A evo nam još malje i došel bu 8. mart. Praznika teri se negda slavil kak Majčin dan. Hnoga je mati dobila darek od svojuga deteca za Majčin dan. Je, se do cajta dok su se dareki kupuvalji za meterine peneze. Nu kak su se šege zmenile, kak su došle nove si očeju pozabiti na cajte teri su bilji prie. Na cajte gda se ovršavala ljietnica ženjske bune, ga več niesu štele trpeti nepravdu teru su naspram njih delalji. Ženjska kak mama, ženjska kak baba na njive, kak radnica za mašinu fabrike, a pravde ni odnikud. Gda su te vidle pobunile su se prie prec ljiet za ravnopravnost teru denes ženjske imaju.

Radi toga cajta kak spomenek na hnogu tera je zgubila življenje osmuga ožujka za ravnopravnost babi denes, ovršaval se 8. mart. Negda se znalje h šalje reči da su ženjske shodile ravnopravnost i pravicu za se posle i sigde, same doma ne. Za ženjsku je doma ostal posel matere i gazderice kak negda tak i zdej. Istina i bog da se i tuj kaj česa zmenilje, nu matere su bile i ostale svoje familjije stup na teruga se si moreju nasloniti, teruga navieke moreju si drieti, guljiti i hvražati. Majčine srce nigdar nie moglje reči ne, onomu teri je rasel pod njenjem srcem. Matere dajeju navieke čez življenje dece se za kaj onie veljiju:
„Dej mama.“

Matere nigdar nie nič teške napraviti, bi reklji, če h poldan ilji h polnoč za svoje detece ilji familjiju. Na, „dej mama“, matere skačeju oko svoje panjkrete kaj oko ringišpilja. Još i den denes nie moči videti ni vure, ni dana, ni cajta da metere ne razvažaju decu, ne teljiejžiju jih i navlačiju sikam, same da njim se hgodi. Tak i trieba. Radi toga su i matere je. Pune su alte dece kaj starci razvažaju na morje, na skijanje, na sakojačke spelancije. Kak su i negda delale se za svoju decu i familjiju drage njim se vidlje gda su se bar jemput deca, a i muž h ljetu zmisljil na te i daruvalji njim za 8. mart, če nič druge rožicu. Bile su tuj negda i sakojačke priredbe, recitacije, veseljice i popievanje.

Denes sega toga nie. Pune se zmenilje, alji ostalje je iste negda i denes, i furt se čuje, dej mama. Gda pak deca okosmateju još se furt čuje dej, alji jahke rietke, na mama. Pozabi se brze na davanje tera su deteca imiela od matere. Velji se da se posujene mora vrnuti. Im je h druge poslje, alji h familjija več ide teže. Voziju se poodrasla deca, več veljiki ljudi, alji otraga h hnjihova alta retke se de vozi starec na morje, na sanjkanje...., kak su negda starci vozilji njih. More biti da su denes veljika deca strahu kaj se nej njihovi starci htopilji, spotrgalji, nadihalji drukčešuga zraka i zahljeknulji. Kak da deca pozabiju da se bi triebalji nasmejati svojem starcem, a posebne matere, tak kak se ona njim raduvala gda su delalji prve korake, gda su prvi put sami k zubemi neslji žljicu, na pol zljejanu i praznu.

Biti mater nekaj je njaljepše kaj se jedne ženjske more dogoditi. Diel svoje duše, tiela, daha daruje onem terem se največ veselji. Mamina ljubaf ne sehne ni unda gda ne čuje, na mama ilji fala ti mama, za se h življenju.

Denešnje življenje se vrti same oko onuga kuljike zvoni h žepu. Tak več put deca mieriju ljubaf prema starcem ilji matere po tomu kuljike njim je h žep spravila. Teške da moreju razmeti da je z praznuga žepa bilje teške nekaj dati. Nu one kaj ima največu vriednost, vriednost tera nema ciene je majčina ljubaf. Čista, veljika, tiha tera se kaj tat skriva h denešnje halabuke. Ona ju rieva, tira, alji se neda.

Kak je cajt Majčinuga dana bljizu, bilje bi dobre da se baš radi te ljubavi z teru su matere pri ciecu žukale svoju decu, oni zmisliju na nje. Gdoj god je zmislil tie svetek, nie važne. Važne je da se bar na jeden od takve dane h ljetu bar z misli pokuca na vrace onie tere nigdar ne zapreju vraca svojuga srca. Ljiepa rieč, smieh i radost, same je one kaj nič ne košta. Te je same one kaj matere čakaju. Te je same one kaj se velji, „na mama“, moju radost, moje veselje kaj se skupa radujeme Majčinem danu.

SREČEN VAM OSMI MART!