Počelje je počelje. Tak bi moglji reči da je počela gužva po cielje Ljiepe naše od onieh teri očeju, za naše dobre, tak veljiju, nekaj napraviti. Još malje i počelji nam se buju smejati z stupe i poručivati kak bu pune bolje če dame glas, baš njemu. Sakomu je jasne da bu drugač, a elji bolje i gorje te bume još vidlji. One kaj hu te halabuke mene žalosti, kak domače puce, tuj ne mislim na ljite nek na regionalnu pripadnost, da ovi naši breščeki i srameče ravnice još niesu, h ovem cajtu, odhranile Zagorca teri bi stal na tie visoki podest. Kak zgledi još niesu za te pravi cajti jer dobre je znane gda Zagorec dojde tam gde mu je meste, se se zatrese ne same h Ljiepe naše nek i h cieljem Svietu.

Trpiju Zagorci još navieke se nepravde tere mu od sikud prihajaju. Saki dotepenec teri dojde k nam štel bi nas vučiti pameti. Zeme si za praf i počne šlabekuvati i pisati o Zagorju i Zagorcem kak da su mu njegvi pretki kupalji riti h našem potočecu i pobralji one kaj saki Zagorec ima, malu maturu. Nepravda se pak prema nam Zagorcem počela fejst vljieči, tak kak megla. Baš si ovak ove Martinjske dane lučem h oblog z terem vidime cielji sviet, i vrabec mi neda mira da bevim hu njuga baš unda gda me nekaj hvužge tak fejst kak da hitiš šibicu h benzin. Nemam cajta i nemam rada lukanje, alji navieke me, kak da baš mora, nekaj pripelja. I viš. Lučem ja kak su po naša cesta h večerke i h Martinjske noči postavljeni ljudi teri čuvaju red i zakon. Niesu oni po cesta restepeni bez veze. Stojiju h kmice i za čas skočiju z mraka kaj bi i čoveku moglje pučiti srčeke. H ruka njim je dreger ilji drager, vrabec si ga zna, i za čas se najde pajdašu h gupčeku. Očeš nečeš, moraš puhati i bogec mora čakati e mu je škropec teri je čez dan spil bljiže gornje rupe ilji doljnje. Če je pri gornje ne gine mu kazna. Najdeju se i onie muži teri se več ne naljiepljeju gda idu od kljetja, jer znaju da bez plafce svetek ne prešel. Unda jeden ne pije pak vozi ilji pak prejdu po putece gde naše plafce nema. Jer fuljanja nema.

Za Martinje su h Zagorju „pri sake vrbe“ z dregerem. Na obloku z terem lučeme h sviet moreme videti kak su veselji oni teri nič ne napuhneju, a kak da su žalosni onie teri deger držiju kaj niesu našlji „veseluga“. I tak sake Martinje več se par ljiet zna, pazi se na Zagorce kaj si nej prek mere spilji. Srdi me te kaj se te navieke diela ri nas, a ne h druge kraje. Unda se malje potešim, da se ipak Martinje ovršava pri nas, pak h Podravine i več bi reklji kontinentalnem dielu Ljiepe naše. Krščenje mošta je unda ljiepi običaj pajdaše pri kljetja gde se dobre oče pojesti i dobruga vineka spiti. Morti je za te takva pažnja po naša cesta, jer su te kakti naši običaji. One kaj me je hvužgalje te Martinjske dane je te kaj se na sam tie svetek govorilje o pijače i kontrolje na ceste h Zagorju gde se ovršava Martinje, a h iste vrieme su se za Martinje pokazala miesta gde se ne slavi Martin tak kak pri nas. Pokazala su se trsja, poviedale se kak je negda na Martinje bila meša i semen, kak su se h konoba zestajalji pajdaši i poviedaju o tomu kak se h „gornje „ kraje ovršava sv.Martin.

I tak to pripoviedanje traje, traje i taje. A gda se pokaže kak h „gornje „ kraje ovršavaju Marinje, same se po obloku presmekne sljika i dok bi se pririhtal kaj si bi sel i malje poluknul, več niega je, reklji bi Međimurci i Varažljinci, teri takaj spadaju med one „gornje“.

Na žalost tak te je i tak te još bu. Mi hu ovem cajtu nemame svojuga Zagorca za kandidata za precednika. Strpelji se bume još jeden cajt. Se dok neme tak duge puhalji h dreger kaj bume h glave počeljenelji kaj purani, a unda se bu moči nečega nadati. A do unda, se bu po staromu..