Počele je topleše vreme i ljudi kak da su se zbudili i počeli delati i razmišljati kaj se treba napraviti. I moj posel vezan je za ljude i njihove potrebe. Kak god se povećava standard još se brže povečavaju želje za nečim novim, još boljim.

Ljudi denes ne znaju za skromnost, nišči se ničega neče odreči jer misli da mu bu tolike več zel nešči drugi. To i nije daleke od istine, same je pitanje kolike oni koji bi te potrebe, tere furt rasteju, trebali servisirati to moreju zadovoljiti.

Još jen preblem je vu tom kaj se nič ne kritizira kad ničega nema, ali ak se nekaj napravi si znaju kaj ne velja, kaj bi mogle biti bolje i kakvu neki od toga imaju korist. Ispada da na tom svetu ne postoji ni jen pošten čovek osim onih teri nič nemaju, ali njih i onak si držiju za bedake. Ali ja verujem da ima još dosta ljudi koji za svoj angažman ne trebaju nagrade. Dosta im je da ono kaj se napravi donese nekakev rezultat i to je u stvari nagrada za uloženi trud. Znam da pune njih nemre svatiti zakaj bi se nešči zalagal bez da ima konkretnu materijalnu korist, ali si oni entuzijasti koji delaju za zadovoljstve znaju o čem govorim.

A da bi se rezultati poznali trebaju i drugi uvjeti biti ispunjeni.

Jedan od najbitneših je sloga! Tam de su ljudi složni i dobronamerni nekaj se događa. Nije dobre ni kad se same kritizira one kaj nešči drugi napravi, niti je dobre kad nešči dela same za se ili gledi kak bu i š čega zvlekel kakvu osobnu korist.

To se more saki dan videti na primeri de oni koji su složni ideju napre, a tam de se svadiju i iščeju razloge zakaj nekaj ne štima, se stoji i propada.

Ljudska dostignuča ili su nastajala ko rezultat sloge ljudi ili ko rezultat discipline koju im je nešči nametnul, ali nigdar stvari nisu nastajale kad je bila anarhija.

Mi se nazivame moderne društve, volime isticati ljudske slobode, ali nije sa vrednost v slobode ljudi, jer sloboda ne znači da moreš delati kaj očeš. Sloboda znači da se moraš znati odnositi i prema drugem teri moraju uživati v svoje slobode. Sloboda iste tak znači i da se treba zalagati za razvoj slobodi i stanarda teremi težime. Mi često zname iskati žrtvenoga jarca, nekoga doj nam bu napravil to kaj sme si zamislili, bez da mi vu tom morame imeti udjela, a onda ga popljuvati jer je kritika nečijega posla jedine kaj nekteri znaju delati.

Lopove i uzurpatore retke se doj javne usudi kritizirati, a ovi to znaju koristiti, ali žal mi je kaj zbog takvih moraju trpeti pravi entuzijasti v društvenim aktivnostima teri su pokretači sega kaj se v nektere sredine događa.

Zate bi bile dobre da prije nek nekaj osudime ili pofalime razmislime e je to dobre ili loše, a ne da nas ponese birtaški trač pa da paušalne vrednujeme nečiji rad bez podatka i dokaza, jer tak, meste da delame pozitivnu selekciju, rušime one kaj nam je od koristi.