U Hrvatskoj se i ljetes pojavil Grinch. Meni osobno taj čovek bi bolje zgledal ko Deda Mraz. Barem mu je sličniji po dimenzijama. Da mu se dene kapica, bjela brada i oblječe h črljeno bil bi isti Deda Mraz. A da ga se ovakvog kakaf je oblječe h zeleni triko ne bi mi bil sličan Grinchu nego bi mi više sličil na Tora (valjda je Toro ona depša žaba). Valjda ste razmeli na koga mislim.

Samo kaj ljetes Grinch nije hkral Božić nego božićnice. Ali ne sima. Neg samo nama. Gdo smo mi. Mi sme ljenčine i nič koristi. Mi sme nepotreban teret na grbači radnika. Mi sme super bogati i dobro debelo preplačeni na svojem poslu. Ili jednostavno rečeno ja sam državni službenik. Sad bute vi rekli da kaj se ja opče bunim. Imam posel, dobim plaču, i još bi štel i božičnicu. Da štel bi ju. I dobil bum ju. Če nem ljetes, onda bumo tužili državu pa bumo za par ljet dobili božičnicu i to s kamatama. I to bu puno več koštalo ovu našu državu nego da nam sad isplati to kaj smo dogovorili da bumo dobili za to kaj delamo. Samo kaj poznavajuči brzinu našeg sudstva kad bu sud gotov gdo zna gda bu onda na vlasti. Zato of GrinchDedaMrazToro more delati kaj hoče jer je njega i njegove baš briga e buju naši hnuki dužni 100, 200 ili 500 miljardi raznih penez. Dok za njih ima dobro je.

Neki buju rekli da čkomim dok imam posel i plaču i da budem sretan. Ne smeta mene kaj veliju da nema za božičnice. Kriza je pa nema. Ak nema nema. Ali kak h proračunu onda ima penez za financiranje političkih stranaka? Zakaj to ne ukineju? Ak se mogel ukinuti zakon po kojem su knjige za školu bile zabadaf naj ukineju i zakon po kojem stranke dobiju peneze iz proračuna. Naj se ukine financiranje gradova i opčina tere nemaju dost penez same za sebe. Zakaj se silni penezi h Bosnu šaljeju?

Za divno čudo jedan drugi dio državnog aparata me ugodno iznenadil. Vjerovali ili ne riječ je o hazezeou. Deci, točnije Patriciji i Sandri su se več bile dodrle zdravstvene iskaznice. Ž njih je opal magnetni kod, farba se zbrisala i nisu več bile upotrebljive. Prešla je žena tu h Zaboku do socijala i se je tu zbavila za par minut. Napravile su zapisnik da su iskaznice takve i takve i da več nisu za koristiti i za neko vrijeme buju deci doma došle nove.
A dočekal sam i dan da za dječji rođendan nema nereda po hiži. Patricija je ipak proslavila rođendan. Ona je štela iti van s frendicama. Pa sam joj dal nekaj penez i ona je s frendicama prešla malo van, pa ih je otpeljala na pizzu. Normalno da su se i doma navrnule, a žena je bila spremna i na to. Popoldan je napravila opet manchhumallow. I to uz svesrdnu Patricijinu pomoč. Da nete mislili da moja žena ne zna nič drugo napraviti od kolača! Ali deca hočeju to i gotovo.

Dobil sam i obrisač od buduće šogorice. Da kak prošli tjedan h nabrajanju kolača nisam nabrojal i baklavu kaj je meni njezin tata poslal. Nisam. I to zato jer to nije bilo za goste nego samo za mene.