Bože, kak bi bilje ljiepe gda bi stariejši neke moglji nafčiti mlajše. Još bi bilje ljepše gda bi mladi štelji posluhnuti kaj njim te stariejši pripoviedaju. Nekak si gruntam da se pune toga grde dogaja od gda se deca več ne žučeju h babičina ilji mamina krila. Kak su došle nove šege đukanje h krilu, a unda i pripoviedanje jahke kratke traje. Morti baš radi toga nie cajt povedati povede i dati navuk teri važi od gda je vieka. Negda se reklje da se nektere starinske šege nigdar ne zmeniju i navieke dobre dojdeju onomu gdoj jih zna ilji jih se drži.

Denes, gda več panjkrat počne puzati i bacati, osmekne se z krila i krene prema onomu kaj mu cinfra denešnje življenje. Meste babičinuga i maminoga navuka, na vuha panjkrate za najranieše mladosti tučeju mašine i poviedaju sakojačke nove povede. A te povede pripoviedaju tak ljiepe o semu kaj da je se napravljene z nekakvem čarobnem ščapem. K tomu se još lučeju sakojačke sljičice na tere je se tak ljipe kaj nema veze z pravem življenjem.

I gda se tak ljiepe ide gda čovek luče pod vuhe si meče te nove šege. A gda ide za temi novemi šegami, nie ga strah ni ne črljeni se ni pred Bogem ni ljudmi. Gda je bil cajt, još h maminem krilu trebal je nafčiti onu staru:
„Zaklela se zemlja raju, da se sake tajne deznaju!“

Gda sem ja bila mala znalje se reči da se h selu nemre napraviti nič, a da se kad tad ne doznalje. Če si po lucka njiva pobral bažulj ilji donesel k domu buču, mam je sused videl da nekaj nie po pravem. Za kratki cajt se znalje da si nekaj „pocuknul“ kaj nie tvoje. Če si jemal lucki sad, reklji su ljudi da od hkrajenoga se more najesti bol. Unda če te je i malje zašrafilje h želucu, pripisal si h veljikem strahu tomu kaj si jel hkrajene. Strah je bil jakši od želje i unda bi prie dobre pregruntal nek bi posegnul za lucku hrušku. One kaj je još najgorše, gda su te jemput h selu preglasilji za tata, nie bilje tak veljike gumice kaj bi tie prišveljek mogla zbrisati. On se nosil ne ljete ilji dvie nak se prenašal z pokoljenja na pokoljenje.

Gda ove zadnje dane ilji reklji bi mesec dva lučeme h naše moderne obloke z teremi vidime cielji sviet ilji pak obračame sakojačke novine, nemreme se ne pitati kaj su nekteri pozabilji starinske šege. Kak da niesu nigdar čulji da nič nie moči skriti pred Bogem i ljudmi. One kaj se oko nas dogaja nie ljiepe za oči ni vuhe. Skore saki dan nas napadaju z sakojačkemi pričami kak se denes ne krade sakojački sad nek papereki. Papereki oko teruga se se vrti. Nu gda čovek čuje o kuljike se popereke diela zavrti mu se hglave. Baš si i sama gruntam pak kaj zbilja nešče more gruntati da se tak pune papreke more skriti i da se o nje nič ne doznalje. Pak si baš unda gruntam i dalje i pitam se, gde su bilji „peseki“ kaj su te vriedne papereke čuvalji. Morti i tuj veljaja ona stara šega:

„Pravuga tata i pes pozna i ne laje!“ Alji senek, gda tad velji se :
Dojde cica, na koljica!“

Zmisljila sem se stare povede tera je pripoviedala o jednomu gazde teromu su furt tati pobiralji se z polja i trnace. Ginul je žitek, sad i se kaj je imel. Jedne ljete gda mu je zginul ves sad, naredil je da se hloviju tati. Saki tat teri se hlovil dopeljal se pred gazdu. On je pak odredil da mu se te kaj je hkral nabije h rit, kak kaznu. Tak su prielji jednuga teri je kral sljive i sluge su mu po naredbe „odrapile“kaznu. On sam je kričal, branil se, alji nie pomoglje. Pak su hlovilji one teri su kralji grozdje, kupine i jabuke. Saki je dobil istu kaznu i kričal kaj da je ponorel. Gda su hlovilji jednuga teri je hkral jabuku, i gda je čul kaj mu je kazna počel se smejati. Čudilji su se stražari kak se on smieje, a onie teromu su rievalji slivu se plakal. Tie z jabuku je rekel da mu je smiešne radi toga kaj jedva čaka da hloviju onuga teri je hkral buču. Dobre je znal, da bu kad tad pripeljal i da ga buju našlji, jer:
„Zaklela se zemlja raju da se sake tajne znaju!“