Prethodna kolumna
Slijedeća kolumna

Za dušu, za spomenek: Nedjelja – dan za počinek teruga je odredil Bog

Piše: Nevenka Gregurić
Negda se hodilje same na veronavuk h cirkvu. Z svoju susedu Macu išla sem par put prie nek sem i

Negda se hodilje same na veronavuk h cirkvu. Z svoju susedu Macu išla sem par put prie nek sem išla h školu, alji gda sem krenula h prvi razred veronavuk se nie smel preskočiti. I poklje prve pričesti i fierme, a te sem zbavila poklje druguga razreda, moje odhajanje na veronavik trajale je do sriednje škole. Išla sem i poklje, alji ne več tak redovite. Htegnula sem iti na veronavuk same unda gda je bil vuru prie poldašnje nedeljne meše.

Nie me nišče tiral da moram hoditi. Nie me ni triebal. O tomu da se hodi na veronavuk, h školje se nie smelji ni zucnuti. Krive veljiju oni teri denes govoriji drugač. Ipak tak je bilje. Velji se, bilje pak prešlje i radi toga nie trieba imeti zamera. Im te nišče nie pometni radi toga hude lukal, nek oni kaj baš nisu na istem prafcu z pametju. One kaj sme čulji na crkvenemu veronavuku ostalje nam je za naviek zapisane h našem srcu i pameti.

I tak kak je sake ljete počel veronavuk h cirkve kak i škola, naveke su župniki počelji znovič poviedati o stvaranja Svieta. Kak sme rasli priče su bile se širše i ozbiljnieše, alji h sake je bilje rečene da je Sviet napravil Bog. Počel ga je delati, žurel se je i gda se zmučil štel si je odehnuti. Nu ipak ne prie dok nie se napravil. Gda su bile gotave gore i planine, jezerca, potočeci i rieke, se rasljinje, živinica i čovek, bil je red da si odehne. Još je furt ostajalje nekaj za dodelati, popraviti, alji se glavne je bilje zgotovljene pred kraj šestuga dana. A unda si je i sam Bog sel i rekel da bu sedmi dan za otpočinuti. Tak se priča prenašala od vieka do vieka. Dodavalje se na nju kaj česa, alji ipak sedmi dan ilji reklji bi mi, nedelja, bil je i ostal dan za počinek. Za tie dan niesu se odvajkada planiralji nekavi poslji. Ljudi su med sobu reklji:

„Gdoj se nie nadelal čez tjeden, ni hnedelju se ne mora mučiti“. Za one teri bi pak nekaj delaji čez nedelju reklje se da su lakotni, a ak bi gdoj slagal nekaj oko hiže ilji za hižu, znalje se reči da bu hunje caruval onie z rogi, a ne Isus. Reklje se da h nedelji čak ni trava ne raste, a kamolji kaj druge. H nedelju se čak niesu ljudi ni ufalji svaditi. Moj je otec bil strogi, pak če sem kaj čez tjeden zgriešila h nedelju sem mu poviedal. Bil je hudi, alji je znal reči:

„Imaš sreče kaj je denes nedelja. Da nie nedelje, e ti bi odigral.“ Drugi dan ga je več minulje pak sem tak znala dobre prejti. Nedelja bi triebala biti za familjiju. Bilje je i poslje navieke teri se niesu odgajalji. Ljudi su reklji da krma i mrtviec nesmeju čakati. Te je značilje da če je gdoj hmrl, h nedelju se slobedne pokapal. Grobar je slobedne roval h zemlje i skopal jamu. Pazilje se da se trava pokosi tak kaj nej h nedelju triebalje pripeljavati krmu k domu i sušiti, alji ak je grde vrieme pokvarilje sušenje, krma se slobedne pospravljala. I tak se prinas odnavieke držalje do nedelje. Da poklje teškuga tjedna h poslu i školje familjija ima cajt za sebe. Morti bi unda bilje menje nervozne i zločeste dece. Morti bi menje dece odrastalje bez mami i tati. Morti? Pune je tie morti.

Ovak moreme same reči morti bi bilje bolje. I zdej gda se zdiže veljika halabuka oko toga za kaj trgofci ne dielaju h nedelju? Za kaj nie moči iti kupiti gač i hlač? Za kaj nie moči kupiti ormare? Za kaj nie moči iti kupiti cukora i kruha? Kak zdej potrošiti nedelju gda nie moči z decu prejti h „šoping“, dati njim nekaj od moderne brze jiestvice i tak doma ne trošiti struju, ni vodu, nek si ljiepe kratiti cajte h zadimljene i zaprte moderne veljike štacunske cetre. I hnogi veljiju, kaj trgofci očeju? Kak sestre i doktori dielaju, kondukteri, šofieri i mogla bi nabrajati. Istina i trieba delati, alji se one kaj se mora. I kaj se mora, nie žmehke, veljiju ljudi. Larmaju največ oni kak buju na zgubičku teri se kuneju kak su Božje sluge. Kak unda moreju biti zdej na zgubičku i tirati ljudi z posla, ak su njim ostalji silni penezi tere su moralji ljudem davati gda su h nedelju delalji, a o slobodnomu danu ilji godišnjemu same senjalji.

Jeden mi je dan rekla jedna moja pucica i sama več denes mama.“ „Znam da bume nazaj h nedelju išlji delat. Alji bar na kratki cajt bum h mesecu imela slobedne četiri dane i te nedelje. Do zdej sem imiela h mesecu fraj same saku drugu nedelju. A za saku nedelju dobila sem trideset kuna, a potošila!? Vesela su moja deca, muž i ja. Nedelja je za mene i moju familju zdej pravi svetek, teruga je odredil Bog.“

Facebook