Nie baš tak duge gda se je rabila ova poveda. Bila je ona dotepene od nekud, alji su ju ljudi dosta rabilji. Pasala bi ona domača:“ ni mačka ni piesa pri hiže“, alji naši ljudi rajše imaju nekaj stranjskuga. Ta se poveda največ rekla puce tera se je štiela oženiti za nekakvoga siromaka teri je imel slabu gospodaru ilji pak nikakvu. Reklje se te za nekuga čieva je familjija i on sam bil pucpiegar i slabi gospodar.

Na tu sem se povedu zmisljila baš gda sem z žaljenjem pri srcu lukala ove dane one kaj se je dogajalje po naša cesta. A ceste su bile pune ljudi teri su svoj jad i teške življenje pokazalji na ceste i pri tomu si gruntalji da jih bu same tak nešče bolje čul i unda njim pomogel. Po mene larmati su počelji pune pre kesne. Nu, te su ljudi teri su nafčeni na trpljenje i sakojačke zloče, pak su se pobunilji gda njim je voda došla do grla. Voda do grla, a mljieke po ciene tera njim nie dosta veljika da pokrivaju se troške tere imaju. Nie stvar same troška nek i „štrikem za vratem“ tere tie ljudi imaju. Onie teri se baviju z poljoprivredu bilje tere vrste, a največ z kravicami nemaju ni svetka ni petka.
Bila je stara poveda ovak:
„Kravica je mamica, a voljek je tatek!“
Z tem se reklje da nas kravica hrani, a vol nam pomaže da bi mi prehtanilji kravicu i pririhtalji koštu za blage i sebe.

Kak sem odrasla na selu, h štaljice moje starce navike je bila kravica. Največ se poslije vrtelje oko nje. Če bi kam prešlji na prščenje moralji sme susedem pririhtati koštu za blage, kante napuniti z vodu za napajati. Ne same da je čez dan oko nje bilje posla nek se je košta za zimu pririhtava čez cielje ljete. Spravljala se krma, siene otava i detelje. Podžinjala se po koruza koštreva i sušila. Takva posušena koštreva zvala se muhič i ona se spravljala blagu za koštu za po zime.

Denes fala bogu nie tak. Ljudi se ne triebaju tak fejst mučiti. Posel njim pomažeju delati sakojačke moderne mašinke. Nu senek kravice i denes trebaju brigu čez cielji dan i cielje ljete. Kaj bi njim nekak olakšala država njim je dala nekaj malje penezek da bi lježe gospodarilji. Nu ni dala sam onem teri imaju kravice nek i drugem teri se baviju z poljopriredu. Veljiju da je biti mornar život z sedem kori. Biti poloprivrednik h sakem cajtu je život z pune več kori od sedem i još z žuhki. Imelji sme za prečitati gdoj je kuljike dobil od države pomoči za poljoprivredu. Nešče, gleduči mogel bi reči da je te pune.

On gdoj zna kaj znači biti poloprivrednik te ne niti pomisljil, a kamolji rekel. Nu prečitalji sme gdoj je dobil nekaj več pomoči, a nie se moglje prečitati kuljike je onie teri su dobilji, alji ne tak pune. Od malje stvari napraviju se veljiki. I nie zamer onem teri su dobilji pomoč i za te kupilji umetnjaka, semenje, nasade i kaj česa druguga kaj su na svojem gruntu potrošilji. I te je h redu i takvem trieba dati jer oni prihraniju hranicu bar za sebe i svoju familjiju.

Nu ima i onie teri su pomoč dobilji za svojuga grunta, a pri hiže „ni mačeta ni kučeta“, a kamolji pajceka ilji kravice. Dobilji su peneze za nekaj kaj ne dielaju i kaj nemaju. Gda se se one kaj se je pomoči dobilje za te skoristilje, nebi nam polja bila prazna i zaraščena z dračinjem. Meste toga bila bi pune polje blaga i zasiejane njivic. Ovak, puste poljane, reklje se negda, a važi i za denes. Našem ljudem teri se baviju z kravicami, pajceki, pureki i sadjem poljehku pijeju krf i oni teri jemljeju one kaj njim ne pripada, a takve, na žalost, je bilje i bu. Z borbu i larmanje prema onem gdoj daje peneze kak pomoč, morati se obrnuti i boriti se prema onem teri z kopanje jemljeju one kaj jih ne pripada. Stirati z prosvednih koloni one teri z jednu presičku, z jednu kravicu i vozem koruze glumiju „veljike“ poljoprivrednike. 

Gda se bu znalje i gda buju ljudi delalji reda sami med sobu bolje bu za one teri pljujeju h šake i rintaju od ranuga jutra do kesne večeri. Ljiepa naša takaj mora razmeti da je njenja budučnost največ h poloprivrede i turizmu i hu nje trieba hložiti peneze. Dati peneze za pomoč onem teri stvaraju nekaj, a ne pucpiegarem teri trošiju h dien.

Za nadati se da unda ne trieba po ciesta iskati pravicu nek te cajte trošiti nekak drugač, za dobrobit ljudi i blaga.