Kaj zbilja djete od nepuna 22 mjeseca tak kuži stvari? I zna kaj hoče. Neki dan pustim joj Fifi, a ona veli „Ne Fisi, oce Doju“. S tim da je Fisi Fifi ne zaboravi me, a Doja je Dora istražuje. Za one malo stareše pojašnjenje da su to crtiči kaj deca sad glediju. Sako vrjeme ima svoje crtane.

Dok sam ja bil mali gledeli smo Tom & Jerrya, A je to, Profesora Baltazara, Loleka i Boleka, Pink pantera, pa onog plašljivog lava kaj je furt kidal na ljevo ili na desno, pa ono malo janje kaj je čim je vidlo vuka kričalo: to je vuk, to je vuk, pa bi onda došel veeeeliki pes i s štapom hitil vuka nekam.

E, da gledel sam ko mali i pticu trkačicu i Djeco Ivica se zovem i Ponča i Tora i mravojeda i Pčelicu Maju i Bajumbadum. Kak se mam nisam zmislil Zekoslava Mrkve? Pa kad sam bil malo veči su zišli Štrumpfovi i Mali leteči medvjediči i Bipsiči,… Kad su Patricija i Sandra bile male popularni su bili Pokemoni, Digimoni i još tam nekakvi ti japanski blesavi crtani, pa su deca još gledele i Teletabise, kaj je meni još blesavije od svega navedenog. H zadnje vrijeme su se ipak malo popravili s crtanima. Sad su dosta prilagođeni deci. I Gracia ih skoro sve voli gledeti. I vlakiča Tomicu i prijatelje i Doru tera istražuje i Fifi s njezinim cvjetnim društvom i Spužvu Boba i Boba graditelja i gdo se bi sad sega zmislil. Uglavnom sako vrijeme nosi svoje. Kak kaj se tiče crtanih tak i kaj se tiče mode.

Evo, sad su največi modni hit gumeni škornji. To samo dokazuje kolko je zapad i kolko su ti modni trendovi u zaostatku za Zagorjem. Tuj pri nama h Zagorju gumeni škornji več dugo nisu modni hit, nego čist normalna stvar. I to več ne ljetama, nego desetlječima. Denes več z onoga teri dojde nekam h gumenjakima delaju bedaka i veliju mu da je seljak. I onda buju rekli da je zapad napredniji od nas. A vidite da na banalnoj stvari kak su gumeni škornji zaostajeju za nama barem 50 ljet. Nekak mi se vidi da nešči gdo dela gumu plača naveliko ove dizajnere i novine i televiziju da s toga napravi hit. Ovu zimu gumeni škornji, lani su po ljetu bili hit oni natikači gumeni kaj zglediju ko klompe z rupama. I da ne pripovedam kak dugo nam več govoriju da si navlječemo onu gumu na „ono“ kad idemo delati „ono“.

Isto tak je na zapadu več par ljet h modi aktivan godišnji odmor. Znate ono kad ljudi ideju na godišnji i nekaj delaju da se zabaviju, da im nije dosadno. Ja od kad delam imam radno aktivan godišnji. To jest idem na godišnji kad imam nekakef posel za napraviti. Znači i h tome zapad zaostaje za nama. I zakaj onda mi svom silom hočemo iti na taj zapad? Zato jer smo bedasti i jer je se stranjsko bolje od našeg. I zato uvozimo ne samo robu koju god stignemo, nego i običaje. Tak sad najmput imamo dvoje mačkare. Negda su mačkari bili za fašnik, a denes su i za kak to zoveju noć vještica. A Božič je več počel. Bar po dučanima. Nete mi verovali, ali još prošli tjedan sam h jednom dučanu več videl Deda Mraze i kuglice i kojekakve stvari za Božić.