Rimski cari dobre su znalji da oženjeni vojnik nie dobre vojnik pak su radi toga i ženidbu branilji. A vojniki su se baš radi toga i radi ženilji kaj nebi išlji h vojsku. Biškup Valjentin  radi toga kaj je potajne ženil je bil hlovljen i h veljika muka hbit. Kak spomen na njegvu smrt, svetkuje se Valjčekove.

Na staru šegu Za Valčekove, ne tak staru kak cajt h terem je živel Sveti Valjentin, ljudi su pozabilji. Tie negdašnji cajti gde su se još navieke ljudi znalji našaljiti z decu pošiljalji su jih tičekem h gosti. A da bi vidlji gosti tičeke, zebic i trepetljikic, deca su trebalji pod grmojvje iti bosi. Ona deca tera su te štelji videti i naselji starijšem kaj su pripoviedalji varačalji bi se si premrzlji, ozeblji i trepetalji bi od time. Stariejši su njim se unda radi toga smejalji i reklji da su išlji gled zebice i trepetljikice.

Denes nišče ni ne pomišlja na takvu šegu. Če bi se još nešče i zmisljil nebi sigurne našel detece tere bi mu veruvalje i tere bi mogel nagovoriti na tak nekaj. Ak bi se slučajne i dogodilje da nekuga od dečurji nešče i nagovori gda bi se te prečulje, razapelji bi ga na galge. Bil bi optužen za zlostavljanje deteca i dobre bi prešel ak nej završil h reštu i platil veljiku globu.
 
Tak je unda denešnja šega za Valjčekove zmenila kaput. Denes, pune prie Valčekovuga z štacune se smiejeju sakojački čački. Po obloke štacune viesiju srčeki se felje i kak da vabiju ljudi nutre. A unda se i sakojački čački kupiju i darujeju onomu za koga se mislji da ga imaš rad. Takva halabuka z čački traje več prec ljiet. Največ ju rabiju mladi zrielji ljudi, teri još niesu  priseglji pred Bogem i ljudmi da se buju cielji život imelji radi. Tak se hu temi mlademi dani nadaju da bu tak i ostalje. I gda okruniju tu svoju ljubaf poklje prec ljiet kaj pajdašujeju, kak da pozabiju na one kaj njim je prie cinfralje življenje. I tek unda gda prisegneju kak da pozabiju na Valjčekove ljubavne šege. Ne same na nje nek i na šestu i devetu zapovet Božju.

Njihove ljubavne rieči zameniju grde kletve. Več jeden drugomu ne hgajaju nek trucieraju. Babe očeju zakomandieriti z mužmi, a oni se nedaju. I gda počne natezanje gdoj bu jači, gdoj bu poklje bitke pobednik cajti njim curiju. Meste ljiepuga lukanja jedni prema drugem lukanje se pretvara h „metke“ z teremi jeden druguga strieljaju. Baš si gruntam zdej pred Valčekove kak se nigdar tuljike nie pripoviedalje o ljubavi kak denes. Iste si tak gruntam kak nigdar tuljike ne vidim žalosne lukanje dece teri doma ne čujeju ljubavne gugutanje njihove starce.

Pune je i onie detece teri su kaj lopte z teremi se loptaju oni teri su njim dalji život i imelji je radi „ljubavi“. A unda se njihova ljubaf preobrne h nekaj kaj je čoveku teške i razmeti. Pune sem si put gruntala i pitala se kaj se te z ljudmi dogaja kaj postaneju jedni drugem gorši nek dvie zaračene vojske. Kaj se te more pripetiti da poklje ljubavi o tere larmaju na se strani dojde nepodnašanje, gorčina , a ne rietke i mržnja. H gruntanju saki put dojdem na te da hnogi ljudi praf za praf neznaju kaj je ljubaf.

Nekteri misljiju da je ljuvaf ljizanje, stiskanje, namigavanje, landranje i življenje od denes do zutra. Nu gda se te splasne, da se več nemre landrati, da se več nemre tirati po svojem i da prihajaju sakojačke brige, mam nastaje zlo. Malje teri gruntaju da je ljubaf praf za prav podjednak radost i trpljenje, da je ljubaf dobivanje, alji pune več davanje.

Ljubaf nema pravila, nema granice. Z ljubavlju se ne lamače i ne razmieče. Gda nekuga imaš rad o tomu nie trieba larmati i kupiti z skupi kupički. O ljubavi se ne kriči i ne povieda. Ljubaf je smieh, dotikavanje ruke, govor z očji tere prepozna srce i duša i kak da bez rieči veljiju:
„Ja te imam rada ilji rad!“