O Bože, kak ljiete curiju. Malje skočiš sim, dukneš napre, pocurikneš se, nasmieješ ilji plačeš i kak da veter nosi cajte, obrneme zajdnju stranicu na kaljendaru. Još se niesi hbieljel od ljitnuga sunčanja i več si h dvanejstem mesecu. Mesecu h terem bi negda bil dobre zabundan h tople obljeke, imel zamotane noge h debela nuča i pazil da ti gumenjaši niesu nigde prepiškani. A gda bi išel po sniegu ilji zmržnjene tiri, gospodski škornji bi škripalji i vudiralji jedinu „mužiku“: „stric, vujec, stric, vujec…..

Nu, došlji su nekteri drugi cajti. Zmenilji su se ljudi, a borme i vrieme. Več put si gruntam e je vrieme krive kaj su ljudi postalji drugački ilji su ljudi postalji drugački radi toga kaj je vrieme drukčeše. Ne hufaju se ljudi mesariti kak negda hu tem cajtu kaj njim nej h mese došlji črvi gda je tak toplje. Kak su nekteri dani toplji, mogel bi hoditi i h kratke rukave, da te nie sram. Dobre je te kaj je toplje, po jedne strani. Bar ne morame preveč hajcati. Tak šparame peneze, tere je navieke pre malje. A unda nam i te diela veselje.

Kak bilje da bilje, toplje ilji zeboščica, dvanejsti je mesec gda se od vajkada raduvalje. Raduvalji su se ljudi jer se hu tem cajtu slavi najveseljieši krščanski svetek, Božič. Nu tak je valjda porihtane od negda da su baš hu tem mesecu i godi teri su se največ ovršavalji. Negda je te bil mesec h terem je se miruvalje po vanjke. Niesu se delalji nikakvi poslji po gruntu i gospodare. Ljudi su bilji same po hiža i štuljilji oko blaga. Unda su imelji cajta za ovršavanje gode ilji imendane. Tak se h dvanejstem mesecu slavi, Brbarenje, Francekove, Sv. Lucija, Božeki, Janki, Andraši, Silveki i još nekteri godi. Priljika je te bila da su ljudi jedni k drugemi hodilji i skup se z godovnjaki poveseljilji.

H prosincu gda je zahladilje bile su po sela mesare. I te je bila priljika da se ljudi malje podružiju, spripoviedaju, napuniju si želučeke z bolju koštu, a se zaljiejeju z dobru kapljicu.

H večerku su se ženjske zestajale i čiehale perije, spripoviedale se „od miluga do draguga“. Bila je te priljika da se dozna gdoj se z kem hofira, gdoj z kem ide na snuboke i gde buju gosti. Kak se bljižil Božič tak se perije zamenilje z dielenje kinđi za cimer. Saka se je ženjska, a največ puca, štimala z nakinđanem cimerem. A kak je čivi cimer zgledal vodil se spomenek i poklje Božiča. Spretneša puca imiela je doata fale i unda je bila sigurna da bu več snuboke završilje h njenje hiže, pak je mogla bolje prebirati. Raduvalji su se ljudi semu onomu do čega se denes praf za praf nič ne drži, a te je največ pajdašija i druženje.

Mesec radosti i pajdašije bil je i priljika da se ljudi pospominaju i o svojem delu čez ljete. Bez brige su bilji oni i čakalji trdu zimu, ak su po ljetu bilji radljivi i sega si pridelalji. Gruntalji su si takaj kaj su čez ljete po selu posujavalji i posudilji. H zajdnjem mesecu h ljetu posujene se moralje vrnuti svojemu gazde. Kak se i h dvanejstem mesecu ovršava veljiki svetek Božič, ljudi su triebalji iti na spoved. Župniku su povedalji svoje griehe, alji su se spovedalji i sami z sobu. Na koncu ljeta delalji su „iventuru“ svojuga dela čez ljete. Sami su sebe priznalji če su čez ljete delalji komu zlo kak se tak poškodni nemreju preveč veseljiti. Saki je dobre znal da onie odzgor se dobre vidi i zna.

 Denes se pune toga zmenilje. Največ ljudi nema cajta zabremzati, stati i poluknuti si h dušu.
Bilje bi ljiepe gda bi ljudi malje stalji i pitalji sami sebe, kaj su čez ljete delalji. Sikak njim bi trebal dvanejsti mesec, mesec raduvanja biti ljiepi gda bi probalji popraviti one kaj čez ljete niesu delalji po pravice. Triebalji bi i deti na vagu kuljike toga su napravilji dobra, a kuljike zloče. Če vaga zloče prevagne, krajnji je cajt da se trieba popraviti. Same čiste duše i savesti čovek se more raduvati svetkem teri prehajaju. Oni trdokorni i netrmanji teri misljiju da z veljiku halabuku i sakojačemi modernemi cinframi moreju kupiti sreču, grde se varaju. E očeju, e nečeju h njihove savesti senek postoji malji „črvek“, teri furt ruje i savest priziva. Radi toga kaj bi ovi cajti bilji ljiepi kak negda trieba delati dobre ljudem. A gda nekomu dielaš dobre, on je srečen. A same se veselje i sreča z sreču i veseljem vrača.