Nekak od navike rada lučem ljudi i o nji si gruntam. O nektere baš i nie vriedne gruntati. Nu kaj se more. Životni su nam puteci načičkani z onem kaj očeme i z onem kaj nečeme. Čovek nie nafčen biti sam pak mora biti z ljudmi. Tuj trieba voditi računa teri ti buju pajdaši, teri ti buju same onie tere poznaš ilji pak oni tere moraš trpeti.

Znal je reči moj dedek i babica ovak:
„Sinek, bolje ti se z pometnem plakati nek z bedakem tancati!“
Zdej, gdoj je pameten, a gdoj bedak teške je reči. Makar pamet i bedastoče senek ideju z tem kakef je čovek je. Tuj se nebi smelji prevarati. Triebati je gruntati o onem kaj su nekteri bilji, kaj jesu, a sikak nemreju unda biti ni drugački h cajti teri prihajaju. Sigurne je dobre znana i ona starinska da „vuk glaku mienja, alji čud nigdar“. Kak več imam prec ljietec na pleča, hu te sem se pune put uverila.

 Kak god življenje teče od gda pamtime nemreme zbeči one kaj sme si zapamtilji. Tak čovek zapamti da su denes očeju napraviti največi poštenjaki onie teri su sikak prie bilji za saki špot. Življenje njim baš nie bilje onak po Božje pravice. Nu oni larmaju sega guta. Z larmanjem sigurne očeju ljudi strašiti i svoje griehe zataškati. Tak vam tat zna se h meti i unda ljehke prepozna sebe ravnuga. Gda se sam več sega nacuče počne glumiti poštenjaka i z prstem kazati na druge.

Si se ljudi rodiju jednak, golji i bosi. Sakomu čoveku starec daje isti navuk da bu dober i pošten. Senek, kakef bu ovisi i kakef mu „kaput“ če življenje obljiečeju. Teške je denes da bu nešče zločest, tat i kumer če su mi starci fejst poštenjeki. Velji se da „nie nigdar vrana zlegla goluba“, kak niti da „je jabuka rodila hrušku“.
Denes ipak na čoveka pune utiečeju društve i pajdaši. Ak pajdaši dileju grde unda se teške tomu odhrvati. Pogotovu radi toga kaj se negda grdi i zločesti poslji, bilje po jeziku ilji žepu, prvi čas vidiju dobre i ljiepe. A gda su dobri i ljiepi, teške njim se odmeknuti.

Čovek bi triebal imeti navieke na pameti da nič ne traje zanavieke i da mora tak živeti kaj se nej svojuga življenja h ni jednem času mogel sramiti. One kaj je najvažniejše da se ne sramil sam sebe. Same tak bu imel čistu dušu i srce. Gda si ovak gruntam i oko sebe lučem nektere ljudi kak larmaju, galamiju, špotaju i furt se buniju se mi jih je žal. To larmanje je radi toga kaj hu te halabuke nej čulji svoju savest i vidlji svoje delje. Gda se bi obrnulji za sobu, kaj su ostavilji h prec življenja trebalje bi njim dojiti za plakati. Ja znam več put reči:
„šteta je i hrđavuga metka z hrđave puške trošiti“ na one teri nigde niesu ostavilji svoje ljipe trage, nek same zrušene familjije i pajdašiju.

 Zrušilji su se čega su se doteknulji i na kraju nemaju nič. Od takve ljudi nemreš nič ni dalje čakati. Oni su bilji, jesu i buju ljudi teri čez življenje nikomu, čak ni sebe ne dielaju dobre.

Bilje bi ljiepe gda bi saki čovek tuj i tam stal pred špigelj, če ga ima, i pospominal se sam z sobu. Spominek bi triebal biti na tragu onuga kaj je napravil, kaj diela i kaj mu je za delati. Če je več se kaj je bilje i je posmradil, radi svojuga mira, bilje bi ljipe da sebe i drugem počne delati dobre. Da mu se ljudi gda ga vidiju radujeju, a ne da ga z prstem kažeju i bežiju od njega kaj „vrag od tamjana“.

I tak. H mojem gruntanju za radost čoveka naj se držiju one moje tera mi je prie par ljiet, hjutre, sama došla na pamet. Več sam vam ju i par put poviedala, nu nie zgorega ju ponoviti, a ta ide ovak.
„Gda h jutre hmiješ ljice, hmij i dušu i budi srečen če nešče čez dan vidi kak čista blešči!“

Če bi tak čovek delal onda  se i on sam, a i njegva pokoljenja nebuju sramilji njega i njegvuga dela. Radi toga bi se još sake jutre čovek moral pitati, gdoj sem bil i gdoj jesem? Če sem kumer bilje bi cajt da bum nekaj bolšuga če ne radi sebe unda radi svoje dece, teri očeju ilji nečeju nosiju štembilj svoje starce. Pak i vi sami, ne morate stati pred špigelj, dosta je da se pitate kaj ste napravilji, kaj dielate i kak misljite dalje.