Kak da mi je sujene da ovie mesec furt pišem o onomu kaj baš nišče nema rad, a te je odlazak z ovuga Svieta. Nie trieba od toga biejžati, jer je življenje putec teri ima svoj konec, a da fala Bogu nišče nezna gde i gda. Gda čovek prejde z ovuga Svieta h nekakva ljieta i betegu, unda kuljike štelji mi priznati ilji ne, senek njemu i njegvem bljižnjem nekak odljehne kaj se rieši muke.

Nu, gda smrt, za teru se povieda da je te gospa obljiečena h bielu halju i z kosu h ruka, dojde pre raane i bez najave, unda nas pri srcu stišče i bolji. Smrt, ta baba h bielje halje odvajkada, veljiju ljudi nejde več po redu i starosti. Prie se reklje da je hodila po ljudi gda su navršilji šezdeset ljiete. Nu, kak je jeden čovek na dan gda je ovršaval svoje ljiete prešel h kljit i tuj čakal gospu smrt, gutal si je i gutal vinčeke. Saki put je prosil smrt da ga naj počaka dok si spije još jednu. Čudila se ona kaj mu je te tak fine pak je i ona malje probala.

Dopala se njoj pijača i od muža iskala da je natoči pehar vina. Njoj je vine h pehar teklje dugocajtne i unda se zavljiekla čez piljku h lagef. Muž je pak piljku zaprl kaj nie mogla z lagva van. Ona se nie preveč bunila i rogoborila nek je same pila i pila. Gda je več lagef bil pri kraju, otprl je muž piljku i pririhtal se da ide z smrtju. Ona je jedva zižla z lagva van, na muža se nie ni zgledala. Od unda lunja pijana po Svietu, jemlje sobu ljudi, a ne pita ni za ljite ni cajte. Morti se i radi toga molji, čuvaj nas Bože od iznenadne smrti. Gda se te dogodi, da čovek zgubi h jednem času, diete, oca, muža i pajdaša, a gda su te ljiete h tera bi baš mogel za sebe i svoje najdraže još pune napraviti, unda se sakomu zmrzne mam pri duše i pita se, sam sobu:
Zake?

More se spitavati, alji odgovora nigdar čovek ne najde. Če je tak unda se proba zmisljiti sega onuga kaj je h nečevem življenju bilje ljiepe i ščem je cinfral naše življenje. Grdi su rastanki teri su za navieke, makar nam ostaneju ljiepa siečanja. I naš pajdaš Rudek, teri je z nami h zadnje vrieme glodal novinarsku koricu kruha, prešel je bez bilje kakve najve, z smiehem na ljicu i radošču h srcu. Gda je žalost ščipala srca, prve njegve familjije, a unda pajdašem nie bilje niti jednuga teri nie imel za njega ljiepu rieč. Navieke nasmejani, navike z ruku prema pajdašu i navieke za ponapraviti če ga je nešče kaj popital. Bil je te čovek teri te znal h tuge potiešiti i nasmejati, teri je znal podeti pleča za druge i prgutnuti meste druge žuhki pehar če je bil. Hu te veljike žalosti godile su mislji i govori pajdaše kak je naš Rudek bil pajdaš bez teruga družba nie bila vesela. One kaj je takaj godilje, a denes se več rietke med ljudmi dogaja da je pajdašuvanje z pajdaši bilje bar jemput h tjednu. Da su pajdaši našlji cajta da se skupa pospominaju, poloptaju, pošaljiju, pokartaju....

Nešče je h svojemu govoru rekel:
“Naša druženja h petek, neju več ista gda tebe pajdaš Ruda več ne njemi ne...“

Kak je hu tem rječam pune rečene, a najljepše kak su pajdaši bilji nakupu. Bilji su na kupu na ljieta. Bilji su skupa gda su od dečkof prešlji h muže. Raduvalji su se gda je teri postal otec i z šegami i pesmami nazdravljalji deteče življenje. Šaljilji se na račun svoje babe, čuvalji su med sobu tajne tere su same oni smelji znati. I gda je se tak, baš radi takvuga življenja Ruda se same preseljil na druge stanovanje, alji bu ostal živeti med svoji pajdaši. Sigurne na ljieta ne ni jedna vesljica ilji pajdašuvanje h terem se ne reklje:

„E, da je naš Ruda žif. Te bi Ruda otpopival bolje. Ruda bi te najbolje napravil. E se zmisljite gda je Ruda došel...donesel...bil...rekel...“
Gda prejde pravi pajdaš na putovanje z teruga se ne vrača, on ipak ostane h srcu, h spominku, h smiehu i h radosti radi toga kaj je cinfral naše življenje... Ruda fala ti na tomu...