Taman gda se malje pritajiju lažni manekeni Zagorja, evo ti novuga šusa. Huda sem na se one teri dielaju špot z Zagorja i Zagorce. Kud god putuješ po Ljiepe naše zesmejavaju se Zagorcem da su zatucanci, pijanci, pravdaši i kajtiga ja sama znam.

Tem stranjskem bi čovek fejst mogel zameriti, alji kak bolje gruntam za se sme si sami krivi. Da sme zbilja vriedni špota i da nazaj dolazi one stare poveda na prvi plan imelji sme se priljike uveriti ove dane. Stare povede za Zagorce idu ovak:

Prva priča.
 Gda je Bog hodil po Svietu došel je i do Zagorja. Pokučil je na vraca jednomu siromaku i prosil jesti i meste kaj bi otpočinul. Siromak nie znal da je te Bog. On i njegva familjija rade su ga prielji, nahranilji i dalji mu meste kaj si bu otspal. H jutre prie nek je Bog krenul rekel je siromaku da si radi toga kaj je bil milosrden naj zaželji jednu želju. Pri tomu mu je rekel da bu njegvomu susedu naprvail dupljit. Na primer, ak si bu on zaželjel jednu hižu, susedu bu dal dvie. Če bi štel jednu kravicu sused bu dobil dvie. Siromašni Zagorec je jeden cajt gruntal i na kraju rekel Bogu.
„Dejte mi skopajte jedne oke!“
Znalje se kaj te znači. Da bu susedu skopal oba dva oka.

Druga priča.
Ona je sljična prve, same kaj si je siromak zaželjel da mu hcrkne jedina kravica h štalje. Te je značilje da unda buju susedu hkrepale dvie.

I tak je hu ta priča Zagorec pokazan kak je jaljen drugomu. H sakem selu i kraju kak sem več rekla i prie, ima sakojačke ljudi, alji svoju sramotu vešte skrivaju. A mi bedaki, lajeme sega guta kaj nam se drugi znovič pak podsmehavaju.

Tie vraži zagorski jal došel je pak na videlje ove dane gda su Zagorci konačne dobilji jednuga ministra, našuga Sinišu, zagorskoga župana. Tie mladi čovek od gda je vušel h poljitiku nič nie skrival. Svoje življenje del je na precendbu ljudem. Povedal je o sebe se od mani i vrljini, a njegve znanje cienilji su  drugi ljudi. I baš radi svojuga znanja zebran je za ministra.

I unda bi bilje normalne da je sakomu normalnomu Zagorcu drage da konačne,poklje duguga cajta ima jednuga svojuga čoveka tak „visoke“. E unda su počelji spomenki Zagorcof o tomu mladomu čoveku. Počelje je pljučkanje po njmu ze se kraje. Zgledi da su mu hnogi zameriji nekaj od gda je bos biejžal po dvorišču ilji od gda se pentarl po drievu. Počelji su mu spotikavati kaj česa onie teri su pofarbani semi farbami i sami čez življenje niesu nič napravilji. Sakomu pravomu Zagorcu i čoveku teri ima rad zagorje triebalje bi biti drage da ima takvuga čoveka.

Bilje bi dobre da onie teri se ž njim ne slažeju barem držiju gubce zaprte makar i još bolje poplaveji od jala. Jal je tie teri nas Zagorce čez cielje življenje bremza. Sakomu „žutomu“ „črljenomu“, „bielomu“ „plavomu“ i drugomu treba biti drage da se jednomu svojomu čoveku more potužiti na nekaj. Morti ga bi bolje razmel nek nešče z druguga kraja.

Več na ljiete Zagorci larmaju kak se droncaju po cesta, kak je Zagorje zakinjene kaj je sakak istina. Pripovieda se kak se po cielje ljiepe naše nekaj spodelava, a pri nas nič. I gda je došl cajt da se o tomu povie na pravem mestu unda su se javile šuple glave i počele z špotanjem domačuga čoveka.

I baš radi toga kaj su mu nekteri zamerilji one kaj nie vriedne spomene, drugi nam se zasmejavaju i hu sebe gruntaju kak i navieke:
„Vi ste Zagorci, seljaci i bedaci!“

Ipak, za nadati se da h Zagorju ima i one teri ne glediju same za svoju farbu i svoj žep. Za nadati se da počneju veruvati h ljudi z svojuga kraja i držati njim lojtru po tere se buju pentralji, a ne ju droncati i ž nje jih stepati. Gda bume sami počelji držati do svojuga kraja i do svoje ljudi i drugi nas buju počelji drugač lukati.
Pozabiti konačne tirbame na tie vražji zagorski jal.