieju po strani, a ne pri stolu, nišče mu nič nie štel reči. On je bil pre malji da razme kaj se te pri njihove hiže događa. Znal se prišmaljhati kre dedeka i prisesti babice h krilje, reči njim da idu za stol sesti, alji se je ostalje po istem. Gda je prešla zima i gda su počelji toplji dani starci su hodilji po posle, a dejček je z babicu i dedekem nekaj štuljil po dvorišču.

Jemput, gda su se vrnulji z dela, baba i muž vidlji su kak njihof dejček nekaj meštrulji. Imel je h ruka deščice i slagal jih, rezuckal i bil je ves h poslu. Tak su ga našlji h poslu drugi i trejti dan, pak se otec tomu začudil. Poklje gda je pospravil blage h štalu išel je gled kaj te njegef dejček diela. Čepil je kre njega i popital ga kaj diela. Dejček se veselje nasmejal ocu, priel ga za vrati i rekel. „Tata, ja tebe i mame dielam malu klupičičku kaj si bute sedelji na nje gda budete stari. Imam i dreveka kaj bum vam napravil kopanjice z tere bute jelji gda budete stari.“
Muž je prebljiedel, zel dejčeku drievce, halat z ruke i rekel: „Sinek, nebu ti trieba delati tak nekaj“.

Čudilji su se dedek i babica gda su za večeru bilji nazaj za stoljem. Sneha i sin same su se mudrilji, a dejček je sel kre dedeka i babice i žmahne ž njimi jel pri stolu.