Negda sme školje kak deca vučilji pesmice o jeseni. Došla je jesen i napunila špajze i pelnice z sakojačku hranu. Napunila škrinje žitem, senjake i stanje z krmu. Kak je došla, donesla košaricu z farbami i počela farbati ljestinu. Za nas je unda ljestina bila senek kak i čez ljete jer sme bilje pre malji da razmeme kaj se za praf znači gda ljestina opada.

Z starenjem, gda čovek počne živeti tak kaj život počne sam nositi na svoja pleča unda ljistje pofarbane ze semi farbami nie baš same radi toga kaj bi nam bilje ljiepe za oke. Z opadanjem ljestine tere se največ dogaja baš h desetom mesecu po teri je i on sam dobil jedne od imeni, značilje je i znači konec jednuga cajta h ljetu. H listobadu mesecu podhitavalji su ljudi svoje posle na njiva i h polju kraju, hitre pospravljalji kaj se je još triebalje i prispravljalje za zimske dane.

Dani su h desetniku krajši, jutra su meglena, alji več nie moči hoditi z golami nogami i rukami. Zna još čez mesec biti ljiepe i toplje cajte h terem kak da se ljete oprašča. Prie, dok su ljudi živelji same od onuga kaj su doma priskrbelji od hrane, fejst su vodilji brigu o sakimu cajtu tere je prihajalje. Lukanje h nebe, h mesec, poviedanje o dane h sakem cajtu h ljetu prenašalje se od stariejše na mlajše teri su se držalji sakojački šegi. Nie te unda baš bilje za smehavati nek je veruvanje h takve šege prihitavalje ljudi h njihove posle. Če bi okesnilji za nekaj napraviti reklji bi „prešla baba z kolači“.

Kozaprst je baš bil mesec h terem se moralje napraviti još prec toga kak bi zima bila bolša, bez veljike brige, a unda i ljepša. Dvorišča su več cinfralji kopiči krme, slame i koruznice. Pod strehu štalskuga stanja gizdave su se smejale zriele buče, a kre njih hrastava koruznice z teru bi se pokrile gda bi zapuhal severnjak.

Pratilji su ljudi gode i za skore saki god sveca znalji reči kaj je njegef posel. Tak se za sv. Luku reklje: „Sveti Luka, nofte huka i rade z snegem zahuka!“

Radi toga su se poslji h zemlje i na zemlje moralji prigotoviti. Pri nas se veruvalje da na dan sv. Luke trieba posaditi luk, kaj bi došel k sreče. Retke je bilje, alji se znalje dogoditi da h listopadu opadne snieg. Ljudi su unda znalji reči na teri dan h mesecu opadne snieg tuljike bu put snieg curel čez ljete.
Takaj se reklje:
„Če h listopadu mraz i veter brije, h siečnju i veljače sunčeke grieje!“
„Ak je ljistopad vodeni, prosinec je vetreni!“

H desetem mesecu ljudi su još pratilji kakve bu vrieme na god Gala, šesnaestuga i Uršule dvojsetprvuga. Kakef bu dan na Galove takve bu sljedeče cielje ljete, a kakef bu studeni i prosinec pokazala je Uršula.

Dišeči, šari i ljiepi ljistopad mesec skore pri kraju ima dva godovnjaka teri su bilji kak zadnja opomena da si poslji moraju biti gotovi. Te su Šimun i Juda, dvajsteiosmuga ljistopada. Do njihove gode moralje je biti popukane se korenje z zemlje. Tak se je repa več morala pospraviti skup z krumpierem i korenjem h kope jer se reklje:
„Čuvaj se Šimuna i Jude da te z snegem ne probude!“

Unda, gda je se bilje pospravljene koncem meseca, kak se šikalje, ljudi su bilji več po svoja hižica. Rane h jutre z meglu, mrazem i zimu boril se je dim z rafunga hižic. Z malje, alji toplje dome išel je fest zrak kak da gizdaf oče reči da se nutre pod krovekem oko peči stiska družina. Morti je bilje i skruljenja h želucu, alji od srečnuga i veseloga smieha nieje ga bilje čujti.

Denešnji miholjček ilji ljistopad cinfraju nektere druge cinfre. Kopiče, hrastave i kopi teške je več moči denes videti. Visoki dim z naše „prekrasne kasarni“ tere sme napravilji, još menje. Ž nih čujti smieh i veselje, rietke.