Kaj ne da imam baš ljepe naslove zadnjih par kolumni? Nakon huligana i lopova na red su došli i norci. Oni teri noriju. Za norijadu. Evo of tjedan je gotova škola maturantima. Pa onda oni malo noriju. Se je to h redu dok postoji određena granica. Zadnjih ljet ta deca se več i več prelaziju tu granicu podnošljivog norenja. Si smo se več navadili da ta deca fučkaju po cesti, tuliju, popevaju, hičeju konfete i melju. I ja sam prije par ljet bil maturant. Kaj se sad smijete? (to ide one teri me poznaju) I 20 je parni broj. H to doba gda sam ja maturant bil takav nered nije nišči napravil. I nismo norili cjeli tjedan. Nego smo se h srijedu pokazali kak je teri razred oblječen, malo smo se sprešli po Zaboku i oko 8 hvečer kad je prešel zadnji cug nije bilo nigde nikoga. H četrtek isto tak. A h petek smo si išli na kuglanu.

Hud sam. I to fest. Na te maturante. Na njih sam hud zato jer su nasmradili jedino mesto h centru Zaboka kam moreš prejti z malim detetom. Prpičev park. Da nije prek vikenda dežđ curel ne bi imel kam z Graciu prejti. H subotu niti nismo imeli u planu iti van, kad je Patricija imela firmu, ali smo mislili h nedelju iti na ono nekaj kaj je de ne de (društvo naša deca) Zabok trebal h parku imeti. Niti ne znam kak bi se to održalo. Gdo bi to počistil? Jer park nije samo pun smeča. To su ti maturanti kaj su h parku norili sikud scali i bljuvali. Pa hodi onda ja z detetom h takef park.

Najvjerojatnije da ovi teri čistiju grad buju i taj park spočistili. Samo kaj buju oni to počistili z večega. Pobrali buju kaj ima flaš, čaš, vrečice razne i gotovo. Zdrobljeno staklovinje, kaj je opasno za malu decu bu ostalo tam. I čikovi. I štoplini. H pondeljek hjutro je park počiščen, ali je hvečer pak nasmrađen. H tork isto tak. I zakaj se tu pri nama nori tjedan dana? Poglejte Zagreb. Nori se jen dan i gotovo. Ali ne. Pri nama se nori cjeli tjedan. Nek se vidi raskoš.

Ali nemrem baš za se to kriviti maturante. Za se to kaj se događa su največ krive institucije. Od škole, prek grada i županije, do države. A sve institucije pereju ruke od toga ko Poncije Pilat. Jer to nije ničija briga. Odnosno brigo moja pređi na drugoga.
Pak bum rekel. Poglejte Zagreb. Tam je grad organiziral program, osigural mesto gde se maturanti moreju okupiti i noriti i dopeljal pevače, grupe i diđeje.

A kaj su za svoje maturante napravili gradovi po Zagorju? Nič. Jedino kaj se sako ljeto h Zaboku nešči zmisli deti nekakef šator. Zakaj baš h Zaboku? Zakaj to nije h Oroslavju? Ili h Krapini? Ljetes je tam h ZIVT-u bil šator. Kaj se h njemu nudilo? Naročito za takve skupine. Nič. Nisam bil h šatoru, pa niti cjene ne znam. Ali velika piva (pol litre) sigurno nije ispod 10 kuna. Za te si peneze moreš h dučanu kupiti pivu od dvije litre. Prošli tjedan sam ju kupil. Dojde 10 kuna i nekaj lipa. I probal sam ju. Piva ko i se druge pive. Ja da sam maturant bi si rajši kupil tak pivu h dučanu i h parku ju s prijateljima spil, nego išel h gostionu ili šator. Ajde još da je negde nekakef pevač poznati ili grupa bi morti čovek tam i prešel. Ali ovak… Normalno je onda da si deca kupiju piti h dučanu i pijeju po parku. Ili se prejdeju skriti h čilimaru.

To da školarci pijeju po parku ili hodiju nutra h čilimaru je svakodnevna pojava, samo kaj je zdaj za tu norijadu sve to puno večih razmjera.